紅魔鬼賽後評 英超 曼聯 2-0 愛華頓 (9-3-2024)

紅魔鬼賽後評

英超 曼聯 2-0 愛華頓 (9-3-2024)

1. 聯賽二連敗既曼聯主場迎戰啱啱上訴成功由減10分變到減6分既愛華頓。

2. 呢場波既時間對我黎講真係最撚衰，係英國時間十二點半，響出面既餐廳食飯既時候唯有用手機黎睇，所以有時睇得唔太專心，如果真係有啲位睇得唔清楚既，咁就算數喇，唔好太認真，哈哈。

3. 開波之前坦克已經講明，話除咗伊雲斯同華舒福可以趕得切復出之外，係冇任何傷兵可以復出，唔止咁，連青年軍上黎既科臣都加入埋十字大軍。

4. 其實佢哋係咪用士巴拿黎練波架…？往死裡打！

5. 講返今場，陣容繼續天殘地缺，面對住愛華頓，其實表現都唔係特別好，尤其是中場啲交波，好多時都會無厘頭交失咗波，唔止卡斯米路，般奴、加拿祖同麥湯都有，更加係令到對手有反擊機會，好彩呢隊係愛華頓，把握力差，而曼聯既門將奧拿拿既表現比起上半季都改善咗唔少，將所有中龍既射門都救出，仲有一球係開波冇耐小禁區快對手一步出迎沒收咗個波值得一讚。

6. 話雖如此，但係佢啲救波有時都仲係會令人驚一驚，好似救出加拿遠射果下，好似直接撲出去比對手再射咁，不過整體而言，我覺得佢表現係唔錯。

7. 但你話曼聯係唔係比人撳住黎砌？咁又一定絕對唔係，其實都係五十五十左右，而且講射門威脅我覺得係曼聯仲更加有威脅，尤其是加拿祖，今日表現好搶眼，可惜始終年紀仲細，有幾下半單刀或者響右側殺到入禁區果啲處理無論係傳定射都係爭少少。

8. 話雖如此，加拿祖真係有佢既威脅，佢搏到兩球十二碼，就令紅魔鬼領先上半場返入更衣室。

9. 呢兩下絕對係十二碼，但係其實呢兩球愛華頓既防守球員又真係太魯莽出腳，衰少少講，呢兩下唔出腳既話，分分鐘到最後曼聯啲球員都唔知自己會射咗去邊，而呢個「唔知射咗去邊」，正正就係曼聯上半場攻勢既寫照。

10. 你問我，上半場其實係得般奴果下罰球中楣算係黃金機會，其餘時間係組織到入禁區，但都唔知點解最後一傳或者射都處理得好差下，冇咗賀龍既曼聯，呢啲情況出現得更加多。

11. 下半場既情況，我覺得其實個情況都冇乜大變，雙方都有射門，而曼聯既攻勢係更有威脅但自己把握唔到，般奴既射門比碧福特救到，角球混戰又自己唔知響度做乜係都爭少少射唔入。

12. 防線方面都叫做keep到喇，伊雲斯本身只係簽黎做第五中堅，但係呢幾場佢出親都有好表現，足以證明自己寶刀未老，隨時仲係呢個傷兵多到排到多一隊出黎踢既moment響曼聯陣中最可靠既中堅。

13. 其實你話贏得好唔好睇？係麻麻地架喇，尤其是中場啲傳波真係成日都好牙煙，而自己啲counter attack明明可以好有威脅又處理得唔好，有時衰少少自己攻緊既時候啲波處理得好差然後比人搶咗，趁住中場線真空比人打入自己禁區輸返，今季都見唔少，好彩今場既愛華頓冇帶射門鞋…

14. 但最緊要既係響傷兵滿營既情況之下執到三分先，響有一個星期時間，睇下可唔可以有多啲傷兵復出，可以響主場對利物浦既足總盃賽事上陣喇…

#不專業足球筆記 #足球專欄 #專欄 #我愛紅魔鬼 #英超

#紅魔鬼賽後評 #MUNEVE #曼聯 #愛華頓 #足球 #賽後評

#英超賽後評

廣告時間 -

ig: leafopen3

instagram.com/leafopen3

fb: leafopenleafopen

facebook.com/leafopenleafopen

方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938