雖罔講因為家己有咧畫圖的關係，所以對著真濟人直接用 AI 生圖是足感冒的。加上 AI 的使用，嘛予網軍擾亂台灣社會的成本愈來愈低。一寡假仙假觸的相片、影片，若毋是有專業的知識，一般人是看袂出來伊佗位有問題的。
毋過佇自然科學的應用，我顛倒卡無遐爾反對使用AI，尤其佇德國GDCh（Gesellschaft Deutscher Chemiker e.V.；德國化學會）的會議上，看過有人已經咧透過 AI machine learning 做『大資料』（big data）分析，估算化學反應的『性地』（reactivity）、位點（regioselectivity）佮『受質範圍』（substrate scope），加速新反應的開發。
德國化學年會 GDCh 歇睏時間 (Kaffeepause) 提供的點心、四秀仔
進前轉去拜訪大學時陣的論文教授，伊嘛共我警告講，有一寡學科予 AI 取代的可能性真大。親像結構生物學，有可能是第一个崩盤的，建議我以後揀研究題目愛真細膩。毋過我這馬的頭家，感覺這個過程閣猶未遐爾緊。像伊這馬咧研究的酵素，用 AI 幻算 （台語發音：huàn- sǹg／ㄏㄨㄢ˪ㄙㆭ˪；華語：模擬；英語：Simulation）出來的結構就是毋著的。毋過，無論按怎，佇工課上，我嘛認為家己愛加減利用 AI 來鬥參共。
尤其是最近咧趕博士論文，開頭 introduction （紹介）定定愛開真濟時間、查誠濟資料。後來就想講來試 AI 看覓，看伊走揣佮整理文獻的效率、正確度、完整度，敢有比我進前用 google 搜揣引擎沓沓來閣卡好勢？
用過幾擺了後，體會著google AI (Tab + Enter) 整理的大觀資料(overview)，確實對著了解一門卡深的科學學問有所顫悶。有時陣拍英文落去問，伊攏自動共遐的大觀資料翻成華語。毋過，伊整理的物件，毋是全部攏對的，有時陣內容煞佮伊引用的文獻完全無仝款。所以我一定至少愛用齒枋 F12 掃過 AI 引用的文章，確定內面真正有按呢講，才敢接受 AI 的結論。
所以講，用 AI 直接寫論文是真正足危險的！尤其是教授的知識一定比學生閣卡深闊，若是 AI 佗位寫毋著，𪜶絕對有法度共伊掠出來。而且，一个學生平常時啥物程度，教授嘛攏略仔知影。若是講交出去的物件寫甲傷媠氣，共普常時的表現差傷濟，龜跤顛倒予人看眼出來。
進前就有一个對巴基斯坦來的交換生（學籍佇義大利），就是因為伊交出去的碩士論文introduction 寫甲傷輾轉了，但是上後壁的 experimental part（試驗部分）煞亂操操、花翱翱。兩个部分對起來，頭家就咧懷疑講，伊的論文應該是 AI 吐出來的。試驗部分因為牽涉著數據，可能卡歹用 AI 生成，所以伊才寫甲亂七八糟。
彼咧交換生的化學程度若我來講，可能比一个台灣的高中生閣卡䆀，所以家己嘛無才調判斷 AI 寫的物件佗位有問題。什麼攏毋捌，閣敢用AI交論文，宛若(原若uan-ná)是大膽。
頭家閣講著，這馬學術界用 AI 的狀況嘛是愈來愈濟，但是毋一定是正面的。除了新聞有報講有論文，AI 生成的指令閣囥佇文章閣無刣掉，頭家家己嘛收過 paper 的 reviewer 明顯無看過伊寫的物件，直接用 AI 寫評論凊彩應付，予伊足袂爽的。
除了用 AI 整理文獻的大觀，因為想欲佇論文展現一寡卵白質的結構，需要用著一款軟體號做 ChimeraX (奇明拉)。因為筆者對毋管啥物軟體攏鈍跤鈍手，感覺愛開誠濟時間看過說明書抑是影片（大部分功能嘛毋是我需要的），所以進前一直攏無愛好好仔學。但是這改透過問AI來操作軟體，確實有卡好扭掠。
