病

愈讀彼張批，伊的目箍愈紅。感情的池滇--起-來，目屎輾，規面洗，四淋垂。

我毋敢講話，身軀直直坐佇膨椅頂，恬恬聽大廳吊鐘規律的拍phik聲，佮，不三時珠淚磕批紙慒心肝的滴答。

有風，huê過阮的頭鬃，大片的玻璃窗仔予斜西的溫暖日頭光走入--來。是暗頭仔，我應該來走--矣。

「先生娘！時間無早--矣，我愛先來去。」我起身，kha-báng捾咧，毋敢閣加共伊攪擾。

「你桌頂彼甌茶，一喙都無啉。」

我愣一下，閣坐落--來。

「30外冬過去，我也歡喜甘願--矣！伊欲轉去台灣共伊少年時代袂赴做的理想實現，我也做伊去。牽手一世人，晟養囝大漢嘛已經大學出業，無啥物通好遺憾，無啥物通好怨恨。...想袂到...是按呢的結局...」伊的目箍hàng，慼心慼聲，「林--先-生，感謝你專工提這張批來...」

陳教授in兜是我傷心旅途的上尾站。轉來到旅社，天色已經暗，賰無六點鐘！

佇我往過讀冊的時陣，陳教授佮我就是忘年之交，是恩師也是破腹好友。佇美國提著博士學位，做五冬外的博士後研究員，一直到轉來台灣的大學教冊這幾冬，阮的連繫毋捌斷--去，無論是人生抑是研究的課題，伊啟蒙、引𤆬我濟濟！

過去的三冬攏無伊的消息，我共佇美國的先生娘佮伊的後生探聽，嘛是霧嗄嗄。逐家焦心扒腹，四界揣無線索。先生娘講伊煩惱甲袂食袂睏，in後生講阿母仔無半冬就瘦十外公斤，家己的白頭毛嘛加幾若撮。無人予阮一个交代，教授就按呢無--去？

這，凡勢是上好个結局？無拍算我提著彼枝鎖匙...

我坐踮倚窗的桌仔頭前，面對電腦，心臟噗噗筅，倒手掠正手，猶咧掣，無法度拍字。這天大的祕密我按怎來共含吞？

我的頭殼咧欲爆發，烏白想，無法度踏擋...

教授已經死矣！

伊名聲真透，死了，逐台電視新聞攏有報。In攏講伊過去三冬覕佇山裡咧做lè-táu的研究，因為注神過頭煞攏無佮外界有消息連繫。啊！今，我知彼是用來掩崁真相的白賊新聞，毋過彼時，我是相信按呢嘛才會當接受伊的過往！緊敲電話去美國，報先生娘in斟酌台灣的新聞 - 我佇這爿感覺會著伊佇彼頭咧ge̍h-ge̍h顫：「無可能！伊無可能是無顧家庭的人--矣！」

這是一冬前的代誌...

這馬我心已經狂，決意欲共我知的一切攏寫--落-來！伊予我知的祕密，一年來我一直忍耐藏，咧燃心肝；總算，橫心欲來掀開這个罩，予逐家了解真相，予逐家知影驚惶，予逐家明白，咱猶有希望？！毋過，教授个真名我袂使講--出-來！掩崁伊的名，按呢佇我欲搤開的祕密內底閣hânn有一个最後的祕密，檢采人就袂傷認真看待這个故事，凡勢阮的性命會有保障？

我煞一直佇12樓的房間內底空坐！盡想一寡家己無法度鬥甲齊的，無蓋重要的tshih-tshuah代。阿！總--是，愛來做正經代誌較著，佇我離開這个mǹg-sǹg四界傱的世界進前。

3、40冬前，台灣社會非常平和。社會中逐个人的思想差不多，價值觀差不多，行為嘛精差無濟。佇這款平和的社會內底，經濟起飛，是一件誠自然的代誌。按怎講--矣？因為這款社會內底，政府官員掠外，百姓人攏骨力咧討趁 - in無拚勢做，未來的美夢就袂準信。逐家拚勢做，無人會有較特別的成就，「愛出頭，gâu缺角」- 這句話袂輸真理，佇平和的社會內底四界流傳。

雖bóng有彼款叫人毋通出頭的講法，毋閣，巧人gâu挵無人通擋。Hui--a就是這款巧人。

3、40冬前，台灣干焦少數人有才調出國。遮的人內底，有一大捾是生理人，in算是巧人的一種，gâu挵，gâu軁，有機會就四界liu，出國替台灣趁外匯。Hui--a，伊是另外一款人 - 留學生，這个身份佇彼時是稀罕閣難得！若毋是厝裡有錢，抑是身份特殊，想欲離開台灣去別國讀冊，就愛骨力考試，去共政府分彼號獎學金。

獎學金其實毋是拚勢去考試就分有。Hui--a共我講，伊有考二擺；第一擺的獎學金考試名義真龜怪，Hui--a想講試看覓嘛好，就去報名，結果連考都無通考，直接hông講伊資格無合，失格！Hui--a彼陣少年，伊知後擺閣有誠濟機會，就無共這件代誌囥踮心肝頭；放榜的時伊才小可去影一--下，名額干焦一个，嘛干焦一个人考牢；後來伊才知，彼擺都干焦一个人報名成功會使考試。隔冬閣一擺的獎學金考試，Hui--a選一个名義普通的科目報名，「欲來考這个科目的人不止仔濟，戶橂較懸，欲迒過無遐簡單。」Hui--a按呢想，結果，伊煞第一懸分考--過，提著三冬的獎學金，通peh出深井去看外口的世界！

Hui--a出國是去學醫學。伊的意志真堅定。伊講：「台灣醫學實在落伍，我欲來學先進的醫學智識，轉來咱的社會貢獻！」伊按算去遐全心拍拚讀冊，緊出業，緊轉來，按呢厝裡爸母有面子，家己佇社會中嘛好徛起。「醫人醫心醫社會！」，彼陣伊當少年的心無驚惶。

Siâng知？伊這一去就欲30冬！轉來到台灣，老爸的墓地，草仔已經發有一个人遐懸，親情幾冬前就共失智的老母送去安養院蹛。伊無機會有孝，嘛無機會吼。我問伊：「你敢會後悔出國--去？」，伊講：「袂--啦！」，紲--來，伊就共我講伊ê美國古。

