行過光年个溫柔放送

　　今仔欲佮逐家介紹一个 vtuber——Ci Ci Ci the Cirycle！進前我講著 vtuber 个時，有講希望台灣有較濟用角色講古个 vtuber，Cirycle 就是較偏這型，伊是大宇宙彩星市个外星人，人形个外表是伊欲佮地球人交流个殼，目睭正蕊空縫內个彩色才是伊个本體；Cirycle 這个名嘛無算伊个本名，伊講伊真正个名閣較長，若用地球人个聲唸起來較成 Cirycle，若寫𪜶个字就若像漢字个「荒」。

　　通常看著 Cirycle 第一个印象攏是伊个電子聲，一開始我嘛誠袂慣勢，聽一站仔就共關去，第二擺看著人咧推捒，毋知影按怎我會想欲閣試看覓，了後就感覺聽起來毋古錐古錐，然後聽著伊唱歌，雖然嘛是電子音，真正閣袂歹聽，才開始較捷看。

　　伊佇大宇宙彩星市電波放送局食頭路，逐工向地球放送伊个節目，伊个節目真正濟，逐工中晝有「大宇宙彩星市電波預報」來佮逐家練痟話（O），這馬已經來到 249 回；暗時拄著時仔會有「無名暗安曲」，伊會用彼工發生个代誌佮心情做詞，隨在唱出歌曲，伊个歌曲風格較民族風，定定一大段無詞，干焦唏唏哼哼——無的確就是𪜶彩星市个語言？我本身就誠佮意民族風个音樂，可能嘛是因為按呢才愛聽。

　　暗時八點檔（？）个時陣，伊時不時有實况放送，有時陣拍電動，譬如講最近咧拍 pokemon；有時陣佮其他 vtuber 合作，頂回閣用伊家己畫个棋子佮夕燒（Si̍k-sio）奕西洋棋；嘛有過佮實况个觀眾做伙𨑨迌，親像前改畫圖予觀眾臆。

　　介紹差不多到遮，雄雄想著我猶未講著當初是按怎會繼續共看，彼擺予人推捒第二改，看伊講著有當時仔伊會佮伊咧用个物件說多謝，若是想著「有這个物件佇身軀邊誠好」，就會佮伊說多謝，我聽了感覺真有理，嘛真古錐，毋管聲好聽抑是形好看，我看 vtuber 上重要个是內容，vtuber 个想法我若佮意，就會想欲共支持，這就是我看 Cicycle 佮另外一个南心詠个原因。