《大士爺厚火氣》第二十集：鴨仔

田庄的景緻真清閒。

挩窗和哈囉自駁岸落田岸，看著鴨仔佇湳仔地耍水、吮毛、叨杜蚓，結做規大陣拋拋走。黃錦錦的光撒落來，舒踮爛塗佮水堀仔，鰗鰡、鱔魚有時躽有時翸，挑俍的天篷看袂著頂。塗面下跤的鴨母坔，有影是曠閬閬、活跳跳。

「喔⋯⋯真四序，自從予人⋯⋯毋著，予神，去予胡蠅騙來打貓，我閣毋捌歇喘過。」挩窗大伸勻。

「你閣真𠢕共我譬相，囡仔人有耳無喙！」哈囉懶懶，覆踮塗跤，共烏焦的尾溜吮吮咧。

「哎⋯⋯代誌舞遮久，愈補愈大空，毋但無共鬼王掠落來，閣關佇咧塗跤底走袂出去，我欲來唱〈心事啥人知〉：『踏入打貓界，是阮不應該；有時想反悔，阿媽袂諒解⋯⋯』」挩窗的歌聲真無奈。

「你唱毋著條去矣啦！你看，面頭前是古早時的鴨母坔，飼鴨仔的湳仔地，人食飽閒閒無代誌就佇遐踢鴨仔，田庄好光景，自在又逍遙，咱就來唱葉啟田的〈內山兄哥〉：『阮就是青春的內山的兄哥，七八早就出門，準備欲去巡田園。正手攑鋤頭，倒手捎畚箕，行路輕鬆有元氣，行到我的田園邊⋯⋯』」哈囉歌聲真輕鬆。