Hui--a今仔出國留學的時非常謹慎細膩。第一毋敢烏白開錢，必要的食穿開銷掠外，賰--的，攏儉--起-來 - 遮的錢是tshuân來欲買貴參參的機票！留學生並毋是散赤苦憐的人，毋閣人佇外國是歹有確定的向望，儉一个本做轉去故鄉的保證顛倒實在。Hui--a講，儉錢予伊心肝定著，予伊敢對未來有按算；Hui--a按呢講，面的笑容煞反烏。

除起錢，時間是留學生上寶貴的物。政府分錢予留學生的條件是限制in一定時間內底愛提著學位，若超過期限，就愛家己想辦法傱錢。這个限制袂輸猴齊天頭殼頂戴的彼个金箍，大部份的留學生驚金箍縮絚，就拚勢佇學業頂面，毋敢烏白開時間佇別項。Hui--a本成就是欲來做一个好學生，時間有限予伊愈綿爛來拍拚。免講醫學院本底就較無閒，上課時間以外，伊攏乖乖仔佇學寮裡餾課業。Hui--a便笑便講，「佇遐過第一年的冬天，煞毋知落雪是啥物滋味。」

這款情形一直到Hui--a熟似一个台灣來的查某囡仔才有改變。彼个查某囡仔毋是醫學院的學生，是咧專門研究微生物的研究生。查某囡仔若像嘛是提獎學金來讀冊--的，毋閣伊的穿插較奅，氣質誠無仝。「伊攏有點胭脂，抹薄薄的水粉，半長的頭鬃虯虯崁耳仔，一副金耳鉤顯目。」Hui--a按呢形容伊記持內底彼个20捅歲的青春少女。

「是千金大小姐--矣。」Hui--a繼續佇記持裡，「醫學院佮微生物研究所有幾个相疊的必修課。我佮伊就佇上課時熟似的。」

Hui--a參伊按呢就有一部份仝款的趣味。講的話愈濟，互相就對趣味內底揣出愈濟趣味。趣味的線共in結做伙。「恁到底有相意愛--無？」，我按呢問，Hui--a笑笑仔應：「我嘛毋知。毋閣，我真佮意伊就是。」

「就算相意愛，恐驚仔嘛袂有結果。」Hui--a補充。

伊講，有一站仔，彼个查某囡仔會招伊去耍，去啉咖啡，踅街，看電影，跳舞。「我真躊躇。」，逐擺Hui--a攏愛考慮這逝閣愛開偌濟錢偌濟時間？「你是毋是無佮意佮我做伙？」「無--啦...」，Hui--a講伊彼陣有淡薄仔驚閣有淡薄仔忝，「有一个古錐的女朋友」這款想法佇伊心肝底咧擽，予伊生活顛倒反，無頭神lin-long踅。

「咱來旅遊，好--無？」彼个查某囡仔有一工按呢問Hui--a，提一張地圖，頂懸閣有紅筆箍--起-來的幾若个所在。

「這...」旅遊愛開袂少錢，Hui--a躊躇。

「咱這馬無來去𨑨迌，後擺可能就無機會--呢！」

「你若會按呢講？」

「咱誠無簡單才對台灣走--出-來，若轉去彼个無自由的所在，就無通像佇美國按呢，會當四界耍--矣！」

「你咧烏白講啥--啦！」Hui--a驚一趒，大聲共應。

In後來無做伙去旅遊。閣後來，彼个查某囡仔嘛無遐捷來揣Hui--a--矣。閣較後來，Hui--a聽著一寡風聲，講，彼个查某囡仔是某一个將軍的tsőo囝，伊知兩人身份差傷濟，自動無佮對方閣往來。進前走精lin-long踅的干樂，Hui--a這馬共抾--起-來，哼哼慼慼了，予干樂閣徛在運轉。這是Hui--a第一擺啖著失戀的滋味。

Hui--a欲翻頭做好學生，毋閣伊的心肝猶會不時酸揻揻。

「喂！我看你失志失神幾若工--矣，按呢真毋好！來，來參加阮的活動，加捌寡新朋友較好！」佮Hui--a蹛仝棟學寮的一个台灣人，佇伊失戀日了後的第七工，刁工走來揣伊，真熱情欲搝伊去參加一寡台灣人佇美國彼搭的社交活動。

Hui--a無心，毋閣答應彼个人的邀請。「用鬧熱做溫泉來治療孤單這號病症。」伊按呢解說。

今到美國的時，Hui--a驚家己語言能力綴袂著陣，就刁持無愛佮台灣人做伙，逐工攏佮遐白人烏人鬥陣，操練家己的英語。這擺，是伊第一遍去參加台灣人的活動。「我捷佇學寮拄著你，見面三分情，看久嘛熟似。我看你攏袂愛佮人相借問，古意古意，顧讀冊，按呢毋好！」新朋友𤆬Hui--a去聚會的路裡，起一个話頭，想講按呢生Hui--a會感覺較四序，「我知你是醫學院的學生。我--矣，是物理系的學生，當咧做博士研究。我來遮欲倚第四冬--矣，世面捌比你濟--寡，應該就愛來照顧像你按呢的新人。有一寡代誌愛𤆬你去瞭解。」

Hui--a佮我講：「彼擺經驗足奇妙！路裡，我攏無講話，想講這个人真神祕，總袂共我騙去賣？彼當陣伊咧駛車，沿路捌停車抾兩个人，我戇戇坐踮車裡，嘛無想講欲趁機會旋。好佳哉無旋！無，就無法度捌著阮某！」

我問：「彼擺聚會，予你有機會發展新戀情？」

Hui--a起愛笑：「毋是--啦！車內另外兩个人，其中一个後來變做我的牽手，毋閣彼是後--來的代誌，是足濟代誌以後的代誌。彼擺的聚會--喔...」

彼擺的聚會有20个台灣人參加，檢采其他人是捷來的老鳥，車裡三个人攏是第一擺來的菜鳥仔；老鳥相菜鳥的眼神利利，敢若欲共in啄彼款範勢；𤆬in來的彼个人緊走出來講這三位的名姓佮背景，「我觀察in足久--矣，無問題--啦！」

