「我 tuì 朋友講目今 ê 我真罕得食肉，我 ê 四常沓沓仔行向 Blue Zones」兩工一暝無誠懇睏鬥陣 ê 翁，人猶未踏入社區花埕隨 tuì 徛踮磚坪做日頭花 ê 我分張伊兩工一暝 ê 臭頭仔包布，防蠅代(風神)。
「你確定，你罕得食肉」我手那指花埕表示入來 tsiah 風神 mā 外甥仔點燈火，一切照舅（舊）「Bist du sicher 你確定」ê 造句。
「至少我無翻頭匪類揣轉來 ê 健康」伊自信閣驕傲 kā 話擲向熱唿唿 ê 金烏，斡頭成做展翅 ê 孔雀勻勻仔伐入社區花埕。我順伊愈搝愈短 ê 烏面賊 mā kā 冬前 ê 記持沓沓仔搝來眼前「醫生保健康，無保一世人，行過這逝交死神相借問 ê 日子我愛鏨薰、酒、甜粅粅這三毒。」我順翁 ê 話泅入彼暝 ê 食飯會，擔一个肩崎一下仔頭向金烏說道謝，斡頭伐入厝內開門等候 tī 𪜶「爸母問題」是 A-ta-mah-khòng-ku-lī 兼執硬(tsip-ngē)歹參詳，tī 身體照顧這部份 mā 是硬鼻不而過是好討論 ê 翁。門一拍開見著牽手徛踮玄關等伊，掣一大趒 kā 手搭胸坎講 1,2,3,4 驚甲無代誌，紲落來 kā 手捗搭 tī 我頭額，見伊有樣看樣，綴牽手按呢耍，我笑甲痚呴疼講「我無食老出癖，不而過我需要知影你敢有需要我 kā 你款飯頓？」
「H 有款 Strammer Max hōo 我紮踮路食」我 tìm 一下仔頭表示理解，「我 bueh 食冰淇淋你敢有興趣？」
「當然 mā 是興趣趣」伊笑甲裂獅獅那換衫 mā 那分張伊向望「咱敢會使得 tī 磚坪有樹蔭 ê 角勢享受咱 ê 下晡點心？」
「彼當然 ma 是大丈夫，我 ê 興趣無包括獨裁」我刁意故 tī 相觸雞仔觸甲外太空後 ê 平靜 kā 譬相𪜶爸母 ê 話閣一斗捎出來講出來。清楚知機萬事齊好參詳兼尊存伊個人意愛 ê 牽手 buē tuì 𪜶爸母帶 hōo gún-ê 衝突讓步，伊選擇恬靜，畢竟伊家己交𪜶爸母 mā 是門扇枋鬥 buē 峇。
玻璃罐仔滴幾滴 Lê-bóng 汁，法蘭西水斟 hōo 飽滇，見翁已經祀佛公 tī 磚坪等我，冰淇淋一人 100g 入透明玻璃碗，切好 ê Lê-bóng 瓜一人 mā 100g，紲落來掖寡椰子肉寬寬仔按廚房划向磚坪，享受兩人罕得有 ê 下晡點心時間。
「H 講今年 ê 我看起來比頂冬看起來氣象閣較好，而且體格愈來愈媠」交我做陣罕得有下晡點心，伊若得著珍寶 kā 若狗食飯 ê 速度換做樹趖 ê 速度享受手頭清涼 ê 冰淇淋。我無紲話恬靜聽伊 ê 分張。
「H 講一斗愛改薰改酒改甜粅粅 hōo 伊 ê 人生過甲誠無色彩，所致伊又閣翻頭食薰，然後逐禮拜去運動中心做一斗運動。」
H 三冬前準備出門上班胸坎開始微微仔搐疼，伊隨敲電話 kā 公司請假 mā 隨傱病院，然後歇 bueh 2 月日 tsiah 轉去上班。德國人注重個人空間，伊出院 gún mā 無專工去攪擾，一直等到迒過年 tsiah 交伊見面聽伊分張心梗窒帶 hōo 伊 ê 改變。
