《大士爺厚火氣》第十九集：水燈

挩窗衝出去，面頭前的車頭愈來愈粗、聲音愈來愈吵，伊欲去揣爸爸，駛砂石仔車的爸爸。挩窗目睭褫大蕊，駕駛座頂頭竟然是骷髏，目睭窟仔烏巴巴，頂懸槽和下跤槽的喙齒直直齧，啊娘喂！遮恐怖！

挩窗欲赴閃，砂石仔殘殘挵落去。

煞恬靜無聲，車頭碎屑屑，成做一粒一粒的光，袂輸火金蛄，佇暗毿的烏龍磅空勻勻仔飄、自在咧飄，飄啊飄，抾啊抾，牽一條光河出來。

「哇！有夠媠！」挩窗比讚。

「媠啥貨！了然啊！咱行過頭矣啦！」哈囉細伐去頭前，共烏焦的尾溜伸長，撞落去，夯懸懸，澹漉漉。

「你怎會知影咱行過頭矣？」挩窗那問那擽頭。

「無看我的尾溜澹去矣！咱頭前是大排水溝，下街第二工放水燈的所在。是你人間的民雄文化路對南爿去，騎虎王爺廟直直挵，行過定定發生車禍的死亡大斡，欲到鴨母坔進前的文隆橋下跤，就是這條溝。」

「所以頭拄仔磅著砂石仔車彼搭，就是死亡大斡？」

「著啦！你去予幻影騙去啦！若毋是我猛醒，用爪仔共死亡砂石仔車拆破，你就會予幻物劫去，按怎死的攏毋知！」

「多謝哈囉！再次救我這條小命！」