Hui--a對眼前發生的代誌猶閣捎無總，人就共伊捒，「你！閣共逐家紹介你家己！」，Hui--a一時煞愣佇遐，規間房間 - in聚會的所在是某物人in兜，一間郊外的大厝 - 恬tsiuh-tsiuh，礙虐礙虐的時間，有人就講話--矣：「遐爾恬，毋講話，敢真正無問題？」𤆬in來的彼个人面色歹看，毋知欲按怎應。

「呃！窗仔外有人！」一个人喝聲！

「啥物人？」

房間內一个人走去拍開窗仔，有人已經開門傱--出-去。

Hui--a佇原地tshāi--咧，想無咧搬佗一齣？掠賊？

拄才開門傱--出-去的人這馬轉--來-矣，怦怦喘，「閣是彼箍死爪粑仔！有看著伊提相機，准是欲來偷翕咱的聚會！伊會曉翕，我嘛會曉翕，幹！」話講煞，伊提一副相機，幌--咧幌--咧予逐家看！

眾人隨拍噗仔，「贊！贊！贊！留下歷史證據，這幹--的準備臭名萬萬年！」

Hui--a講話--矣：「請問，恁講的爪粑仔是啥物人？啥物意思？」

房間內又閣恬--去。有人講出一个人名。Hui--a趒一趒！

「彼擺的代誌就是按呢。彼个爪粑仔的名我有印象，伊就是早前彼擺，唯一參加考試，嘛唯一提著獎學金的人！我聽著這个名，身軀趒一--下，in煞掠準我佮爪粑仔是仝黨的！」Hui--a按呢講。

我講：「這聲誤會大條！」

「哈哈，誤會大條無要緊。我本成就毋是一个厚話的人，袂愛講話，嘛袂愛佮人冤。後來我去參加聚會，常在坐佇上角仔，恬tsiuh-tsiuh，就一直有人掠準我是爪粑仔彼黨--的。」

「我講彼擺聚會真奇妙，第一是我後來的牽手就佇身軀邊，袂曉講話閣hông誤會，好佳哉有伊講開。第二--呢，彼个爪粑仔有翕著我的相！後來人共我講，彼有寫佇『波士頓通訊』內底，因為按呢，閣來的20外冬我攏袂當轉來台灣！」Hui--a的情緒開始夯，「彼个爪粑仔！爪粑仔！為按怎好好人毋做，欲做爪粑仔？我真想袂曉--矣！」

Hui--a轉來到台灣已經是一九九九年。伊本成干焦想欲轉來看in老母，共in老爸培墓，了後就閣欲轉去美國 - 畢竟，伊的家庭都佇遐釘根--矣。一位政府方面的官員趁伊佇台灣的時間去共拜訪。

「這馬社會當咧改變，國家需要專業人才來鬥相共。」政府官員一來就明白表示，希望Hui--a會當留踮台灣。

Hui--a無應話。

官員閣講：「阮知影你佇美國是腦佮精神醫學方面的專家。咱台灣這馬咧大改變，閣無偌久就迒到21世紀，阮相信這方面的醫學佇未來非常重要。所以阮希望你留--落-來，共阮鬥相共，共台灣鬥相共，拜托！」

遮的話佮Hui--a當年出國時的向望相合，伊的心振動--矣。就按呢，伊共某囝放踮美國，一个人孤身佇台灣。

政府對Hui--a袂䆀，予伊做一間「特殊」療養院的院長。官員足謹慎共Hui--a強調「特殊」!

療養院起佇郊區。佔地非常闊。院區內底，種足濟花佮草，閣有大樹涼亭，規个環境創甲若公園，加上幾若棟起甲媠媠的建築，毋知影的人，拍算會掠準遮是啥物富戶人咧蹛的別莊。

「因為會來遮的病人攏較無仝。阮就設計這款環境，對in做人性化的治療佮管理。」官員按呢共Hui--a解說。

「In是啥物病症的患者？」Hui--a問。

「噯！」官員吐大氣，「煞毋知這幾冬以來，台灣逐冬都有選舉。選舉若到，痟人就濟--起-來，選舉一過，in就予家屬押去病院喝救！這款情形一冬害過一冬，袂輸流行病--咧，衛生署感覺代誌蹊蹺，兩冬前就佇這搭起這間療養院，對外講是新起一間國家級的精神病院，事實上，是用療養院的名義共一寡較嚴重的「選舉病」患者抾來做一伙，通共in做研究。「選舉病」若無治療方法，恐驚台灣未來會規組害了了！」

「選舉病！歐美國家敢若無？」官員紲咧問。

Hui--a幌頭。這號病症，精神病的診斷佮統計手冊DSM內底無寫，伊家己是第一擺聽--著。

官員講：「起頭阮揣台大醫學院的醫生來做院長。伊佇遮治療患者嘛專心研究，本來一切都好勢好勢。幾個月前來一名患者，伊hông送--入-來的時，正手死直攑懸懸，真硬tshiâng拗袂落--來；筋肉閣一直顫，喙gap--咧gap--咧煞攏袂出聲。毋若按呢，這名患者閣會拍--人，伊若看著衫褲穿佮伊無仝色水的人，就欲過去kâng蹔！所以伊佇遮攏hông縛--咧，干焦欲予坐輪椅爾，醫護人員講這是”保護管束”。」小吞喙瀾了，官員紲咧講，「伊的病症一直按呢。毋過有一工，伊雄雄家己好--起-來！正手的筋肉冗--去，手放落--來，目箍紅紅，目框含水。院長聽著人共報這个消息，緊走--來。伊問患者感覺按怎？患者講，我陷眠精神才發覺，原來選舉毋是按呢生。講煞伊就一直吼，院長共安慰；隔轉工，患者就出院--矣。院長佇這件代誌過無外久就辭頭路，連台大的教學工課嘛總辭！伊講，伊了解--矣！毋閣，阮逐家煞捎無總！伊全部的研究資料攏拍無--去，本人嘛失蹤--去！」

