台文寫到這馬的感想／有人佇諍漢字佮拼音
一、換語言佮文字是誠悲慘的代誌
以早，日本人來矣！台灣人換讀日本書，講日語。50年了後，另外一个政權來，逐家閣愛改學講華語，寫華文。彼當陣仔的台灣人誠可憐，尤其是佇寫文章，寫東寫西的人，愛換另外一種語言，是真慘的代誌。
我自2019年開始，佇部落格寫「逐工寫一段」，開始用漢字寫台文，寫６工就停落來，誠久才閣寫一段。
這幾若个月寫較濟，有當時仔日記嘛用台文寫。雖然是換學一種文字、語言，毋過我比進前的台灣人較好運，我細漢的時陣講台語，聽過人講，家己嘛會曉講，遐仔第幾音、變調的，自然就會曉，毋免閣學。
漢字我本來就佇寫，只是另外寫一寡仔華文較少用的字，感覺誠趣味；抑是字雖然仝款，予伊無仝的意思（譬喻：走，緊），一字仔一字學起來就好。
拼音方面，遐仔字母本來就捌，只是鬥起來唸爾爾。按呢是真好運的代誌，毋免自頭開始學起，進步嘛較緊。
會使用字來共喙講的話直接寫落來；看著字，嘛會使直接用台語唸出來，是誠好的代誌，進前毋捌想過有一工會使按呢做。
二、用漢字，抑是拼音寫？隨人家己選
定定有人佇諍用漢字抑是拼音才是「著的」、「應該」的代誌。
其實，每一个人的條件佮基礎攏無仝款，像我，會曉講台語，閣時常用華文寫字，用漢字寫台文，對我來講是筆攑起來就會使開始寫，較無困難的代誌，寫出來，佮人寫會通就好，拼音才閣沓沓仔學；若是囡仔，抑是袂曉講台語的人，學拼音，對in來講可能較簡單，看著音，就會曉唸，反過來講，會曉講的，就寫會出來。
語言佮文字一開始是這箍輾仔的人逐家按呢講，按呢寫，久來就定落來。進前台文沒統一，隨人寫隨人的，這馬台文無彼个機會來沓沓仔寫來寫去，「自然」定落來，規个予教育部的辭典來做標準，逐家才會攏寫仝款的。
字是用來溝通的，逐家看有，講會通就好，愛寫甲偌準，偌正確，偌合理……，逐家才沓沓來撨，來討論、研究，先寫出來才講，寫慣習是頭一件重要的代誌。
逐家用家己方便的寫法。有的人誠𠢕寫漢字，就認為別人袂使用拼音？另外有一寡仔人認為愛用拼音，才是「台灣字」，才會使共台語音準準寫出來，按呢講是有道理無毋著，毋過講出來的「應該」用拼音的理由毋管有偌濟條，只是每一个人較𠢕、較方便寫的就是無仝，抑是無甲意、這馬猶袂欲學……等等的理由，你哪會使用你家己較𠢕的寫法，規定別人愛按怎做？
隨人寫隨人的，有２種字通寫嘛袂䆀。
猶閣有，漢字已經便便佇遐，就借來用，意思會使家己號，抑無欲家己發明「台灣字」喔？袂赴矣啦！就是有人發明出來，逐家嘛愛自頭開始學，無這款的代誌啦！看韓國、日本以早嘛是借漢字來寫；拼音的字母嘛仝款，音拼會出來，逐家會曉唸就好，管伊是佗位來的？
