頭一擺見著伊是腹肚正枵又閣無想 bueh 食傳統 Balkans 料理 -- 肉、肉、肉佮 tshan-tshiūnn「Papa」四界生湠 ê 義大利料理雄雄一踅身 tī 一間看起來若猶生活 tī 阿祖年間 ê 餐廳門跤口看著一桌三个人食肉閣配一盤飯隨決定踮遮飼枵。
因為店東 buē 曉講英語 gún mā buē 曉講希臘(Hi-lia̍p)語，菜單又閣讀無路來就 iōng 上原始 ê 語言比跤畫手，先送一个笑容 hōo 彼桌 hōo 我停跤 ê 朋友挨拶(Aisatsu)紲落來開始遮比遐指，生菜盤、Πίτα、肉...Mo？Me？Kônn？確定選牛、選羊、選豬，久無見著米 ê 我呔 ē-tàng 無來一盤飯隨 kā 手指過去。
店東佮三位 uī-tio̍h hōo 我 buē 點 m̄ 著菜 ê 朋友敢若知影我 ê 想法隨開始比跤畫手 hōo 我掠做傷晏來，清飯已經 Nóo-sut 隨表示按呢無要緊，我 mā 綴猶是男朋友 ê gún 翁食 Πίτα 就好隨 kā 手閣按 Πίτα 指過去，表示閣一份。店東 kā 手頭 ê 紙條囥踮桌頂，手綴指我本底 bueh 點 ê 物食講「Kein Problem」這 hōo 我楞去捎無摠通搝，隨越頭請教翁德文後 ê 14。
「Kein Anhnung」伊應。
聽伊按呢應，我隨反白睚(píng-pe̍h-kâinn) hōo 伊食。
「我捌 tī 遮上班無表示我 ē 曉講希臘語，另外我上班 ê 公司是德國公司 」伊講。
我閣加送一个膨風水雞刣無肉，伊笑應「我 ê 希臘語是學趣味 tshan-tshiūnn 你 ê 西班牙語按呢，兩光兩光。」
無興佮伊繼續盤喙錦越頭繼續手指隔壁桌 ê 物食，只要店東講「Ja」我 mā「Ja」包括彼盤參我 ê 面桶面相比並伊猶原較大桶 ê「飯」。
Tī-leh 等待「飯」送來 ê 期間我問兩光先生講「遮敢有 teh 種米？」
「M̄ 知」伊講。
「向田螺牛請教確實是無彩我 ê 喙，希臘人 ē 𤆬答案 hōo 我，大丈夫」話米一落「飯」mā 上桌。這敢是米？歐洲米合該無 Gladiator ê 體格 m̄-koh 躼跤阿叔，隨在伊現此時大肚告小腸，只要伊莫是咱蓬萊米 ê 假包牛奶米➀就好，閣食一喙這是啥，這 m̄ 是米。挖一匙送入喙，本底曲跤撚喙鬚交伊心愛--ê 你來我去 ê 翁敢若想著啥物代誌隨擔頭 tuì 準備向伊發表演說 ê 女朋友講「伊是 Kritharaki m̄ 是米是麵。」
日後有機會交伊再次相見是 Covid-19 四界趖 hōo 久長 m̄ 捌出現 ê Hamster 現象若日本櫻島火山遐爾仔活潑，超市架仔 ê 意大利麵無一日 m̄ 捌無枵腹肚，連鎖超市 uī-tio̍h 解決這个問題向希臘進口一堆 Kritharaki，不而過銷路無啥蓋好，到今猶有才調見著伊 teh 大落價。
2022 Camping mit Caddy 按保加利亞車日子到希臘 tī Itea 見著當地人 tī 樹蔭 ê 包圍享受餐廳 ê 好味素，其中包括「Kritharaki」我隨決無出錢 ê 人向出錢 ê 人主意停跤食中晝頓。不而過，我 ê 雙目得著一隻豬➁食福卻行 tī 卯字。我 ê 枵饞交餐廳出菜時間無搪好是門扇枋鬥 buē 峇，只好換別項好味素，像羊肉燖交這味 buē 彼當時 kan-ta 要意顧枵饞 buē 記得 kā 菜單翕一張仔照 hōo 家己 tī 未來有機會交伊再次相拄搪 ê「白草花肉捲」。
希臘白草花肉捲
2023 按波羅的海 3 國車日子 tī 立波柴杙城市 Suwałki 見著交德國相𫝛 ê 問題，支援鏨眾人驚枵 ê Kritharaki mā 行向火烌姑娘 ê 人生，按掌上明珠成做無妝娗交伊跳過舞並煞心 ê 王子 mā buē 認得伊 ê 孤單 hōo 人無要意擲 tī Ich bin noch gut, ich möchte nicht den Müller gehen。四常罕得煮粟仔麵 ê 我見伊遮爾仔楚楚可憐價數閣遐爾仔迷人隨捾五包轉來囤。
今仔日透早開始攢早起頓，頭殼雄雄閃一道光，我拍 Kritharaki 手機仔呔討見出現「Orzo」？我需要揣答案，一隻鳥鼠無代無誌停跤交我鼠鼠相，我無交伊斟酌貓貓會著蛆。
Kritharaki 是使用小麥抑是大麥做 ê 麵 tī 希臘伊號做 κριθαράκι，土耳其號做 Arpa şehriye，意大利號做 Risoni 遮 ê 訊息交我四常接觸完全敆榫，呔討手機仔遮爾仔無照起工來行？繼續實踐 Le Grand Bleu ê 精神，泅仔泅總算 hōo 我揣著答案，Orzo 時行 tī 北美，我 ê 巧手機仔 kan-ta 一个搜揣 ia̋n-ji̋n Google，雷公爁爍後 ê 雺煙散霧總算見著日鬚來行探。
早前貧惰炒 Kam-má-tooh 所致按我手出來 ê Kritharaki 無希臘神魂，這久骨力炒 Kam-má-tooh 希臘天神 ê 衫裾猶是搝 buē 著，煞煞去自在做家己較快樂，畢竟 Tshì-sù m̄ 是我自來就意愛抑是慣勢 ê 食物。
➀ Milchreis 製造土耳其米布丁 ê 米
➁ Schwein gehabt 好字運