便講話便行，官員佮Hui--a已經來到療養院主建築的門喙。官員最後講：「拄才我佮你講的遐，請你毋通講--出-去。等一下，療養院的代院長會來佮你tsih接。」講了，伊手共Hui--a的肩胛頭貼貼--咧。

Hui--a真緊就開始新工課，研究的材料連鞭就熟手。毋免偌久，Hui--a就得著院裡遐醫生護士的尊敬。毋若因為Hui--a是按美國轉--來的，有先進的思想佮做法，嘛因為Hui--a無官羶，好笑神，好鬥陣，話無厚但是利閣趣味。

缺失前一任院長的研究資料並無礙著Hui--a心內的計劃；伊共每一个患者的病歷攏詳細讀--過，要求逐个患者的逐項診斷資料攏愛斟酌閣測量。掠外，伊閣逐不時佮療養院內底的醫生開會，斟酌討論佮交換針對逐个患者的診斷意見。Hui--a講，遮的工課是欲揣出法度通解決問題的代先步數。規个tshuân甲齊開欲一冬的時間，尾手，伊請工程師來療養院安一座超級電腦，講欲利用電腦運算分析，揣出遮患者看--來無理路的逐項資料內底相疊的”pattern”。

按呢閣經過冬外，佇某一个禮拜一的會議，Hui--a宣布欲試一款”行為療法” - 療養院裡欲創一个「自治委員會」，予患者佇特別設計過的環境內底，閣參與一擺選舉。「所有患者的資料經過分析了後，發現環境內底的一寡因素對in的行為有重大影響。所以咱愛創造一个環境，控制遮的變因，用按呢來試撨in的行為。」Hui--a共手頭的分析資料影印幾若份分予逐家，閣共in解說。

欲創「自治委員會」的消息一予遐的患者知影，一寡人隨掠狂！醫生共Hui--a反應，Hui--a講：「無要緊！行為療法一開始定定會有倒反的效果，咱繼續，看後壁面的狀況按怎。」「自治委員會」選舉就繼續進行。Hui--a佮遐醫生特別去設計關係參選、助選、人脈網路內底的一寡鋩角，予患者袂得有脫線抑是走精的行為。經過按呢一月日“行為療法”的選舉以後，竟然予患者攏恢復正常！In佇上尾工頓票，票開了，毋管是毋是參選人，攏mooh做伙吼。毋肯食物的患者，這時咧喝腹肚枵，喙歪目掣--的，這時變甲面容端正，規工踅踅唸--的，這時恬tsiuh-tsiuh，喑噁抑毋講話--的，這時會唱歌。醫生看--著，緊走去共Hui--a報告，Hui--a真歡喜，「成功--矣！有效--矣！」毋閣心內隨發疑礙，「In代先會吼？」

電視報紙攏無報療養院的新聞，政府中央煞即時就知。衛生署長搶代先共Hui--a揣去食飯，感謝伊的研究佮貢獻。第二的來揣Hui--a的，想袂到是法務部長！Hui--a見著法務部長，感覺誠稀罕。

法務部長佮Hui--a握手，伊咧笑，喙歪歪。

「實在真感謝你的研究。毋若共遮痟人治療好，嘛替台灣解決一个大問題！」法務部長講，「閣來，明年寒--人的時，國內有一場大場的選舉！選舉時會有真濟犯罪的代誌，選後，選舉病的痟人應該閣會大量增加。我希望你會使共法務部鬥相共，予阮一分報告，將來共你發明的治療法推捒去全國各地，未來嘛通改進咱選舉的方式。」

法務部長無請Hui--a食飯，講話真囉嗦，一甌茶啉欲二點鐘。部長離開了後，Hui--a放輕鬆，坐踮院長辦公室的䖙椅，目睭微微起愛睏。伊相著桌頂部長留落來的名刺。規的人趒一趒。三看彼个名，愈看愈熟似，熟似合記持，心肝起交懍恂。

有一段時間無選舉，毋閣，遐經過”行為療法”恢復了出院的患者，竟然一个紲一个閣夯--起-來，hông送轉來療養院。Hui--a感覺小可餒志，「是毋是因為選舉閣欲到--矣？但是，今年底的選舉都毋是全國攏有？」，伊想無，全國干焦兩个市有市長佮議員的選舉，影響若會遐大？到底機關是藏佇佗？

今年寒--人的選舉非常激烈，尤其是台北市 - 仙拚仙，拚死猴齊天。選舉了，著選舉病的患者數目衝上崎，hông送來療養院的人數不止仔濟。Hui--a交代醫護人員，愛謹慎處理每一个患者。

禮拜一開會的時，一名醫生提問：「針對遮新个病患，咱敢欲閣試驗”行為療法”？」

Hui--a講：「咱閣來試看覓。這擺來改變一寡無仝的環境因素，看效果按怎。」

隔幾工，約略是選舉了一禮拜後，Hui--a接著台灣CDC敲來的電話。

「有一名特殊病患需要貴院來拹助處理。」

「阮遮就是專門咧治療特殊患者的機構。請恁送伊過--來，阮會鬥處理。」

「Mh...mh，這个毋是一般的病人。總講一句，請恁共恁療養院頭前彼塊空地整理好勢，阮下晡兩點會用直升機共病人送到！彼時，阮負責人會來佮院長你講詳細的情形。」

「好，好，我會安排一組醫護人員專門負責這件代誌。」

特殊病人？Hui--a對”病人”兩字無蓋爽快，伊認為按呢是對”患者”無尊重的叫法。毋閣，對方一直強調”特殊”？電話掛了，Hui--a坐踮椅仔頂，目睭瞌瞌，共伊想會到的可能攏佇頭殼內搬一遍 - 總--是，下晡就會知”特殊”的真相--啦！伊對桌頂一台電話機的揤仔揤--一-下，吩咐下晡愛tshuân一組人通應付各種情形。

過晝，準準兩點，phu-lóo-pheh-lah的聲音對空中遠遠傳--來。一台軍用直升機出現佇療養院的頂頭，慢慢降來到院區頭前的空地停好勢；機身反射日頭光鑿目，phu-lóo-pheh-lah寬寬仔定--落-來。

