此地不宜久留

琴日呢二姐瘋狂畀嘢我做，出曬email cc咗大姐，要我今個禮拜搞掂佢。咁我發覺根本就做唔到嘅，因為聽日我成日都唔喺位，要去開會，同要去醫院地盤附近做嘢。

我收到個email之後，即刻行去同二姐講話我今個禮拜真係做唔切啲嘢，你最想要嗰份會議紀錄我真係要多啲時間先做到。佢就回應我兩句：加油！盡做！

咁我今朝條氣唔順，就出咗個email畀二姐，講埋我而家呢手頭上就有一二三四五項嘢做，就請佢批准我聽日唔使去地盤，等我有多啲時間喺位做文書工作，同埋嗰份會議記錄，恐怕我真係做唔到喇，我要多啲時間。最後我就話，真係唔好意思我聖誕之前中咗，返咗工幾日啫，不過我都會全力以赴今個星期盡做嘅。 我出完個email之後，下晝二姐捉咗我入房傾咗幾句，佢話完全明白我係有好多嘢做，但係作為一個eo，係需要multitasking同埋good time management，仲教咗我一個方法，我都覺得佢係真心教我，佢話你所有嘅工作都要起咗個頭先，每日每樣都要做啲，睇下你老細嗰日開邊範，追你邊份工作，追嗰日就全力谷嗰份，咁就畀人哋呀感覺你有做嘢，亦都做到嘢。

又呃呃氹氹話都係信得過你有能力，阿姐先至會畀工作， 睇下你想做畀人信任做多啲嘢嘅人，定俾人投閑置散嘅人。

佢仲話我出個email簡直錯曬，佢話你list 晒所有嘢你未做完嘅嘢，即係等於你有咁多嘢竟然未做！大姐睇完好shock!

經過今次之後我更加決心要走，上星期見咗嗰份工最後都係落選，不過喺waiting list。