「無米有舂臼，無囝抱新婦。」

無米可能是這陣仔才無米，毋是自頭就攏無米，厝內面有舂臼是無奇怪。

後句：「無囝抱新婦」較好笑，遮寫的「新婦」是「新婦仔」，自細漢抱來飼的新婦。

家己無囝，抱一个查某囡仔，按算大漢了後欲來做新婦。有人按呢做喔？

有喔！毋過較細條爾爾。

￭我少年的時陣，有一年拄著經濟問題，物仔大起價，一工一工攏咧起價，有的人共物仔買起來囤，避免將來買著愈來愈貴的價數。我的同學講，伊的一个朋友，厝內的人決定，共嫁妝攏先買起來，冰箱、洗衫機等等，囥佇厝內面，準備欲做嫁妝，問題是，伊猶無男朋友。

￭有一擺，我去阿舅兜𨑨迌，阿妗欲𤆬大表妹去做衫，我綴in去，家己提布去予人做衫，聽起來，in已經去做幾若擺。

聽著阿妗共表妹講一句：「結婚的時嘛會使穿。」啥物！表妹拄拄畢業，開始上班，猶無男朋友，就咧款結婚會使穿的衫？