#半度電影空間：《玩轉腦朋友 Inside Out》

突然發現三年前寫下的一篇文字，我想應該要把它搬來這裡。電影後感也好，文字記錄也好。用的是廣東話文字，字裡行間透出一點點稚氣，但，我喜歡。請細看。

(我真係好鍾意套戲，鍾意到好想為佢打d字)

《腦朋友》，一套我半年前睇到trailer已經好想睇既卡通片。

其實開頭只係純粹覺得好得意，點解可以用擬人法用得咁出色？我唔係鍾意靚靚仔仔既公仔，不過對於有symbolic meaning又樣樣衰既野特別無法抗拒。因為我認為人面對既真實的確唔係完美，而當中更夾雜唔係每個外人都可以明白，又或者唔係對每人都一樣既意義。

上畫後既幾個星期，直到琴日終於得閒少少去睇。原本已經聽到好多人一路睇一路喊，而我都心知不妙。一開場已經被叫拎定紙巾，嗯，i'm ready。

其實我已經唔太記得我第一個淚點係邊。第二個應該係乒乓為阿樂犧牲個一幕，時間好短，卻刻骨銘心。而家諗返點解會喊原來都幾複雜。

我唔喜歡鍾意分離。我唔值得別人為我擺上生命既犧牲。我唔喜歡被撇下。我無辦法自己一個無方向地走落去。

縱然係認識一陣子既人，都一樣係親愛的我多麼幸運人海中能夠遇見你。面對生命人既過客，我會選擇盡我能力捉緊佢。又或者咁講，大前提我要喜歡你。我知道無人能夠陪伴我地一輩子，但若果可以，我都想陪你走到最後。

每人都有自己concern既點。受太大的禮會內疚卻也無力歸還 ─ 就係我好concern既一件事。我何德何能要人為我擺上，甚至係生命呢？愛可以愛到盡，不過前提係要愛。

被撇下既感覺確實唔好受。

在我角度，乒乓係阿樂返總部既希望。如果我係阿樂，得返我一個真心走唔到落去。連左右都唔識分既我，應該會同阿愁一樣，攤係地下等人拖行。我其實應該是需要小伙伴的。

依我估計，係我大腦入面建立既小島應該有好多好多個(哈哈，啫係倒塌極都仲有路返總部) 。至於係咩島，確實唔能夠一一數算。應該有友誼島同音樂島，啊仲有電腦島同毒島。

建立小島唔單單只係從小孩子時會做，而係一路長大會一路建立新既島。個人覺得經得起倒塌再重建既小島係最珍貴。不過，大前提係你要有經得起倒塌既不捨同重新黎過既勇氣。

支撐起小島們既核心記憶球，係我睇套戲一直都牽掛住既事。嗯，可能一直撐住我d島既唔係核心記憶球，而係核心記憶人。諗返起好多細個/過去既事，好似每一件重要既事都會有一個代表人物。不論係陪伴我走，抑或係主導我走都好，貌似總係人先會掀動我既情緒同記憶。如果可以真係可以replay，我都想一一重來一次，我的核心記憶。

睇完套戲，我即刻問：你覺得我係咩主導我個大腦？得到既回應係：應該係阿驚。我估應該都係，除非唔係。一再三思而後行，諗過好多後果導致想得太多。我既災難清單應該會有十本聖經咁厚。不過當要做野既時候阿憎會決斷走出黎，快快趣搞掂佢。

個人最喜歡都真係阿愁。除左而家我個頭同眼鏡同佢好似之外，真心覺得佢 好 得 意！原本我都係落入導演既圈套，唔係幾鍾意佢。太麻煩、太蠢、成日搞到d事亂哂、講完又唔記得...到佢使出佢既真功夫既時候，sorry，我已經深深愛上佢。

每人心裡都需要一個阿愁，從而令快樂更有價值，相輔相乘。

成套戲真係好深奧，亦都唔單止講咁少野。我知道、我明白。不過個人比較膚淺、流於表面，個肚又無乜墨水。

(打到咁多已經覺得自己好叻，比掌聲)

有好多野我都好想講，不過算啦，已經打左兩日啦。

2015.8.5