Wasser, diese flüssige Materie, hat nichts Festes in sich
水，這个硞硞流 ê 物質，伊從來 m̄ 捌固定
Jan Heweliusz本底就按算換新圖，新 ê 攝相一出來隨成做閃閃爍爍線路無穩定 ê 鎢絲燈，無確定。無確定 m̄ 是媠花 tī 別人欉，媠某 tī 別人房，嫌家己䆀是我無事揣事 kā 家己縛跤縛手，情緒叨撚。
這 tsiah 記錄過 niā.....
敢無閣較新 ê 物，敢著愛按呢餾 buē 離.....
我接受迎新棄舊 ê 癖，這久是按怎 teh 交繃？ 毋知，Keine Ahnung，鼎猶 teh 滾，來冊櫥揣新冊。
《山城番子巴我的故鄉我的家》？《石頭縫的幸運草》？
鼎 teh 呻矣，台江海內海聽好講是以早台南地的政治佮經濟的中心點，倒風內海嘛是彼當陣台南人生活中心.....倒風內(lāi)海《大港ê台灣》｜被遺忘的倒風內海，原來伊唸做 lāi m̄ 是 luē ê 仝字無仝音，像 Slyt 照字唸應當是 S-lī-th m̄-koh 伊是照北德 ê 講法 Söl。
無確定 ê 發音 tī 雙跤踏雙船，心頭亂紛紛 m̄ 知 bueh 讀《山城番子巴我的故鄉我的家》抑是《石頭縫的幸運草》，「倒風內(lāi)海」成做 kan-ta 囡仔 tsiah 做選擇 ê 𤆬路雞，我知影我 bueh 選佗一本冊來結緣，mā 知影我 bueh 按怎解決這个無局 ê Sein oder Nichtsein, das ist hier die Frage, to be or not to be that is the question.
「我隨我的心意寫作，正經僫讀，啊！請讀者你也盡量。」
我隨我 ê 心意寫作錄食譜，無人來交觀，呔討情緒叨撚，無事揣事來夯，正港無聊夠底。
舊年 ê 雙跤踏雙船，心頭亂紛紛成做今年 ê 迎新棄舊換雙新鞋繼續雙跤踏雙船，心頭亂紛紛。
Tī 算飯師猶未分張專業，豆仔 tī 我 ê 目睭就是豆仔無分這類是含水碳素彼類是素肉，自算飯師開始熱情無料衛教，我開始 tuì 豆仔講，恁愛交米分隨人食 buē 使得繼續 Happy Jamaikanischer Reis mit Kidneybohnen，抑無 foie gras 來相揣，畢竟目今 ê 年歲 m̄ 是烏貓 25 ê 齊平懸，是營養愛搝懸熱量愛放低 ê 半百之歲。
Essen Trinken Gewinnen Sportliche Senioren haben's leichter 運動類 ê 序大較輕鬆有一張圖清楚開拆人 tī 25歲、45歲、65歲 tuì 熱量交營養需求 ê 變化。原圖無標示比例，所致下述(hā-su̍t) ê 比例是我個人做比如。
1. 25 歲熱量交營養徛𫝛款 ê 100%
2. 45 歲熱量需求 70%，營養需求 100%
3. 65 歲無運動者，熱量需求 40%，營養需求 100%
4. 65 歲有運動者，熱量需求 70%，營養需求 100%
根據 Hello 醫師肌少症(ki-tsió-tsìng)分張人 ê 筋肉自 40 歲開始落崎，40 ~ 70 之間每十冬減 8% 左右，70 歲增加到 15%，筋肉不足除了生活鈍跤鈍手 mā 影響食食生活。
這幾日出門巡田園搪著一位看起來 70 捅歲 m̄-koh 84 歲 ê 序大，分張伊 ê 故事。
2 冬前 hōo 貧惰蟲按一隻爬到規身軀，本底猛掠 ê 跤手出現慢鈍 hōo 我開始毒蟲，你猶少年正港愛好好保持運動，我 ê 朋友有人食到 70 發見規日 kan-ta 有才調按房間行到便所開始運動，彼效果是阿婆仔生囝，誠拚 ê 拚甲轉去塗州賣鴨卵，phàng-kìnn ê 肌筋猶是 m̄ 翻頭相揣。
舊年準備瑞典挪威車日子，招翁去𬦰公寓附近 uī-tio̍h 溪流一塗一塗疊懸 ê 小山崙，這个小山崙 tī 這斗進前是一塊雞卵糕攏無算在內，彼日交翁做陣𬦰山崙，我清楚感受大腿肌肉快樂出帆，隨開始掠貧惰蟲到今倚 bueh 一冬 ê 成果，肌肉質量凡勢無烏貓飽滇，總是重𬦰順溪流疊 ê 小山崙，我 ê 大腿 buē 閣感覺無啥通接力。
保持運動，肌肉 tsiah buē 出帆 m̄ 是醫學放聲。
我 m̄ 是算飯師無才調清楚知影卵白質按怎食 tsiah 有夠額，總是順網路請教來 ê 卵白質需求，我一日需要食甲 83g 左右，這个額看起來無 tsuē m̄-koh 斟酌 kā 算，若以素肉花豆 100g 5.4g 卵白質來算我愛食甲 4 罐外 ê 花豆罐頭，像 YouTube 推薦我看 ê 影片「補充B12，別再被騙了｜三種素食者，強化營養大公開！｜花蓮慈濟醫院 羅慶徽副院長｜字幕編審：羅慶徽 博士Dr. Ching-Hui Loh」欠 B12 食海帶、松茸、珊瑚菇、木耳，一日愛食甲 5 碗 ê 逐日食遮 ê 物就飽矣，其他 ê 營養素攏免食。
認真食食正經無遐爾仔簡單輕鬆，像 HR-Fernsehen 放送 ê 營養食食專題報導眾主角之一 ê 無體力抱家己猶無一歲 ê 後生 ê 漚少年阿爸自照起工食糜飯，伊講「較早 ê 我認為食飯頓是一件快樂 ê 代誌，這久我感覺食物是一種苦毒，m̄-koh 我佮意。」
這位漚少年阿爸慣勢 ê 飯頓交目今德國時行 ê 飯頓無宛 2 體無營養齊熱量，uī-tio̍h 改善伊 ê 漚少年，伊開始食營養師建議 ê 食物並食甲伊需要 ê 熱量，一日飯頓排出來，食飯桌齊無夠囥。
我行 buē 出這个豆仔敆番薯齊是含水碳素 ê 磅空，總是我有才調 kā 花豆 ê 重點囥 tī 卵白質交鎂 hōo 家己莫行入家己做連半桶師攏無 ê 智識綁票。
迎新棄舊第四斗，攝相技巧總算有進步。
