是啥物款 ê 味素 hōo 有體無魂 ê 柴頭尪仔步頻詩人神魂入體 uī 伊 ê 早起頓做詩?
你是我 ê 火，你是我 ê 神魂，你是胃腸 ê 愛人。
「我 ê 手藝無遐爾仔𠢕，總是我愛 Ode to Bread(Ode an das Brot)。」「你是我 ê 胃腸，我 ê 麭。」
搝線 tī 北爿 ê 柴頭尪仔目𥍉仔按 Pinocchio 轉做人 hōo 我 buē 慣勢，隨 bueh 六月蚶，開喙臭，兩片澹澹掛燒烙 ê 鬆軟疊 tī 我 ê 喙脣講「你 mā 是我 ê 詩。」
咱有暗時食西瓜，半暝仔反症，gún 兜有柴頭尪仔透早食麭反症做詩人，甜粅粅。
這敢是鴟鴞出世捌雞栽，窗仔刻花好運來？𠊎毋知，毋過𠊎知著這是時做藥，六時做石，魔王嫁查某囝，假鬼假怪愛細膩。
「多謝你 ê 迷魂湯」我笑應。
柴頭翁是敵人，不過我猶原愛這个可愛 ê 敵人。
我真痟，我知影。
交紅白草花、林檎是窒倒街菜蔬 ê 紅菜頭，寒人漲懸價加加漲甲 1€ 就盡磅，今年一公斤漲甲 bueh 2€ hōo 我掠做德國欠糧草欠甲賰有機紅菜頭通 bué。
紅菜頭 tī 臺灣算枝秤斤賣，德國紅菜頭是算斤一包賣，罕得行入食飯桌 ê 紅菜頭是徙岫到德國 tsiah 開始勻勻行入食飯桌，因為一年迵冬 buē 欠貨 hōo 我食甲厭𤺪生菇 mā 照飯頓食。
今年 ê 紅菜頭五時做藥，六時做石，這禮拜落價，後禮拜漲懸價，m̄ 管商人按怎妝娗價數，一公斤無踅翻頭轉來到烏露戰爭一開始 ê 0.89€，伊是唬秤頭，臭膎閣 m̄ 除鈗。
2024 交換手 hōo 2025，德國 ê 紅青燈政府看起來 mā bueh 踅翻頭轉來紅媠烏大範政府，無 tshan-tshiūnn 番薑仔、瓜仔哖愛食電 ê 紅菜頭又閣踅翻頭轉來到一公斤無到 0.89€ 甚至 2 公斤 0.99€ 食到吐 ê 價數 hōo 我隨走百米傱超市捾一袋轉來囤，起因孔子公 m̄ 敢收人隔暝帖，德國能源政策無人知機這久 ê 推廣明仔載成做烌。
早前推廣 Gá-suh、石油燒氣講伊環保閣儉錢，烏露戰爭一開始講伊製造二氧化碳閣伨惡霸愛禁止，gún 兜是稅人厝，厝頭家 ê 洋爐是裝電燒氣，對面人家厝配合阿梅政策齊換燒 Gá-suh 佮石油 ê 洋爐用無到二十冬又閣愛換款 hōo 𪜶氣唿唿講這个青紅燈政府是六面骰仔，佔無半面，一屑仔攏無道理。
德國能源政策有𪜶家己 ê 政策，我這个外國人無彼个才調食喙三炮兩炮，總是面對比海洋閣較𠢕變化 ê 物價無做 Gá-suh 爐頂 ê 茶鈷呻一下 buē 用得。
「恁政府 ê 能源政策閣按呢舞落去，極右派 m̄ 免拍廣告就自動成做恁 ê 扞權者」當我 mā 跟綴德國人成做豬仔鼠 tī 超市猶未開門就徛衛兵徛好好 mā tī 超市一開門隨搶紅菜頭轉來出菜，無呻幾句 hōo 翁聽，齪齪 ê 中氣 buē 得敨。
往過三講，四 m̄ 著齊是別人害伊講 m̄ 著 ê 翁擔一下仔肩笑講「Gún 就是目睭看 tī 粿，跤踏著火 ê 愛激氣。」
Gún 翁是支持核能電廠廢除 ê 人，伊 mā 支持廢核能電廠廢除政府 buē 使得起電價 ê 人，這款食魚 m̄ 掠魚 ê 想法 hōo gún 不管時 uī-tio̍h「電」冤家量債。
「你煮麵敢愛煮到 8 分鐘？敢無法度 3 分鐘就煮好？」
「你敢愛逐日洗魂舒，敢無法度一禮拜 tsiah 洗一斗？」
理想捙拚 buē 過現實 ê 伊，只好 kā 理想接枝到平素要求牽手莫遐捷用電，我會使得無使用電腦、手機仔遮 ê 電，總是飯頓愛用電敢 m̄ 是？
Uī-tio̍h 伊 ê 理想交伊無法度捙拚 ê 現實冤 bueh 冬外，一日我總算智慧生想著會使得按怎回應伊 ê 交繃「目今 ê 變化是你自願選擇，無人逼你，像我個人是反對廢除核能電廠 tī 臺灣猶未揣著適合 ê 替代能源進前我是反對磅核能廠，起因我清楚知機家己 ê 手骨無遐爾仔粗」這个屬於伊 ê 激派頭愛地球就是愛支持核能廠廢除 ê 交繃 m̄ 閣唱歌 hōo 我聽。
今仔日 uī-tio̍h 紅菜頭零下 2 度 mā 下性命去徛衛兵交德國人捙拚 Tsiâ ê 喙䫌較𠢕楔物件，頭殼 mā 順街仔路金光 tī 烏暗磅空揣食譜。
Tsa̋ng 顧 bueh 搶紅菜頭 buē 記得安排透早 ê 早起頓，時間賰這節仔通使用，愛款啥味素來飼脾土？
厝內有白煠卵，有切絲 ê 紅洋蔥...猶 teh 歇暝 ê 海馬敢若聽著我 ê 話隨精神泅去往過 ê 喉韻。
啊，呔無想著你敆我心脾敆甲峇峇峇，ich liebe dich ê「紅菜頭寮仔 Tshì-sù 抹醬」。
