復活節假期，一齊執老母啲遺物，剛剛執佢房間裏面所有嘢，4個人執咗6個鐘頭，大概執咗7成，掉咗5大袋黑色垃圾袋，仲有4大袋紅白藍暫時keep住。佢真係有好多衫，多到根本著唔切，仲要件件差唔多款式，差唔多顏色。
最勁嘅係佢套結婚衫，紅色衫紅色褲，老豆話佢當時搵師傅度身訂造，啲料真係靚，咁多年，成45年呀，一啲線都冇甩到，冇起毛粒。如果日後有機會結婚，都想改佢呢件嚟著。之後嘅計劃，就係我會搬去我阿媽間房，工人姐姐就由二樓搬嚟我地下個間房，咁老竇就住二樓，舅父返嚟就住二樓，三樓就完全吉咗佢。因為費事俾我老竇屋企人話我哋一家霸曬三層。
聽日目標就清晒佢間房，加搬我間房啲嘢入去，之後姐姐就可以慢慢將佢啲嘢搬落嚟，跟住假最後1日就會去返工。
