腦細

由畢業到現在, 工作了將近20個年頭, 由低做起, 做到管理層, 及後幫有錢人打工。以為搵到份筍工, 點知所謂的有錢人, 除了好彩早期賺到點錢外, 在能力上, 我真睇唔到有咩能力。

公司由幾個有錢人成立, 在成立之初, 互相討好, 你一句兄弟, 我一句帥哥, 但反轉豬肚就係咩啦, 一出現你我之間的不信任, 就滿有猜疑, 就算出去打個電話, 都有人以為係出賣緊佢, 但表面上又要好似無野喎。最慘係我, 夾係各人中間, 每人又想套我其他人想法, 但又有人想我比D假消息比另一人,打份工姐, 收個人工, 無間道都做埋。

點解佢地係腦細, 可由以下事情看到:

1) 腦細A約左腦細B下午跟腦細C開會, 點知腦細C要早走, 咁腦細C就打電話比我, 叫我問腦細B可唔可以早D到, 早D開會, 問完再復番佢; 咁我問腦細A和B得唔得啦, A和B就話腦細C可以早到就得啦,叫我問腦細C可以早幾多.....如是姐.....來來回回.......腦細, 你地之間有電話架, 自己打去問得唔得架, 叫我搵黎搵去做咩呀, 我係做財務, 又唔係秘書, 我好得閒呀.....

2) 腦細陪佢細路去歐洲讀書, 話果面D飯唔好食, 咁點呀, 特登叫人係香港買個電飯煲, 之後寄過去, 我一聽完, 唔係呀, 依家咩世界呀, 寄過去仲要成千蚊, 點解唔上網買呀, 好...你唔多識英文, 咁你叫個秘書幫你上網買, 直接寄過去咪得囉, 點解仲要山長水遠咁寄? 本來就唔多關我事, 衰在叫我攞著個電飯煲去郵局, 來來回回都要四十五分鐘攰架大佬

有錢人......唉....遲D再講....