公視台語台 S4EP11 - 出名人請借問 - 台語話恐龍其中一段話 hōo 我想著咱是 bueh 生湠語文抑是限制語文 ê 過了代 mā 想著早前孤一人 tī 法國 ê 見笑代。
過了代 ê 記持無興閣熥，法國 ê 見笑代會使得提出來剾洗家己並跟綴伊繼續楦闊家己 ê 語文區。
教育部臺灣台語常用詞辭典 kā 馬鈴薯號做馬鈴薯(Má-lîng-tsî)，我就跟綴這个新辭 kā 伊記錄 tī 遮，總是這个辭 tuì 我個人來較講屬口語用真無愛使用 tī 書寫用辭，所致顛踱（thian-tho̍h）百回猶是決定成做無合群者 kā 伊號做塗肉林檎。塗肉林檎這个辭按法語 Pomme de terre 轉化，意思是塗內 ê 林檎，塗內 ê 林檎 mā 是我上早使用 ê 辭，甚至 kā 伊生湠 ê 故事寫做一篇拙文投稿刊登 tī 台文世界。講著投稿這件代 tī 我停止投稿 ê 這久翻頭 kā 看，正港是豬屎籃仔也捾出來品並 ê m̄ 知愛見笑。是講準做按呢我猶是享受彼段愛投稿 ê 日子，因為這个愛展 ê 風神 hōo 我揣著交家己鬥陣 ê 方式交按怎寫部落格，並 tī 這个過程我得著洗汰無愛惜命命卻綿爛成做滓 ê 萬項代，像磕 buē 著就愛哭呻 gún 翁𪜶兜爸母代 ê 魔神仔已經立地成佛。
台語是我自囡仔講到今 ê 語言，tī 我猶未我口我寫進前我一直掠做家己 ê 台語有夠額，畢竟轉去臺灣交人冇談我 ê 台語 m̄ 捌出現講德語 ê 㧎㧎，抑是揣無對應句。自我口我寫我 tsiah 發現 m̄ 是揣無對應句是我慣勢以華語取代，像去菜市場見著「Zucchini」本底 ê 皇宮菜按怎賣，菠薐仔按怎賣，一輪意愛 ê 菜蔬名照台語一路順甲不可思議請教結束，換彼个德語 Zucchini 英語 Courgette 齊 ē 曉講 ê 伊成做台語隨糝寡華語 tiàu 味「頭家彼櫛瓜按呢賣？」
Tī 教育部臺灣台語常用辭典猶未改版進前我真罕得向伊請教講法抑是寫法，罕得請教 m̄ 是我反對伊 ê 號名，是伊 ê 版面 hōo 不到 40 歲就有老人目 ê 我愈看愈眵目，性地一夯規氣莫請教，不而過自伊改做白牡丹 ê 色緻，伊成做書寫 ê 好姊妹仔伴 mā 成做 tī「荷蘭薯」交「馬鈴薯」選擇之間上重要 ê 決策者。
Tī 我罕得向舊版教典請教智慧生彼時，我順法語 Pomme de terre 交奧地利德語捷用 ê Erdapfel kā 馬鈴薯直譯做塗內 ê 林檎，自我開始好玄這个詞敢有別 ê 講法就不三時上網請教新版教典，塗內 ê 林檎轉做塗肉林檎，起因我想著德國 ê 馬鈴薯改革 --- 塗肉問題無解決，馬鈴薯就 buē 千年根萬年藤，番薯 m̄ 驚落塗爛，只求枝葉代代湠。
這幾日氣象報告分張寒露 ê 法國天氣猶原好甲若熱人，tī 德國已經開始包肉粽 ê gún 隨上網揣敆錢袋仔 ê 民宿，紲落來渡萊茵河探訪現此時改做 Grand Est ê 亞爾薩斯交洛林。
食飯無愛田螺循舊逝，較行 mā 仝逝 ê 我 tuì 蹛過 ê 所在有一款無法度無循舊逝 ê 感情，所致 tī 若天星點點通選擇 ê 柴杙鄉鎮，我猶是選擇 Greffen 這个比 hōo 大牛換肩 ê 舊厝閣較庄跤 ê 角勢坐渡船過法國。
十外冬前騎孔明車坐渡船過萊茵河去踅 Super U 抑是 bué 法國棍仔麭，外表是德國味神魂是法國氣味見經過見無看著一隻貓仔狗仔 ê 餐廳，猶原無半隻貓仔狗仔規欉好好一切照舊 kā Menu du jour 𫞼 tī 門口，歡迎人客。十外冬前掠做這間餐廳提供 ê 無食市，這久理解 m̄ 是伊無食市是我行 m̄ 著時間。
