註：幾若十年前就算「古早」矣！
我小學２年的時，自市內搬去庄跤。小學彼幾若年，逐擺考試我攏第一名，演講、朗讀、作文比賽攏是我。
我看阮同學，佇厝內講台語，來學校愛講華語，不只華語講袂輾轉，定定愛講台語才會使，有查某同學佇邊仔喝：「說方言。」有的會去共老師投，老師聽著嘛無罰，庄跤學校嘛無講台語胸前愛掛狗牌仔的代誌。
所以，會出現：「老師，他給我打。」予老師笑閣氣的話，有的老師會笑笑問伊：「他給你打，所以，是你打他了喔？」去投的囡仔，急甲毋知影欲按怎講？台語的講法明明是「『伊共我拍』，哪會變做『我拍伊』？」
小學畢業了後，大人攏以這个囡仔會曉寫批無？當作這个囡仔讀冊有讀會曉無的標準。
我咧帶領女性寫作班的時，班的名稱佮用的方法是「我手寫我口」，逐擺攏予逐家輪流講話，講完了後，共所講的寫落來就是伊的作品。
彼當陣仔我想著我細漢的時陣遐仔同學，in華語講袂順利，叫in寫作文、造句，是欲按怎寫會出來？當時，若是直接用台文寫，in的作文一定較容易寫出來，內容嘛較精采。庄跤囡仔，爸母可能毋捌字，袂當教in，嘛毋捌看過一本半本的尪仔冊、古仔冊，干焦有一本教科書是欲按怎讀？
這馬，會使寫台文，毋過囡仔袂曉講台語。唉！
聽著華語講無順，華語發音無標準的人講華語，我嘛咧想，in有可能共心肝內的感覺、心內話用華語講出來無？若講袂出來，就失去誠濟講家己實在的感覺佮心內話的機會。
這馬，我會使台語講啥，手就綴咧寫出來，是誠幸福的代誌。
