幾若禮拜進前，佇面冊看著一篇文章，咧講紅肉李佇產地，用竹篙拍下來的一斤７元，作者鼓勵人去做酒，嘛講著佇超級市場賣的有揀過，一斤幾若十箍。
幾若工了後，閣看著一篇，講一斤７箍，請人挽，一工的工錢偌濟，一个人一工會使挽幾斤，賣的價數無夠工錢，有的農民無挽，囥佇樹仔頂予伊爛，是按怎遐爾仔拍損，辛苦種作的農民嘛可憐。我開始去買來食。
我想著我細漢的時蹛宜蘭，一年中間有短短幾若工會食著紅肉李，伊當陣仔，我聽人講的，想做是「阿媽內裡」，毋知影這佮阿媽有啥物底代？是做阿媽的人愛食的？我就是綴人叫。
我的查某囝小學的時，有一工聽著伊對伊的小妹咧講：「紅肉李」，我才知影原來是「紅肉內李」，是李仔的一種，毋是「阿媽」，我心內感覺誠好笑，毋捌去問別人，是按怎叫做「阿媽內裡」？
我大漢了後，誠少買來食，共伊袂記得，嘛毋知影大查某囝是自佗位捌這種李仔？
我佇超市買一盒，提轉來了後，無冰，囥佇外口，我愛食較軟的，揀一粒軟仔來食，其他的杳杳仔變軟，軟的是甜的，無酸。本來一擺食一粒，幾若工了後，想講遐細粒，應該無50公克（秤食物的細秤仔歹去，無閣買，無通秤），我查紅肉李半份糖會使食80公克，就食２粒，仝款一工２擺。（我先寫佇糖尿病社團共逐家講，紅肉李會使食較濟，一般的果子，半份糖是50公克）
前幾若工，糖尿病回診，醣化血色素變懸，我食的飯佮菜攏仝款，可能是最近加食果子仔，平時無食果子，省去算in的糖量。閣變轉來一擺一粒，改做中畫佮暗頓食，因為早頓飯前的血糖會較懸，這擺醫生講的，閣加荷爾蒙、肝糖，我這２工逐頓量，有影，早頓加食紅肉李，飯後的血糖較懸。想著一个辦法，果子早頓袂食，改中畫、暗頓食，中醫講日頭落山了後，袂食生的，暗頓愛較早食。
紅肉李較軟了後，毋但甜，嘛有其他的芳味，這是進前無注意的，皮嘛袂苦，同齊食落去，「全食」。
