昨昏下畫，我佮後生𤆬伊的一歲外的查某囝去公園行行一下，邊仔有一个查埔人咧掃塗跤，我共囡仔講：「掃塗跤。」「掃樹葉仔。」「用掃梳掃。」「阿公咧掃塗跤。」
無想著伊出聲應：「Ｘ語叫做『掃地』。」我無聽清楚伊是講啥物「語」？伊紲落來那掃塗跤，那用半台語，半華語的話共囡仔講話。
看起來伊應該是咱講的外省人，這馬佇外口拄著的外省人，大部份佇台灣出世的（80年矣！），伊有想著學幾半句仔台語，毋是叫我佮囡仔講華語才「著」，誠好。
上尾仔，伊講「大人」按怎，共「大人」講做「tāi-jîn」，伊的意思應該是「tuā-lâng 」。我咧想今仔日轉來才查「掃梳」欲按怎寫，老師就寫著「掃梳」。
我毋知影伊是歡喜、甘願學台語？抑是看這馬的範勢，姑不而將學，會曉講一寡仔台語。我閣想著：
伊講一世人的華語，老來才學台語較可憐？
抑是台灣人袂使講台語，80年後才來復振，像我本來會曉的，愛拍拚想，想往過是按怎講的？原本袂曉的中年人佮少年人愛自頭開始學，誠辛苦。
是外省人較可憐，抑是台灣人較可憐？我想欲共外省人講：你若毋是家己甘願講台語，閣認為愛學，勉強學一寡仔，毋是台灣人逼你的，嘛毋是台灣人害你的。
（2026.1.19.）
寫「掃梳」這篇，https://www.facebook.com/share/p/18AS55J6fB/
