▉二戰了後，佮1949年對中國來台灣的人大部份是公務人員、軍人、學生、一寡仔生理人，攏是有錢佮有關係會使坐船來台灣的，有讀冊的較濟，一般的種田的農民佮做工的人無法度來。二二八開始，共台灣的讀冊人刣死抑是關起來，反倒轉來講台灣人無知識、程度低，外省人較高級。
▉蔣政權占領台灣了後，改語言佮文字，本來攏有讀公學校的台灣人變做「毋捌字」的人，愛自頭開始學。變做外省人較𠢕寫字、寫文章、講話，話欲按怎講、文章按怎寫，攏是in咧講的。
▉其實台語有字，進前台灣人用的字有３種：
￭漢字
我的外公兜是好額人，阮老母講，日本時代的時，外公咧教漢文，應該是民間請伊去教的。
古早冊台灣人用台語讀，用漢字寫文章，台語歌、戲齣的劇本嘛是，會曉台語的人攏看有，干焦用字沒統一爾爾。
我以前咧寫古早背景（當然是中國的，唉！）的小說的時，共一寡仔歷史的問題去問一个歷史研究所的博士生，他有講著「方塊字」，中國各地無仝款語言的人攏會使用，我才知影為什麼傳落來的是「文言文」，干焦共主要意思的字寫落來，其他的（親像介繫詞、連接詞……）、各地講法的字攏無，親像廣東話佮台語的一寡仔字，予其他語言的人看就毋知影是啥物意思。
￭白話字
外國的傳教士用羅馬字共台語用拼音寫落來，叫做「白話字」，有出版報紙、冊，後來咧推行華語（國語）的時，予政府禁止。彼个刊佇報紙頂，宣佈禁止白話字的影印，我無留落來。
￭日語、日文
一寡仔日語已經變做台語的一部份。
我欲講的是，日本時代有去學校讀冊（日本冊），後來較有學問的台灣人用日文寫文章，因為咱毋捌日文，毋知影in進前做過啥物代誌、有啥物想法？除非有人研究、翻譯，咱才知影一點點仔。
▲遮仔台灣原本有的文字，咧國民政府時代，因為欲推行華語，毋但日文無閣用，白話字嘛禁止，學生嘛無閣用台語讀漢文冊，後來的人攏袂曉，毋捌以早的人寫的文章佮冊，除非特別去研究。
後來的台灣人無法度用以早留落來的冊佮報紙、雜誌來熟似以前的台灣人佮台灣事，毋知影in進前做過啥物代誌、有啥物想法？除非有人研究、翻譯，用華語寫出來，咱才知影一點點仔。用華語寫旳人，in揀in欲寫的部份，用的是中國的觀點，佮咱直接去讀原本作者的文章是無仝的。
對以早台灣的印象，干焦一句「日本時代」就結束，干焦聽著厝內面的人講一屑仔進前的代誌，離開這个田庄的代誌就毋知影，上重要的文字紀錄咱攏無看著，攏接收國民政府教的物仔，歷史、地理，連傳說佮囡仔古嘛是中國的，毋是台灣的。這个對捌台灣的大斷層，我最近才想著，彼段日本時代的歷史紀錄，對現代的台灣是足重要的，傳教士訂出來的白話字寫的嘛是。
這幾若年，出現的資料較濟，美術、音樂、文學種種有成就的台灣人的生平、資料杳杳仔寫出來，尤其２月28開始，一工寫一位彼工死去，抑是失蹤的人……
我以早讀圖書館系，做圖書館的工課，攏知影「冊」是記錄、傳播文化上重要的物仔，無想著，咱這代無好好去利用冊（日文、白話字的冊）的功能，嘛無人講這件代誌，就直接去接收中國冊寫的，種佇咱的頭殼內底，閣是一聲「唉！」
▉所以「意識」上重要，意識愛行頭前，無你拍拚歸世人，是咧拍拚啥物？方向若毋著，意思攏無仝。
我的想法按呢寫，有講清楚無？看有無？就是咱無法度直接看以前台灣人寫的物件，毋知影in做過啥物代誌？咧想啥？佮咱這馬的台灣有啥物關係？
（2025.6.24.）