Hui--a親身𤆬領一隊醫護人員徛佇邊仔等待。直升機停好的彼霎仔，空氣堅凍，逐家攏緊張甲毋敢大聲喘氣。

直升機正手爿的門hông捒開。代先出來的，是兩名男子，in穿殕色se-bí-loh佮白siat-tsuh，孤一爿的耳仔掛一條若電話線的物，這款形，一看就知是特務。綴咧in後壁落直升機的，是一个se-bí-loh鈕仔無齊鈕，嚴肅嚴肅，面煞有古錐笑容的中年人；這个人官羶誠厚，跤一踏地，也無插其他人，做伊行到Hui--a的面頭前。

「院長你好！我是疾病管制局CDC特別小組的組長。我姓張。」

「張組長你好！」Hui--a真有禮貌，正手伸出--去佮伊握手。

「咱就毋免閣客氣，正經代誌緊辦較要緊！」張組長講，「等--咧阮會有四位的維安人員佮恁的醫護人員做伙共病人押去病房。這規件代誌siat-thái機密！我請院長會使予我一寡時間，我愛單獨佮你做報告！」

Hui--a頕頭表示瞭解。轉來台灣這幾冬，”特殊”佮”私下報告”的代誌伊看誠濟，尤其，佇這間療養院 - 患者其實攏佮政治風雨有關係！

「是講，若會猶無看著患者？」Hui--a問。

張組長倒手攑懸向直升機邊仔的兩名維安人員擛--一下，兩人應--一-聲，仝款共倒手攑懸向直升機內底做手勢。緊張的氣氛閣再像大流湧--到。彼个“特殊”患者予兩名維安人員挾佇中央，勻勻仔行出直升機。

一般來講，”特殊”患者就是彼款會拍--人-的，會予人感覺受威脅--的；這款患者攏愛接受「保護管束」，in若毋是像肉粽按呢hông縛--咧，就是倒佇眠床頂hông扛。毋閣，這馬佇Hui--a面頭前的煞是一个老人，跤無枷手無銬，家己對直升機頂行--落-來！看--來是有歲的人，但是跤步閣真在。Hui--a心內憢疑著驚！伊小可眼--一-下，其他醫護人員嘛戇gia̍h戇gia̍h。

「這？是按怎？」Hui--a越頭相張組長。

「請in先共病人送到隔離病房去。我連鞭就會共你報告佮解說。」

Hui--a無閣加講啥。伊請猶閣霧嗄嗄的醫護小組引𤆬四名維安人員；規陣人佇外輾，患者做餡，行對醫療大樓正爿彼个有暗號鎖的偏門 - 門內是針對特殊患者設計的隔離觀察病房，in一般攏愛佇這搭接受幾若工甚至幾若月日的醫療觀察。

「張組長，請綴我來。」，另外彼頭，Hui--a𤆬張組長行入去醫療大樓內底，欲到伊佇這棟大樓上頂懸棧的辦公室；療養院裡上幽靜的所在。Hui--a平常時攏佇遐處理公文，嘛佮意佇遐接待賓客；辦公室原木的桌仔佮冊櫥有自然的芳味，予人感覺心爽，冊櫥內底的冊 - 凡勢欲倚千本 - 掖出智識的芬芳，予人心平靜。辦公室自然嘛成做Hui--a的研究室；Hui--a上愛的工課其實是學者，院長干焦是一款身份。

「李醫師，驗血，MRI，EEG的報告攏佇遮。」護士提一个橐仔予一位少年醫生。

「血糖，血油，CRP，m̀...m̀，逐項攏正常」李醫師共橐仔內的報告單提--出-來，一項一項斟酌巡，「MRI，m̀...」這馬李醫師開始讀MRI的報告，閣共一塊CD hē入去電腦內底，手掠鳥鼠仔，振動振動、揤--咧揤--咧詳細檢查患者大腦的逐層影像，「...大腦有一寡奇怪的烏影，毋過應該是正常，真濟老人攏按呢，是失智的起頭症狀...」伊家己嗤呲。

一點鐘過，李醫師共護士閣叫來，「遮的報告我看了，患者的狀況算是健康。按呢，你安排一下，下晡我愛佮患者面會，共伊做心理量表的檢查。」護士應聲隨去。

“特殊患者”孤一个蹛一間房間。房間無窗仔，空氣循環倚靠24點鐘的空調。內面有簡單的一張眠床，一條桌仔佮一條椅仔，嘛有一个用半个人遐懸的牆仔圍--起-來的便所，猶有幾若枝攝影機，予患者行甲佗都無死角通覕，外口會當隨時觀察佮監視伊的行動。

李醫師穿一領白白的醫生衫，下晡三點來到這間房間。房間內的老人當咧伸勻做運動。

「我hông關踮遮足無聊！」老人看著李醫師隨講。

「阿伯，這暫時的啦。等咱檢查做了，就會使予你出去自由活動。」

「你手提彼啥？欲來予我做藝量--毋？」

「無啦！這是檢查表，等--咧我會解說予你聽，愛請你配合來回答。」

「真無趣味！恁少年醫生攏按呢--毋？先去斟一甌茶予我啉，我喙焦。」

李醫師笑笑，只好將筆佮資料囥卓頂，行去門邊，透過對講機，請外口的護士送一甌茶入--來。

茶送到，老人捀--來就青狂啉，無二喙就浞著，嗽袂離。李醫師一看按呢，緊走去揤彼粒紅的喝救揤仔，閣傱去老人遐欲共搭尻脊骿；無拍算，老人喀一聲，一喙水霧--出-來，灇甲李醫師澹規頭規面；護士這時傱--來，喝：「李醫師，有要緊--無？」，即時就共李醫師搝退後二步。老人竟然閣霧一喙水，李醫師這聲規身軀澹漉漉，護士的跤手嘛全全是老人霧出來的水佮喙瀾𣻸。

「歹勢！歹勢！食老定定按呢，啉水gâu浞--著。」老人喙唇猶閣澹澹，便講閣便共賰無半甌的茶啉落喉。

「李醫師，欲按怎？」護士這時激一个苺仔面。

「咱先去洗身軀，換衫。量表檢查，小停較閣做。」李醫師真bô-ta-uâ，越頭面對患者，「阿伯，咱等--咧才閣來做檢查。你先歇睏一下。」

老人笑咍咍，「無要緊！無要緊！」

經過五工的觀察佮檢查了後，李醫師提出報告講“特殊患者”一切攏誠正常，連「選舉病」一般愛有的症頭都無，通予伊出來佮一般患者做伙生活。逐家就開會決議放伊到院區內底，嘛予伊會當參加”自治委員會”的選舉，接受行為療法。

