我猶毋捌去參加過台語的活動。團體內底有囡仔姊的老母共我講，伊去參加活動，干焦台頂彼个演講、講古的人講台語，其他的工作人員，像：辦報到、發資料的人攏講華語。
表演的活動嘛仝款，敢若台語是用來表演的，毋是普通咧講的。伊感覺誠奇怪。
若是我，我會去要求工作人員講台語，「請恁講台語，會曉講的儘量講出來，袂曉講的才用華語。」當場若揣有負責人就共伊講，若無，事後寫批予主辦單位，表達這个意見。
毋管in的工作人員講華語的理由是啥物，有人要求，in家己就會注意，趕緊共台語講予較好，抑是倩人的時，特別要求講台語。按呢予會曉台語的人增加工作機會。這馬的人上愛問：「學台語欲創啥？」「有啥物路用？」尤其少年的、學生。
會使應伊：「這馬，閣後來，台語的活動會愈來愈濟，攏會要求逐家講台語，你會使去做工作人員、工讀生，增加這款仔的工作機會。」
我前幾若工去京站買保養品，彼个少年的查某囡仔佮我講台語，我欲走的時，共伊講：「你的台語講誠好。」
「我會記得你頂擺來，講台語，今仔日看著你，我就咧想欲按怎講。」
「你進步誠濟。」
有影，有講就有進步。
附：
１．有一擺，我去參加一个好朋友，伊的老母的告別式。司儀咧唸亡者的囝兒的時，干焦唸２个阿兄的名，第２擺嘛按呢唸，沒我朋友的名，我擋袂牢，佇揹仔內面揣一張紙出來，開始寫批予禮儀公司，共干焦唸後生的名，無唸查某囝的名的無理，應該改進的理由寫清楚。
典禮煞了後，我揣著一位先生，伊的胸前有掛牌仔，我紙提著，講一遍予伊聽，請伊共這張紙交予公司，咧這个時代，袂使按呢做，干焦算後生，查某囝無算，毋管查埔、查某攏是這个老母的腹肚內生出來的。
本來按算欲投稿予報紙的讀者意見的意見廣場，落尾貧惰就無投。
２．阮老母的訃聞內面有「孫女媳」，同志的配偶欲按怎稱呼，是經過一段時間，因為需要，因為要求才生出來的。民主社會的特色是，任何人需要啥物，就箍一寡仔有仝款需求的人去爭取，每一个人需要的物仔是袂自天頂自動落落來，攏愛家己去爭取。
３．30外年前，阮對當時的學校（小學）無滿意，就集合一寡仔人自己辦學校。30外年過去，這馬無去學校讀的自學、各種的實驗學校遐爾仔濟，逐家攏會使用家己滿意的方式去學習。
