閣來講這个主題：「好人不長命

禍害遺千年」

有的人用前世、後世來講，苦勸人要做好人較好，因為這世的好、歹，攏佮前世、後世有關係，雖然前世、後世這馬看袂著，毋過有人講彼是有影的，毋是無影的代誌。我感覺遐的講法是咧唌人做好代誌，恐喝人袂使做歹代誌。

猶有講長歲壽、短命佮福、禍害沒關係，毋是長歲壽就是福氣，短命就是歹命。有的講法是，咱來世界中是來受苦的，若是早早離開，去西方極樂世界，就會使永遠過快樂的日子，所以叫人愛好好仔修鍊。

我的朋友，伊的老母講：「彼个人遐爾仔好，哪會著彼个病。」敢若得著無好的病，是伊做歹代誌的關係，是歹人，天公伯仔罰伊的。按呢講起來，天公伯仔，抑是神明誠愛罰人，欲予人驚，毋敢做歹代誌。毋過，逐家看著的是，做歹代誌的遐爾濟，日子過甲遐爾好，這是欲按怎講呢？

有人講，這世是大好人，做真濟好代誌，伊可能前世是歹人，這世愛來還，補做好代誌；這馬做歹代誌的人，伊前世可能是好人……

這馬若做歹代誌，死了後會落地獄，受苦；這馬做真濟好代誌，後世會使閣做好人，過好日子……

我的看法是：前世傷遠，後世傷久，咱嘛看袂著，無知是真抑是假。好好仔過眼前的日子較實在。

我學的諮詢，老師講：「為別人做傷濟代誌，無照顧家己；抑是一日到暗無閒𩑾𩑾，停袂落來，就會予車挵著，抑是破病，伊就愛倒佇眠床頂好好仔照顧家己。」 我嘛去印證，這是有影的代誌。

好人破病，毋是伊做歹代誌，予天公伯仔處罰，是伊做傷濟好代誌，無照顧家己，就予伊破病，伊才會無辦法服務別人，只好來照顧家己。

話閣講倒轉來，嘛是咧處罰伊無毋著，處罰伊干焦服務別人，無服務家己。咱若共天公伯仔的意思看毋著，彼就害矣！

毋但破病佮拄著車禍這款代誌，其他的，親像做代誌無順，拄著無合理的人等等，可能是咧共咱講，代誌毋著矣！愛改變一下，抑是這條路窒著，攑頭遮看著另外一條路出現，意思是這馬拄著愛改變、踅頭的時陣。

Volkan Olmez on Unsplash