經過兩工，Hui--a感覺代誌毋著。

院區失去平常時的規矩，逐位就有冤家，相罵的吵鬧聲。患者攏暢甲擋袂牢，in無愛閣聽醫護人員的指揮，攏講家己足正常，毋閣無人想欲出院。

彼工下晡，三樓的活動中心雄雄有桌仔徙振動的聲，患者規陣對遐去。一大陣人挨挨kheh-kheh圍做伙，一个老人跤手猛掠peh起lih拄排好的桌仔頂，佇頂面共身軀掠直，徛在；下面的桌仔互相kho̍k-kho̍k挵，頂面的老人暢甲面紅紅，準備欲講話。伊後壁竟然閣peh起來一排人，笑微微徛佇遐，袂輸一堵懸低無齊閣幌來幌去的牆仔，成做老人的背景。

老人開始演講。伊大聲喝：「我是一號！一號就是我！」

其他患者聽著按呢，若予魔神仔牽--去，隨喝應：「一號！一號！一號！...」

喝應欲一分鐘久；徛佇桌頂的老人愈聽愈爽，面愈紅，予下跤的桌仔愈來愈緊咧kho̍k-kho̍k挵。

這馬，老人欲開喙講出第二句話，siâng時，毋知對佗有gá-suh lá-pah的聲ki-ki響，遐的患者聽--著爽歪歪，做伙大聲拍噗仔。茹tsháng-tsháng 鬧tshai-tshai的狀況內底，老人更加大聲，「恁逐家講，予我當選，予我做主委，好毋好？」

Gá-suh lá-pah比第一擺閣較懸音來ki，「當選！當選！當選！當選！...」，喝聲無停，老人笑咍咍，伊後壁遐的人嘛笑甲愣愣。

療養院內底的狀況若相拍電按呢已經失去控制！面對這款撞突的情形，Hui--a緊揣遐醫生護士逐家覕踮五樓會議室，討論代誌欲按怎處理較好。

「院裡若會有gá-suh lá-pah？」Hui--a目頭結結共逐家問。

逐家互相對看，無人知。

「院長！咱是毋是應該愛通知CDC--矣？」李醫師雄雄徛--起-來，規个面若雞胿膨風，大聲喝，共Hui--a建議。

Hui--a共伊tsîn，目蚶隨崁落--來。無人敢加講話。

「院裡這馬的狀況佮CDC有關係？」一位中年醫師紲咧問。

逐家攑頭，目箭對Hui--a射--去，咧等待伊的回答。

「李醫師，你未免傷家婆--矣！」Hui--a罕得起性地，掠李醫師金金相。

「院長！這馬代誌咧袂收煞！這个時陣，愛予逐家知影真相較著！」李醫師閣發言，正義感滿溢，一字一字逐家聽甲真清楚。

這時，Hui--a目睭閣瞌--起-來，䖙佇䖙椅，規个人浸咧思考內底。

「啥物真相？」「真相？」會議室內底逐家開始嗤嗤呲呲咧議論。

會議室的放送頭pi-pi-pok-pok發出聲音，然後是一个老歲仔咧咳嗽：「我當選委員會主委了後，院長就愛佮我配合，佮逐家坦白伊貪污食錢的代誌！我嘛會捒新的管理政策！院長無法度閣獨裁--啦！恁講，按呢好毋好？」，紲接是吵鬧的人聲佮噗仔聲，gá-suh lá-pah閣再搝長ki-ki吼。

「院長！」無分少年--的抑老的醫生，攏總徛--起-來。In的氣勢壓迫Hui--a一定愛予in一个交代。

「李醫師！你，請你來共逐家講！我進前有答應張組長袂使洩漏這个祕密！阮彼工的對話，是無細膩才予你聽--去，我彼陣有愛你保守祕密，毋閣代誌就已經變甲按呢--矣，為著逐家的安全，你就共代誌講--出-來。」

Hui--a話講煞，逐家越頭看李醫師。

「我，...好！院長，逐家，我講！」

Hui--a𤆬張組長來到伊的辦公室。張組長後跤行入，順手就共門關好鎖牢。Hui--a隨翻頭，「張組長！若有人客佇遮，我毋捌咧鎖門！你按呢是啥物意思？」

「院長，這層代誌siat-thái機密。我無希望咱講話的內容有第三个人知影，嘛無希望咱講話的時受其他代誌影響！所以，請寬諒我共門鎖--起-來。」

Hui--a小可無奈，心內想講：「機密？著選舉病的患者，會有啥機密？」，伊行去家己平常時咧坐的辦公椅，坐好勢，請張組長坐伊對面的膨椅。

「M̀。」張組長感覺Hui--a禮數無夠，出聲表示不滿。「代先，我抑是愛閣提醒你，這个病人siat-thái特殊！Siat-thái危險！」

「我知！」Hui--a應甲潦草。自伊接著CDC的電話，”特殊”兩字已經聽傷濟擺--矣。

「你敢完全袂認得伊？」張組長問。

Hui--a認真想，這名患者蓋成面熟面熟？前一站佇電視新聞內底敢若常常看著伊？毋閣，伊到底是...？Hui--a想無，伊幌頭：「我佇美國蹛足久，無咧插台灣的代誌，對台灣政治更加無興趣。我佇遮是做研究，希望對台灣醫學有淡薄仔貢獻。這个患者，我是共當做一般病患看待。伊若是啥物有名聲的人物，歹勢，我毋捌--伊。我認為，伊佇遮嘛無可能得著優待佮特權。」