我個人 m̄ 知影搪著心梗窒 ê 人 tī 閰王暫時拒絕收𪜶入殿後，𪜶 ê 四常有啥物變化，總是順 H ê 分張交迒過年 ê 觀察，伊交向時猶原一模模一樣樣無啥變化，除了薰確實無閣捎 tī 手指頭仔，賰 ê 齊相𫝛。食重油、鹽、鹹、甜，飯頓無菜蔬，準做有 mā 是一包 125g ê 地中海生菜 4 个人分，然後三更半暝 m̄ 歇睏。
H 講少年時 m̄ 捌有睏眠問題，年歲愈來愈像 Whisky 伊愈來愈僫入眠，我順德國醫學節目分享搝 H ê 睏眠問題，我想伊交 gún 翁相𫝛只要食食慣勢改變，困擾伊 ê 睏眠問題 mā-ē 得著改善，總是 H 交大多數 ê 德國人相𫝛依賴德國醫療，簡單一句四枝釘仔未霆 m̄ 知哭，是講準做四枝釘仔霆甲若雷公 mā 是有話通講，像 H 改薰無到冬外隨揣著理由來合理醫生千交代萬交代 ê 薰愛禁。
恬靜聽翁分張向時開錢冇手甲若阿舍無看價數 mā 頓胸坎講準講伊提早退休，伊貸款 30 冬 ê 厝 mā buē 受影響，這久卻開始 uī-tio̍h 向時 ê 冇手轉做目今需要斟酌 ê 窮斤算兩交做陣二十外冬 ê 男朋友 teh 無歡喜。我 kā 最後一喙綿甲若天頂白雲 ê 冰淇淋送入喙講「幻想永遠 hōo 人疼，讕頭永遠 hōo 人相信。」
翁無出聲 kā 倒手伸過來搭 tī 我 ê 正手，我知影伊 ê 14 越頭微微仔 tuì 伊笑講「我 ê 藍區 9 力量雖罔 kan-na 7 力量，不而過我個人認為已經真夠額，起因 gún 翁就是我上好 ê 社群，至於適當食寡酒保健康，我個人認為這無一定，畢竟每一个人有家己 ê 喙斗。」
「歐洲真早就講食酒無顧健康，所致藍區 ê 這條我個人 mā 放伊自由，不而過我愛講無媠某 ê 鬥相共，藍區 9 力量除了社群連結好實踐賰 ê 僫實踐。」翁甜甜仔分張伊 ê 想法。
藍區 9 力量是啥物？
- 規律運動
- 信仰
- 心 ê 筅黗交充電
- 食八分飽
- 原形食物
- 適量 ê 食酒
- 歸屬感
- 親人永遠排頭名
- 社群連結
整理猶未記錄 ê 食譜聽翁分張 H ê 狀況交伊提起 ê 藍區人生 hōo 我想著這份食譜 ê 花豆、白鳳豆、番麥是五穀抑是雜糧？起因現代醫學愈來愈發達 mā 愈來愈 hōo 我挐撆撆捎無一个寮仔門，食一頓飯 mā 無法度 tshan-tshiūnn 向時自在，畢竟天增歲月人增病，特別是生活 tī 富裕環境 ê 新陳代謝症。
Uī-tio̍h 筅這个黗我順翁 ê 藍區請教網路眾神，眾神 hōo 我這个答案，五穀是米、番麥、秮仔、麥仔、豆仔，雜糧是𠕇果。順眾神賜 hōo 我 ê 答案，gún 兜 ê 食食慣勢確實有達成藍區 9 力量 ê 食八分飽交原形食物。
藍區人生 tuì 我來講是人生態度 ê 實踐 mā 是 90% 快樂閣自在 ê 未來投資。
