爬

較早臺灣電視節目，主持人上愛滾耍笑講：「有一改車禍，小明失去了伊的雙跤.....」這時陣，B跤的來賓就家己愛知知咧，較配合咧隨摔落去塗跤，干焦用手出力，共伊本底好好的雙跤拖咧佇塗跤「爬」，按呢，觀眾一定會予伊弄一个笑甲腹肚𢯾咧疼。

我毋是小明，我嘛無出車禍，我干焦是一个致著小兒麻痺的患者。佇彼个臺灣早期逐家猶真散赤，醫療猶未遐爾仔發達的年代，有一陣參我仝款的人，阮若是無穿鐵鞋、托柺仔，或者是坐輪椅，就干焦會使佇塗跤爬爾爾。

不而過，阮阿母是較愛我穿鐵鞋、托拐仔起來行，伊感覺按呢才有出著力，兩支跤才袂那來那倒勼。閣較譀的是，尾仔愛我連睏攏愛共鐵鞋穿牢牢，阿母講按呢跤才袂走精去。想嘛知，我哪有法度接受，無偌久，這个辦法就佇我蠻皮反抗之下宣告失敗矣！

阮兜是庄跤所在三層的透天厝，當當時是阿母共地買落來，參隔壁敆做伙起兩間厝，一間是起予阮阿媽蹛，算來嘛是有孝，阿若這間就留咧阮規家伙仔蹛。兩間厝的設計攏相𫝛，台式透濫日式的設計，除了拄入門阿母咧做生理的電頭毛店愛穿鞋以外，閣入去的客廳就開始鋪規片的地枋，灶跤是安thài-lù，閣有二樓全部攏是鋪塑膠地板，厝裡的人攏嘛穿淺拖咧行，干焦我是佇入去客廳進前，就已經共鐵鞋褪了了用爬的入去。

彼款感覺就若親像你是一个古早時代，逐工穿鐵衫攑鐵劍欲出去佮人相戰的戰士，轉厝裡，你敢閣會鐵衫穿咧佇食飯，啥人毋是一轉到厝，就想欲放予輕鬆自在。我嘛仝款，規工咧學校予鐵鞋縛甲無爽快，轉到厝，隨共鐵鞋褪了了咧塗跤爬，彼時陣的我，才是上自由自在的。

這馬大漢矣，我咧臺北稅厝攏會囥一架輪椅佇厝裡用，除了去便所抑是洗渾軀以外，已經無閣用爬的矣。毋過若是去外口浸溫泉，抑是去運動中心做ＳＰＡ欲入去烘爐，我嘛是會用爬的，這馬敢若嘛袂感覺著別人看我的眼神有啥物怪怪礙虐的。凡勢是臺灣當咧發展多元的社會，逐家對別人的無仝嘛愈來愈有法度包容佮接受，毋管是同志抑是弱勢的族群，逐家攏會使勇敢表現家己，這嘛會當算是咱這代臺灣人的幸福乎。

---------------------------------------------------

洗渾軀＝洗身軀，這是阮宜蘭的用法。