「我 ê 法語到今猶原無一个字進步，不而過我捌這个詞 Pomme de terre m̄ 是恁 ê Pommes」斟酌 kā 今日菜單巡一遍，規个字母拆開我讀有鬥做伙賰塗肉林檎交我相認講 hōo 翁聽，翁笑甲反肚講「確實是仝款無仝師傅。」
十外冬前翁猶未向公司申請到大城服務，來德國交伊談戀愛 ê 我只要 kā 時間過甲若臺灣 ê 自在，紲落來就愛 kā 日子過甲若軍隊 teh 行軍，孔明車隨騎去渡船口過萊茵河去教會力量無德國強大 ê 法國 bué 菜。一回踏孔明車踏甲凡勢踏甲傷過認真 hōo 我半路大腸告小腸無食一个啖糝止枵無法度轉去德國，就揣一間 tī 逐家猶 teh 睏中晝伊猶 teh 開門 ê 餐廳止枵。
法國菜單無相片，無英文交走桌人員 kan-ta 講法語是頂港有名聲，下港有出名，這久 ê 枵無翁通鬥相共，我只好 m̄ 捌字，靠親情，德語食食透濫 tsuē-tsuē 法語，這个 Pomme 合該然是德語 ê Pommes，隨手指落去，工作人員無應話 tìm 一下仔頭，紲落來反飲料 ê 部份 hōo 我選，無啉咖啡無食酒 ê 我䀐一目隨講「Cola」，走桌人員 hōo 我一个這久翻頭想合該然是「M̄ 捌貨」ê 表情隨離開。紲落來 ê 時間 hōo 我決定日後若閣日子過甲若臺灣 ê 四序，出發法國進前我愛家己紮寡四秀仔止枵。
一个 Pommes 欠 S 來鬥陣隨一丈差九尺，伊按我認為 ê 鹹味轉做甜味，走桌人員 hōo 我 m̄ 捌貨 ê 表情，林檎雞卵糕無敆酒至少 mā 愛敆一杯咖啡。
三工兩暝 ê 大東部行跤花結束轉來到厝，雄雄想著櫃仔有一箱蓋布 ê 林檎隨 tuì 翁講「我 ê 部落格有一張相片 hōo 我看甲鑿目，這幾日 tī 法國行跤花食交恁相𫝛 m̄-koh 卻 hōo 我 m̄-nā 是喙食閣目睭 mā 綴 leh 食 ê Kebab, Pizza，我知影按怎解決我 ê 鑿目矣。」
「你出 ê 菜交法國出 ê Kebab 相𫝛，我攏愛食。」，喙白老嬰 ê 褒嗦，一耳入，一耳出，m̄ 通傷過認真，喙白老嬰搪著出菜彼日所講 ê 話 mā 證明我 ê 種珠是百分之百 ê 正確。
「林檎敆菜擴敢 ē 食得？」喙白老嬰目頭結結 tuì 我講。
「你進前捌食過，你認為--leh？」我 kā 問題送轉去 hōo 伊，伊知影家己又閣 hōo 爸母上童隨轉喙「這碗湯宛然 gún 阿媽煮 ê 湯，有夠好味素。」
伊 ê 阿媽敢捌煮過這碗湯？我無興趣做𣁳塗機，起因伊 ê 阿媽若真正遐爾仔𠢕款食，伊兜勥母合該行向 Hape Kerkeling ê 食食路途，𪜶兜勥爸 mā 絕對 buē 接受一年 365 一切照舊 ê 田螺人生：麭、果子醬、加工肉、加工煙腸、Tshì-sù 交永遠 buē 變化 ê 甜路 1. 糖厚甲若北極冰山 ê 雞卵糕 2. 糖厚甲若北極冰山 ê Bá-tah 餅，紲落來看𪜶牽手食譜冊疊甲火星去，煞 m̄ 捌出過一出菜，只因為伊認為伊是世間上𠢕扞鼎 ê 𠢕人。
林檎交菜擴攏 m̄ 是我上愛 ê 菜蔬果子，不而過當𪜶成做芋仔番薯，我佮意。我遮 ê 芋仔番薯是花蓮薯彼款 ê 敆喙 m̄ 是農業智識無夠額自願行入「芋仔番薯」號名囮 ê 紫心番薯。
馬鈴薯 tī 德語猶有這款講法：1. Erdbirne 2. Grundbirne 照字直譯是塗肉梨仔。