「M̀」張組長閣發出不滿的聲音。伊對se-bí-loh內面爿的一的暗袋提出一張拗甲四正的紙，褫開，㧣予Hui--a，「你看？」

Hui--a共彼張紙提倚來面頭前，發見紙面頂印的，敢毋是拄才hông送入院的患者？伊斟酌看，紙面頂閣有寫字，這張敢毋是選舉傳單？

「伊是？」Hui--a猶原捎無總。

「伊是這擺市長參選人！」張組長大聲講。

「啊！選舉選甲起痟？」Hui--a雄雄瞭解。

「院長，這就是我欲共你解說的所在！你臆的，拄好佮伊的情形倒反。事實是，伊會參加選舉，正正是因為伊精神無正常！」

Hui--a的表情驚疑，拄才的瞭解即時四散，「精神無拄好的人嘛會使參選？」

「當然毋是按呢！」張組長閣一擺發出不滿的抗議，「伊的精神無正常，外口人是看袂出--來-的。一般人顛倒會感覺伊足gâu，足熱情，對公共事務足有辦法！毋閣你若看伊的行為，一直咧參加總統大選，選無牢閣來選市長，正常人袂按呢--啦。」

Hui--a講：「遮爾愛選舉，毋是逐个政客都按呢？伊是較愛展風神出來弄爾爾 ？」

「M̀」張組長講，「代誌若有遮簡單就好解決--矣。」

「M̀」Hui--a嘛發出仝款的聲音。

「台灣的CDC代先是得著美國國防部通知，講，這个人可能受一款病毒感染所以行為失常。阮知影了後，誠緊張，就偷偷仔khîng伊身軀的見本來化驗。結果...」張組長講到遮雄雄換一个話題，「院長，你的學術專業一定知影Phu-lí-òng這項物--honnh？」

Hui--a頕頭，「彼是造成痟牛病的病原體。」

張組長笑微微，「我就知你一定瞭解！按呢，Phu-lí-òng我就免閣開時間解說。阮佇這个老人身軀頂發現一種新的病毒，生甲參Phu-lí-òng蓋相siāng。」

Hui--a目睭展大。

張組長繼續講，「阮用鳥鼠仔做實驗，發現受感染的鳥鼠，會變甲非常活跳，而且，in佮正常鳥鼠比--起-來，會加開兩，三倍時間去創社交行為。」

Hui--a問，「這个病毒會感染神經系統？」

「院長果然專家，一講就著！這款病毒會侵犯中樞神經系統。解剖鳥鼠發現，病毒主要攏囤佇大腦裡。病毒袂去侵犯跤手等等的周邊神經系統，毋閣，有一寡病毒會走去肝裡；所致，著病的鳥鼠頭會脹大，肝會發炎，行動正常，但是行為失常。」

「阮攏總利用鳥鼠仔做六組試驗。鳥鼠仔若受感染，會硬欲做鳥鼠王。這款行為會造成鳥鼠仔的錯亂，因為正常的鳥鼠仔無需要”王”來統治。後來，阮閣發現，這款病毒會相穢！致使逐隻鳥鼠最後攏數想欲做王！In就開始相拍，咬來咬去，落尾就死了了。」

「啊！這病毒會相穢！你、你！竟然送一个有傳染病的患者來我這間療養院！」Hui--a情緒激動。

「先莫緊張，院長。這款病毒無遐爾簡單就會相穢。」張組長講甲喙乾的款，「院長，你遮敢有茶水？」

「有，有。」Hui--a peh起身行到啉水機頭前，斟一甌白滾水捀予張組長。

「咱講這款病毒無遐爾簡單來相穢，是因為阮嘛偷偷仔去khîng見本，檢驗佮老先生定有接觸的人。阮發現，干焦11个人受感染。」

「閣有，」張組長紲咧講，「經過各種分析，阮會使肯定講，老先生一直參選佮傷過濟的社交活動，攏是因為病毒的關係。彼11个受感染的人，慢慢嘛攏有仝款的症頭出現。」

「是佗11个人？」Hui--a問。

「我無方便講。毋閣院長，你若對台灣社會加寡關心，真簡單就知我講的是啥物人。In的症頭攏仝款，社交活動濟，愛hông注意，愛上新聞，愛權力，愛控制別人，有時會刁工吼予人看。」

「院長，我已經共這个病人的狀況攏講予你知--矣。阮送伊來遮，是欲共伊和社會隔開，因為伊身軀內的病毒已經傷厚！阮誠煩惱閣予伊佇外口pha-pha走會予這款病毒加速湠開。恁療養院有上好的醫生嘛有上好的設備通對伊有完全的掌握。」

「敢講，這款病毒無藥仔通醫？」Hui--a問。

「這馬無，未來，恐驚嘛真僫。這就是講，老先生賰偌濟性命攏愛佇療養院內底過！阮希望，毋管按怎，恁攏袂使同意伊的出院申請。」

Hui--a目睭nih 一下。

「恁若無法度答應阮的要求，阮只好請國防部來遮消毒--矣。」

「消毒？」

「簡單講，阮會共恁當做受感染的人！為著國家安全佮機密保護，只好犧牲--恁。」

「張組長！你咧威脅我！」Hui--a目睭噴火！

「院長！你按呢講是會拍歹感情--喔！我無威脅你，我干焦是咧做我該做的工課爾爾。」張組長一爿講，閣對伊的橐袋仔內底提出一張紙，大力共頓佇辦公桌頂，「請你佇遮簽名！」

Hui--a相彼張紙 - 保密合約！伊干焦會當簽名，無，閣欲按怎--矣？

張組長看Hui--a佇保密合約頂懸簽名，笑甲真滿意。欲走進前，張組長刁工用神祕的口氣講，「美國其實早就知影這个病毒--矣！你蹛佇遐遐久，閣是咧做這方面的研究，in攏無予你知--honnh？這个病毒佇地球已經存在真久，嘛佇咱人的四周圍流行足久--囉，大部分的國家領導者攏有受感染！這是祕密，袂當講--出-去-喔！」

張組長便講，就欲賰手去開門。Hui--a共喝--咧。

「張組長！我想，這个病毒已經湠甲台灣滿四界。這幾冬以來選舉病遐濟，kánn毋是這个病毒造成的？我答應你保守祕密，我就會做--到。毋閣，既然我知影這个病毒的存在，我就無可能毋插--伊。我紲--落-來的工課就會來研究這个病毒的疫苗。」

