台文開講 || 屏東‧高士神社

　　佇文章開始進前，我想beh先hōo你看一張相。

　　Tsiah-nī suí ê Thòo-lih (とりい 鳥居) ，m̄是佇日本，是佇咱台灣屏東牡丹鄉ê kuskus (高士)村，而且除了白色ê Thòo-lih，koh 有一間有定例祭祀ê神社，tsiah就是2015年重新建立ê高士神社。
　　原底這个神社會起佇tsiah，是日本殖民時代ê關係，m̄-koh佇重起進前是kan-na tshun基座niā-niā，重起了後size khah細，而且內底mā m̄是原底日本時代祭祀ê日照神，是招引khah早kuskus ê英靈轉來，希望in當年beh離開厝進前ê約束會當實現。（Hőng揣去鬥相共相戰ê kuskus人，會佇出去進前約束beh佇神社頭前再相見）

　　高士神社uì舊年開始，逐年五月攏會舉辦定例祭祀，新曆過年ê時mā有，m̄-koh逐家若是對這个神社有淡薄仔印象，可能是因為前立委蔡正元對神社重起ê消息不滿，佇伊ê面冊頂懸批評，引起媒體注意，這个部分有其他媒體做過深入ê訪問，我會佇結束進前分享Link hōo逐家。
　　佇這篇文章內底，我想beh分享予逐家ê是我佇5/4、5/5去kuskus參加定例祭祀ê記錄。

　　高士神社社務所今年宣傳ê重點就是神社參拜了後ê證明-ごしゅいん 朱印，這種寫佇專門ê簿仔頂懸ê朱印，會註明你去參拜ê日子，因為日本ê明仁天皇佇五月退任，所致定例祭祀ê年分就m̄是平成、是令和，又koh因為高士神社定例祭祀了後，koh來就是新曆過年才會有活動，到彼時雖然mā仝款是令和，m̄-koh就m̄是令和元年、是令和二年矣，所致今年ê朱印是真稀罕--ê。

　　5/4下晡到kuskus，我無入去kuskus村，直接就到高士神社參拜，彼時就已經有誠濟人佇辦公室外口排隊矣，我想講無趕緊，誠暗才開始tuè咧排，m̄-koh社務所ê工作人員無預算tio̍h會有tsiah濟人beh來寫朱印，簿仔kap孤張ê朱印貼紙攏準備了無夠，好ka-tsài我是提早一工佇定例祭祀進前就來，雖罔無買tio̍h朱印簿仔，總是有提tio̍h孤張ê貼紙，以後我若去日本𨑨迌，mā會當佇hiah ê神社參拜買簿仔，才koh kā這張貼起lih。

　　朱印m̄是tshing-tshái啥人攏會當寫ê，一定ài是神社內底ê神職人員，高士神社無當地ê神職，是2015年鬥相共重起神社ê日本人Sa-tóo(佐藤)先生擔任，所致今年配合Sa-tóo先生ê落山時間，5/5定例祭祀彼工khioh朱印kan-na會當到下晡1:30，若是Sa-tóo先生無延後落山，我想可能誠濟人攏無寫tio̍h。

　　逐家若是對朱印有興趣，mā ài會記得寫朱印是一種宗教行為，m̄是觀光紀念，一定ài誠心參拜了後才會當拜托神職人員替你寫喔！寫朱印ê過程差不多ài開10分鐘至15分鐘，若是拄tio̍h特別ê日子，tio̍h ài有耐心排隊相等。

　　5/5早起，蹛佇恆春市區ê我趕到高士神社，已經有袂少人佇神社頭前相等，m̄-koh逐家看起來攏kap我仝款無啥清楚，祭祀是會按怎開始？頭殼頂罩tio̍h烏雲，不時koh落綿綿仔雨，雖然是按呢，徛佇神社邊仔看山kha ê海景，心內是真平靜。
　　就按呢等到過11點，徛佇Thòo-lih邊仔ê人略略仔有動靜，原底箍一个圓ê眾人uì Thòo-lih頭前分做兩爿，看神官喙--lih唸祭文，沓沓仔uì Thòo-lih頭前ê樓梯行起來到神社，令和元年ê高士神社定例祭祀，正式開始矣。
　　這是我頭一改參加神社ê祭祀，對過程kap祭文攏無了解，雖罔佇Sa-tòo先生邊仔koh有一个鬥翻譯ê人，我大部份ê時間攏感覺家己小可仔礙虐，m̄-koh規个過程是誠莊嚴，落尾神官koh提神器替在場ê人祝福，mā替這塊土地祝福ê時，我略略仔起雞母皮，有影感受tio̍h這个定例祭祀是為tio̍h祝福來進行，mā向望kuskus ê人有因為這个神社ê活動得tio̍h幸福。

　　佇祭祀結束了後，我注意tio̍h現場唯一一个穿插khah成是原住民ê人，伊是kuskus在地人，我kap伊討論我ê一寡疑問，比如講：Tsiah ê 祭祀活動族人是按怎想ê？是按怎社務所ê工作人員看起來攏m̄是在地人？kuskus敢是koh有其他ê活動會當參與？
　　這位大哥ê漢名姓陳，族名叫sialu（袂記得問伊按怎寫，這ê寫法是我問朋友，伊用排灣族ê拼音寫hōo我ê，若有寫m̄ tio̍h，麻煩留話hōo我，我隨來改）伊講因為這má佇kuskus內底mā無啥人會曉講日語，所致kap神社有關係ê活動，攏是hōo社務所ê人來處理。目前族人對祭祀活動猶koh teh觀察，逐家嘛teh想講配合這个神社，敢是ài kā kuskus內底重要ê活動mā suá來tsiah？M̄-koh目前攏猶未決定。
　　sialu大哥講若逐家對kuskus有興趣，會當去看高士部落生態旅遊ê網站，in有設計幾落種活動來hōo逐家體驗，比如講kuskus ê農業生活、婚禮禮俗，mā會當蹛佇kuskus內底kap in深入接觸，我mā想講若有機會beh招一寡朋友來kuskus𨑨迌，m̄是kan-na因為日本風格ê神社來這个hiah-nī suí ê所在。

　　若是你對我頭前講tio̍h ê神社重起引起ê爭議有興趣，會當看這篇苦勞網ê報導，內底有一寡一般人khah袂接觸tio̍h ê故事，m̄-koh，若有機會，我希望逐家會當家己去一改kuskus看覓，這个所在m̄-nā是suí，koh有誠濟台島原住民ê故事。
　　落尾，因為這改我去kuskus參加祭祀有錄影，若是你想beh看，會當來follow我ê fanpage，影片做好了後我會佇遐公佈，mā會koh khǹg來tsiah hōo 方格子ê讀者會當看。