我的查某孫２歲外，我想欲𤆬 tshuā伊去參加台語團，有較濟的機會聽、講台語，毋過地點有淡薄仔遠，𤆬 tshuā伊出門誠困難。佇FB台語社團看著一篇鼓勵逐家家己成立團的文章，原來會使家己成立喔!！我就來招一團。
貼佇２个台語社團，無想到，真濟人共我鬥分享。有人來報名，我組一个FB社群，方便聯絡，無用FB的人，另外用line佮伊聯絡。攏總有10家。我的想法是，逐家先熟似，才閣講欲按怎耍。
３月底開始活動，佇公園內底，我的查某孫是奶母𤆬 tshuā去，我有手通提三輪車、滑板車、球等等，大家同齊耍。
公園內底有跙流籠、砄硞枋 khi̍h-kho̍k-pang，有人講khōng翹枋 khōng-khiàu-pang，khong-ka-khiai pang（翹翹板），囡仔走來走去就誠好耍。
逐擺有二、三个，三、四个囡仔來就誠鬧熱，猶有蹛附近來公園耍的，逐家攏會佮in講話，說明阮的團，招in拜一、拜二早起十點來耍。
訂拜一、拜二２工，是想著囡仔攏２歲外，誠細漢，狀況較濟，有２工，來耍的機會較濟。幾若擺了後，發覺，除了拄著落雨愛取消以外，猶閣有囡仔破病、大人無爽快、有代誌、囡仔睏較晚……等等的緣故，就袂當來。
我閣紮細項物仔去，比喻我家己做的沙包，看欲按怎耍？先擲佇一步遠的盒仔內底。閣加彈力帶、畫圖、鉸紙、鉸樹葉仔。我去郊外行路的時，抾樹籽仔、大片的樹葉仔，看in按怎耍，用摃槌仔摃焦的樹枝佮樹籽仔。揣囡仔歌，用打擊樂器綴音樂摃。佇店內看著我感覺好耍的物仔，嘛先買起來攢佇厝內面，有適合的時陣才提出來。
６月24日彼禮拜開始，拜二的時間取消，場地加囡仔的厝內，落雨的時就毋免歇睏矣！
厝內耍的物仔較濟，嘛會使看影片跳舞，毋過上好袂開電視，驚講看袂煞。
誠細漢的囡仔，欲𤆬 tshuā in同齊做啥物代誌是真大的挑戰，我沓沓仔學、觀察、試驗，佮逐家同齊來研究。每一个老母攏會使佮囡仔耍in的囡仔愛耍的代誌。
「台語囡仔團」台北市
時間：拜一早起10:00~11:30
地點：台電大樓附近。看情形佇公園、囡仔的厝內、運動中心的兒童遊戲室
年齡：２歲～讀冊進前
（2024.6.30.）