張組長無共hiù，家己開門行--出-去。伊干焦簡單講一句：「院長，你毋通插傷濟無應該插的代誌，以後才會當享受退休生活。」

賰院長一个人佇辦公室，伊䖙佇椅仔頂，目睭瞌瞌咧思考。

「院長！我毋是刁工的！我、我只是入來揣一本參考冊...你講--過，會使共你遮當做圖書館！」

Hui--a規个人驚一趒對椅仔頂跳--起-來，李醫師對冊櫥後壁趖--出-來。

李醫師共伊彼工聽--著的齊講--出-來。人人攏面反死白。

「我本來想講，彼个老歲仔干焦選舉選甲起痟爾，想袂到情形竟然遮爾嚴重！」年歲上輕的一位護士一爿講一爿吼，「這馬按呢，咱敢會予in“消毒”--去？」

「莫通知CDC就無代誌--矣！」護士長徛起來講話。

「是siâng？是siâng主張放彼箍老芋仔出--來，閣予伊會當參加自治委員會選舉？」一位較資深的老醫師真受氣，徛起來大聲講話。

「其它患者是毋是嘛已經予病毒感染--著？」「是欲按怎辦較好？」會議室內底的人相爭提出問題，發表意見；干焦Hui--a，頭犁犁，手扲拳頭拇，一句話都無講。

吵吵鬧鬧規半晡，hm̍h-hm̍h的Hui--a總算講話：「請逐家安靜聽我講。」

會議室恬--落-來。「這个患者是我同意接收--的，保密合約嘛是我簽--的，所以，我應當出面來解決這件代誌。」

「咱若無通知CDC，療養院到尾--仔，凡勢就佮遐hông做試驗的鳥鼠仝款，逐个人攏受病毒感染，掠狂，相車拚，所有的人攏會死，這款結果是我上無願意看--著-的。所以我決定欲通知CDC，予in來處理這馬的狀況，毋閣請恁逐家放心，我絕對袂予in對咱”消毒”！」

「請逐家毋通離開會議室，才袂有受感染的風險。我，欲親身去CDC的總部，幾點鐘內，一定會轉來予逐家一个交代。」

這句話講了，Hui--a徛--起-來，「我佮逐家親像兄弟姊妹仝款。這馬，恁若有人信我袂過--的，拜托恁出聲，講一句話，我就留踮遮，佮恁做伙！」

有五分鐘久，會議室靜清清。Hui--a家己一个，行--出-去，關門。

CDC佮國防部參詳了，決定軍隊介入共醫護人員佮患者先隔開，以後才閣揣所在安置。In嘛要求所有的醫護人員從今以後袂使離開療養院一跤步！

Hui--a抗議：「恁若會使共健康人佮傳染病患者關關做一伙！」

張組長講：「這是為全國安全考慮！而且，」伊目睭nih--咧，「經過檢查，恁李醫師體內有病毒！凡勢伊早就受感染！恁嘛可能予穢--著！」

Hui--a喙唇振動，張組長共喝：「莫閣講--矣！敢講，你希望阮共恁”消毒”？」

半冬後，佇閣較偏僻的所在，外人僫理解的地點，有一間新起好的療養院，正式運作。

這間療養院誠特殊，規年透冬內面攏咧選舉。一擺選無牢的人，拚死嘛會參加後一擺的選舉，嘛有選輸起呸面的人，召集支持者，槓破窗仔，放火燒椅桌，啥物夭壽代攏敢做。選舉的過程，買票，放紙虎，甚至kâng崁布袋，啥物出頭，啥款的垃圾步攏有。毋閣療養院裡的患者，對選舉都興tshih-tshih，袂輸佇選舉這條無盡磅的路遐有一个目標咧擛手，予in按怎逐就逐袂siān。

我欲予恁知的，就是以上這个故事。

你問我Hui--a到尾--仔按怎--矣？2008年的3月22，暗時新聞報導：神祕的山中療養院大火。Hui--a、醫護人員佮患者攏走無出--來。

療養院大火了，無偌久，我收著一張批。寄批的人無落名，拆開看，內底干焦一張紙條仔佮一支鎖匙。紙條頂懸是Hui--a的筆跡，有寫一个人名、一間銀行的名佮保險櫃的暗號。我真驚惶，毋過抑是去到彼間銀行，請辦事員𤆬我到彼个保險櫃的頭前，擰暗號拍開保險櫃，提鎖匙拍開內底的一个匣仔：一張批，佮一支USB儉仔。

USB儉仔內底有五个檔案，二个是Hui--a家己講話錄影，另外三个是伊咧做的疫苗研究筆記。若彼張批，伊佇錄影內底交代，愛親身共交予先生娘 - 伊一生上愛嘛上對不住的人。

我相信Hui--a講的攏是千真萬確的代誌，毋是凊彩講講烏白hâu-la̍k欲來嚇驚人的。伊佇錄影裡按呢講：「這款病毒通世界咧湠。散赤，善良，溫純的人予好額，獨裁，酷刑的人欺壓，原來就是人類受感染著病。這款流行病予人會去愛錢，愛權，愛面子。患病的人為欲提著錢佮權，啥款代誌in攏敢！親像我少年時拄著的彼个爪粑仔，我想伊會去做彼款害--人的代誌，是因為伊破病！若無緊開發出有效力的疫苗，這號予人破病甲不知不覺的病毒，落尾一定會致使咱滅亡。」

吞忍一冬，我決定欲離開台灣。總--是，愛先來去美國，完成Hui--a的交代。

Hui--a在生上尾咧做的代誌就是研究這號病毒的疫苗，毋閣伊的工課袂赴完成。這馬資料攏佇我的手頭 - 教授看我這个毋成學生真有，愛我來共完成這个救世的任務！我是捽仔，我無膽，我毋敢...所以，我共規个資料攏囥去網路頂懸，URL是：https://goo.gl/7mef7Z。有緣閣kioh-siàu好的人若提著遮的資料通繼續教授的研究，普渡慈航，搶救這个當咧害--去的世界。

到遮，我已經傷厚話--矣。行李款款--咧，機票早買好--矣，閣兩點鐘，我就欲飛去到非洲，佮人熊，目鏡猴，猩猩相放伴！

賰的，就是恁的代誌。

再會！