編輯嚴選

Tòa佇旗后的阿婆

Góa cha-hng ka-tī chē kong-chhia khì chi̍t keng kū chheh-tiàm kap Ko-hiông ê Saⁿ-û chheh-tiàm lau-lau--leh! Ū tang-sî-á ka-tī chi̍t ê lâng ê iû-sńg mā-sī bōe-bái lah!

Tī góa lú-hêng pòaⁿ-ji̍t iû kiat-sok, beh chē kong-chhia tńg-khì chhù--nih ê sî, piⁿ-á chē chi̍t ê a-pô. Góa tō siūⁿ kóng, múi chi̍t ê lāu-lâng lóng ū in ka-tī ê kò͘-sū, tō chú-tōng hām i la-thian.

Góa tō kóng:“A-pô , lí beh chē chhia khì tó-ūi?”I kóng:“Góa beh chē kàu Kok-thài chhī-tiûⁿ lo̍h-chhia!”Liân-āu, góa tō hām i it-ti̍t káng. A-pô kóng i ê tōa-hàn cha-bô͘ sun tī Tâi-pak tha̍k tāi-ha̍k, tha̍k ê hē sī Hut-lu̍t hē. Góa kā kóng ū-kàu lī-hāi--ê! I kóng i hit ê sun nā-sī ta̍k-kài beh tńg-khì ha̍k-hāu, lóng ē kā kóng：「A-má, góa chiok siūⁿ--lí--ê.」A-pô mā ē kóng kâng-khóaⁿ ê ōe.

Kóng--ê kóng--ê, góa khòaⁿ-tio̍h a-pô i bô-tiûⁿ-bô-tî ba̍k-sái tō sûi lìn--lo̍k-lâi, koh kā góa kóng ài ke pôe lín gōa-má, in lóng chiok su-iàu sì-sè ê koan-sim, kóng si̍t-chāi ōe, khak si̍t sī án-ne. Goán a-kū mā ē chiok chia̍p khì chhōe i、pôe i.

A-pô koh kóng, i siàu-liân ê sî sī chò sann--ê, in thâu--ê khah-chá sī cháu siōng-chûn, tī lāi-té mā ū siōng-tong ê tē-ūi. In kū-chhù tī Kî-āu, chit-má sī kiò Kî-tin. Koh kóng siàu-liân sî lóng ē tòe in ang khì gōa-kok, siōng hn̄g cháu-khì「伊拉克」kap Âng-hái, góa thaiⁿ--leh lóng bî khì ah!

Goân-lâi a-pô ê kò͘-sū hiah-nī cheng-chhái, i beh lo̍h chhia chìn-chêng, góa the̍h chi̍t pún Bóng-pò hō͘ i, i kā góa seh-siā liáu tō lo̍h-chhia. Kám-siā chit tōaⁿ kî-gū koh hō͘ góa ū chi̍t phiⁿ bûn-chiuⁿ thang siá, Tâi-gí chhut-thâu-thiⁿ!!

漢羅版

我昨昏家己坐公車去一間舊 kap 高雄 ê 三餘冊店 lau-lau--leh! 有當時仔一 ê 人 ê 遊耍 mā-sī bōe-bái--lah!

Tī 我旅遊半日遊結束，beh坐公車轉去 chhù--nih ê 時， 邊仔坐一 ê 阿婆。我就想講，múi一 ê 老人lóng 有in 家己 ê 故事，就主動 hām 伊 la-thian。

我就講:「阿婆，你beh坐車去tó-ūi?」伊講:「我beh坐kàu國泰市場落車!」然後，我就 hām 伊一直講。阿婆講伊 ê 大漢 cha-bô͘ sun tī 台北讀大學，讀 ê 系是法律系。我kā 講有夠厲害--ê! 伊講伊彼 ê sun 若是 ta̍k-kài beh 轉去學校，lóng 會 kā 講：「阿媽，我 chiok siūⁿ--lí--ê。」阿婆mā 會講kâng-khóaⁿ ê 話。

講--ê 講--ê，我看著阿婆伊 bô-tiûⁿ-bô-tî 目屎就隨 lìn--lo̍k-lâi，koh kā 我講愛 ke 陪lín 外媽，in lóng chiok 需要 sì-sè ê 關心，講實在話，確實是按呢。Goán阿舅 mā 會chiok chia̍p 去 chhōe--i、陪--i。

阿婆koh 講，伊少年 ê 時是做衫--ê，in thâu--ê khah-chá 是走商船，tī 內底 mā 有siōng-tong ê 地位。In kū-chhù tī 旗後，這馬是叫旗津。Koh講少年時 lóng 會 tòe in ang 去外國，siōng 遠走去「伊拉克」kap 紅海，我聽--leh lóng bî--khì--ah!

原來阿婆 ê 故事hiah-nī 精彩，伊 beh 落車進前，我提一本Bóng-pò hō͘ 伊，伊kā 我seh-siā 了就落車。感謝這段奇遇koh hō͘ 我有一篇文章通寫，Tâi-gí chhut-thâu-thiⁿ!!

*刊登tī台文罔報NO.340(2022/7月)