《大士爺厚火氣》第十集：放送

挩窗牽一條紅線，平安倒轉來，受著神明式的迎接。

哈囉的尾溜仔尾，去予一粒圓輾輾的蛇頭含咧。這隻紅線蛇，生做真古錐，身軀會當搝偌長就偌長，按保生大帝廟牽來大士爺廟的內埕，挩窗和哈囉大氣喘袂離，當佇咧歇喘……紅線蛇的喙放開，直透趖入去中殿，軁過普陀巖花矸仔形的空縫，來到觀音的眠床，踮手節輕輕仔拍一个結，蛇閣踅頭倒咬家己七尺的心臟位，繃甲絚擋擋，身軀弓起來，起起落落，起起落落，袂輸心電圖，現出觀音的氣脈。

自宋朝太后看病到今千偌冬，大道公再次施展紅線節脈的醫術。

「彼就是觀音的氣脈！彼就是觀音的氣脈！欲送去大道公遐節脈！欲送去大道公遐節脈！」哈囉開破，眾神明目睭金金綴蛇身的心電圖，按廟內送出去。

就佇這時，虎爿雲無水矣！散了了！鬼王去予騙第二改，氣拂拂火亂亂噴，打貓街仔四界著火，好兄弟去予驚甲哀爸叫母。

忽然間，鬼王擋恬，害啊！去予眼著啊！微微仔相紅線蛇，目睭射出兩條金光……。

看著金光射欲倚，挩窗緊張甲強欲死，大聲喝：「緊喔！緊喔！若袂赴共氣脈送到大道公遐，這个工就了去矣！」

聽著挩窗的點揬，紅線蛇拚命共催落去，金光走真緊，上頭前的氣脈才到保生大帝廟的牆圍，金光就欲電著矣！

「害矣！袂赴啊！」哈囉虯尾掩面。

一支幼秀的手伸入去廟埕，共氣脈取走。

仝一个時陣，佇民雄大士爺廟的服務台，服務人員共麥克拍開：「e̍h！e̍h！a̍h！a̍h！麥克試驗！麥克試驗！各位善信大德，各位朋友，佇遮有代誌報告……e̍h！e̍h！一个囡仔走無去矣，伊个阿媽真煩惱，拜託逐家來鬥走揣……e̍h！e̍h！囡仔的小名叫挩窗，今年十二歲，人生甲瘦閣薄板，不止仔賤……e̍h！e̍h！各位若有看著彼个挩窗的，請共伊𤆬來服務台，抑是共我通報……e̍h！e̍h！……e̍h！e̍h！……e̍h！e̍h！佇遮閣說明一改……。」服務人員是菜鳥，講話頇顢，寶釵阿媽擋袂牢矣！共麥克搶過來做伊掠狂：「挩窗的！挩窗的！你是走去佗位啊？耍甲毋知人是無？害我揣甲半小死！緊共你祖媽死轉來！無！絕對欲予你好看！」