［性別講看覓］—目睭內底沒查某囝

一、翁死，伊的老母叫伊去有孝大家、大官

我工作室的一个同齊做工課的阿君，去年有一工的暗時，伊的翁猶未轉來，伊想可能是加班，咧無閒，先𤆬（tshuā） 囡仔去睏。

第２工早起，才知影伊翁規暗無轉來，送囡仔去讀冊了後，開始揣人，接著通知，伊已經死佇做工課的場所。

阿君才30幾歲，細漢的後生５歲。疫情期間，in翁仔某２个人的工課攏無去，干焦賰阿君佇我的工作室的一點仔代誌，一個月領幾若千箍，當做伊家己的所費。毋但本來準備買厝的自備款用完，閣貸款來生活。伊的翁做伊死去，沒存款，有欠錢，蹛的厝是稅的，留誠濟的物仔愛伊處理……，我聽著，想著伊的日子欲按怎過矣！

驗屍的報告，人一、二個月出來，伊翁８個月才有結果，一寡仔社會福利攏窒咧遐，領袂著。

伊一个人愛辦真濟代誌，有人鬥相共無？「我公公中風過，現外勞照顧中，婆婆和小姑只是來添亂的。」後頭厝這爿，老母老爸無錢，嘛袂曉辦代誌，另外一個原因是老母講：「你的公公婆婆還在，我不能幫忙。」共伊捒予大家這爿，當做大家厝內的人。伊攏靠朋友、朋友的朋友，佮客戶鬥相共。

伊的老母直直交待伊：「你要孝順公公婆婆，他們死了兒子很可憐。」伊聽幾若擺了後，擋袂牢，共伊老母喝倒轉去：「我死了老公，孩子死了爸爸，我們不可憐嗎？」in大官自本誠好額，予in大家烏白開錢，這馬講in無錢啊！２个七、八十歲，無法度閣趁錢。這款的老人我感覺足恐怖，若無錢欲按怎？in猶有一个查某囝，我講有代誌叫in去揣查某囝。

彼是啥物款的老母講這款話？阿君愛趁錢，伊的工課是有做才有收入，愛飼２个囡仔佮家己，沒存款，有貸款愛還，愛搬厝，換較細間的厝……。趁錢對伊來講無問題，毋過下晡４點愛去學校接囡仔下課，這種時間，欲按怎好好仔做工課？

是啥物款的老母一直講出彼款的話？無疼惜家己的查某囝，一直叫伊去有孝大家、大官，無想著in母仔囝有飯通食無？真正是共「查某囝嫁出去，就是別人的人」的講法實行甲足徹底，敢若嫁出去就佮後頭厝沒底代，無血無目屎閣加無感情的老母，心肝足雄耶！

阿君講：「我覺得是我媽想要面子，要人家誇獎說她是好娘家，沒有管我們的事，又叫我去孝順公婆。」

毋免講時代外進步，這馬猶有這款人，揹著古早的講法，無顧查某囝佮外孫的死活，干焦顧家己的面子佮傳統爾爾。

二、「２支雞腿拄拄好」

有一擺去朋友開的咖啡館辦活動，講性別，朋友的朋友講，in兜拜拜的時，in老母會煮一隻雞肉，老母那剁喙那唸：「一隻雞２支雞腿拄拄好。」老母的意思是，伊有２个後生，一人一支雞腿拄拄好，毋過猶有查某囝幾若个，攏無算著，查某囝毋捌食過雞腿。

伊閣講in兜佮in老母的幾若項代誌，看伊講來，抑無怨恨，伊講in老母無讀冊，古早的人攏按呢，當做老母毋捌。

三、「阮阿鎮毋敢食」

我結婚了後，頭幾若年，過年攏轉去阮翁的大兄兜，同齊拜拜，食過年暗的圍爐。我攏較早去，佮大姆（阮翁的大嫂）同齊煮菜。

煮到差不多，愛洗米的時，大姆咧唸：「年飯愛煮５工份，傷濟工的飯，阮阿鎮毋敢食。」伊干焦聽著伊的後生講毋敢食，其他的查某囝敢講就敢食、愛食？查某囝講的話攏無聽著，in愛食，抑是毋敢食，老母攏毋免插in。

年飯愛煮５工份是in兜的例，我毋捌聽過。我臆，古早艱苦，食袂飽，趁過年的時陣，規定愛煮５工份，至少這５工逐家食會飽，一寡風俗的例攏是為著艱苦人較好過日，像：規定拜拜的時愛拜肉，逐家才有肉通食。

四、「我誠公平，逐家攏有分著」

有一个厝邊仔，來參加我的活動有一陣時間，事後我訪談伊，伊講in當初欲買一間有花園的透天厝，錢無夠，招伊的老爸老母同齊買。買了，佮伊的老爸老母住做伙。

咧分房間的時，in老母共上好的房間分予in阿兄，in這家分著較細間的房間。其實in阿兄無蹛遮，一年蹛無幾工。

幾若年了後，in翁仔某閣佇對面買一間，搬過去蹛，彼間大厝賰in老母一个人蹛，伊的兄嫂佮老母無講話，老母攏是in３姊妹仔咧陪伴、照顧的。

食飯的時，請老母來in兜食，老母毋肯，伊３頓煮煞，愛捾飯菜去對面予老母食，２个小妹有一个一陣仔來住３禮拜，陪老母。建議老母共大間厝賣掉，搬去住大樓，老母毋肯，in閣愛整理花園。

老母分財產的時，大兄分著幾若千萬的厝，in姊妹仔分著幾若十萬的股票，這馬老母猶欲領股利，股票袂使予in。老母講：「我很公平，你們每個人都有分到。」

我訪談伊，到上尾，她講：「我很愛我的媽媽……」因為這个「愛」，綁咧做遐濟，老母攏無看著，目睭內干焦後生才是「人」，才是伊的「囝」。