【走揣Cháu-chhōe】感動人心ê魔法——繪本ê溫柔胸坎（台語版）

作者：林紀甄
翻譯者：林佳瑩（本篇以台語白話字書寫）

細漢ê時，咱lóng bat讀過一、兩本繪本，彼時雖然猶閣懵懵懂懂(bóng-bóng-tóng-tóng)，但是讀著繪本內ê故事、看著繪本內ê圖片，總是會𤆬咱入去五彩ê想像世界，綴繪本ê跤步開始一場精彩koh奇幻ê冒險。大漢了後，咱bat ê代誌愈來愈濟，予足濟趣味ê物件吸引，mā有真濟現實ê壓力kā咱束縛，「繪本」漸漸對咱ê生活中退出，咱將繪本封存tī記持內底，彼粒赤子之心也綴leh冷落來。

「繪本」這个敢若真熟似koh小可生份ê名詞定定和「囡仔」縛做伙，大部份人ê印象lóng會感覺講「繪本就是予囡仔讀ê囡仔冊。」筆者進前tī圖書館欲借一寡繪本，辦手續ê時，館員看著我手內ê一大疊繪本就好玄ê問講：「厝內囡仔偌大漢--ah？」會有這款反應其實我無意外，繪本ê讀者確實是囡仔，毋過，敢講繪本干焦會使予囡仔看？干焦對囡仔有意義？大人敢真正無需要繪本？筆者會使真堅定ê講，以上三个問題ê答案lóng是：「No！」

筆者就bat tī一門繪本專題課程中，親身體會著繪本迷人ê魔力。當時，教授以「精神分析」ê文學理論分析陳致元ê經典作品《Guji Guji》，故事中毋但呈現出「愛和包容」ê人生課題，koh以「鏡中自我」的圖像，敘述出深沉ê「身份認同」議題。所以，本期「走揣」欲透過筆者ê觀察，配合繪本ê實例，𤆬逐家進入繪本ê世界，做伙揣出咱心中彼个猶未大漢ê囡仔。

因為繪本主要是面向年歲較細ê讀者，所以大部份繪本lóng袂去使用傷困難ê文字，篇幅mā比其他文類koh較短，但是這款看起來敢若較簡單、直接ê敘事方式，顛倒會使傳達出上純然ê意義、連結上幼路ê感受，毋但啟發囡仔，koh感動大人心內上柔軟ê彼塊，喚醒咱藏tī心內ê深刻情感。

來自法國ê繪本《傑布龍的紅氣球》，是teh講主角傑布龍揣伊心愛ê紅氣球ê旅程，和tī過程中所拄著ê朋友。

Tī咱ê人生內底，可能lóng會有一个家己真珍惜、真重視ê物件，咱總是會期待伊永遠袂離開，毋過毋是所有物件lóng永遠袂改變。Tī伊離開彼陣，咱ê生活會雄雄出現一个空，頓時失去倚靠會予咱感覺驚惶，毋過繪本內朋友一直重複一句話：「一个phàng無去，會使揣十个轉來！」予讀者心靈上ê安慰，咱teh追求某一个過去ê物件ê路上，可能會拄著koh較濟人事物，得著真濟咱想袂到ê體驗。這款料想袂到ê相拄，lóng是彼个離開ê物件欲紮予咱--ê，上媠、上好ê禮物。

《傑布龍的紅氣球》ê文字簡單好理解，對囡仔來講，這本繪本可能是teh教in莫驚「失去」，而且珍惜每一段新ê友情，毋過對大人來講，伊提醒咱去注意一寡咱無看見ê美好，𤆬領咱去檢視身邊微小ê事物，伊紮予咱溫暖ê感受和鼓勵，安慰每一粒驚惶不安ê心。

大部份人掀開繪本ê時會遵照家己ê閱讀習慣，直接將注意力khǹg tī文字頂懸，毋過有ê時陣，文字無法度表達一切，講了傷明可能會予故事失去想像ê空間，透過圖像ê設計kah安排，無論是線條、色水、明暗、大細、形狀、位置、甚至是人物ê表情，lóng會當影響故事ê調性，毋但予故事更加幼路、mā使故事ê層次加真豐富，siāng時𤆬領讀者投入繪本ê氛圍。

繪本定定tī文字敘述有小可保留，藉圖像來予讀者線索，引𤆬讀者去探尋／巡圖像ê祕密。因此，精彩ê圖像是繪本無法度欠缺ê重要元素，若是咱干焦讀文字，可能會減看著真濟線索，和藏tī圖像內底ê幽微情緒相閃身。

舉韓國插畫家劉智娟（유지연）ê創作《媽媽的畫像》做例，這个繪本以真鮮明ê畫圖手法，展現出兩个無仝ê女性形象。倒手爿暗沉鬱卒，人物無任何表情，所有事物lóng tī畫框內底，這時ê伊面容無光，煞是世人公認ê「好媽媽」；毋過正手爿煞是光明燦爛，大大ê笑容和繽紛ê色彩照出畫框，這時ê伊光采美麗，有家己ê夢想和追尋。兩爿ê圖像強烈對比，將「母職」和「自我」之間ê搝抐完全呈現。毋過若是咱斟酌觀察規本繪本，會當發現兩爿其實相呼應，毋是完全無交插，koh較予咱驚喜ê是包括封面和封底lóng有真濟細節，作者無說明遮ê細節代表啥物意義，留予讀者家己思考、解說ê空間。

/

繪本親像一首無主旋律ê樂章，文字和圖像分別leh講家己ê故事，創造出和諧ê旋律煞袂互相干擾，又koh會使互相支持，兩个siāng時是獨立ê存在koh會使相結合，文字無講完--ê，會使tī圖像內底揣著；圖像內底落勾--ê，會使用文字來添補。雙向ê互動關係予繪本koh較濟可能性，也予繪本變了koh較精彩、豐富。

繪本到底lóng teh講啥leh？咱koh會使tī繪本內底看著啥物？以下咱會透過兩本台灣原創繪本《我們去釣魚》、《花地藏》，𤆬逐家來看繪本所蘊藏ê柔和力量。

生態繪本作家邱承宗ê作品《我們去釣魚》書寫一位阿爸𤆬囡仔去釣魚ê故事。藉著四季ê變化將人和人之間牽起連結，siāng時暗示人和環境之間微妙ê關係。

春天，阿爸𤆬囡仔去釣魚，囡仔看著魚真樂暢；熱天，囡仔小可大漢--ah，伊對阿爸khǹg tī伊肩胛頭ê手感覺無自在；秋天，囡仔又閣大漢一屑仔，阿爸恬恬聽囡仔講伊ê理想；寒天，阿爸干焦tī記持內，囡仔mā做了爸爸，伊想著明年春天，就會使聽見彼句「行，咱去釣魚！」。

繪本恬靜ê氛圍，強調出時間ê流動。囡仔大漢--ah、魚仔mā大漢--ah；囡仔成做爸爸，魚仔mā孕育(īn-io̍k)後一代，紲lòe，大漢、生湠、新生……人類ê生命歷程(seng-bēng-le̍k-têng)不斷循環，將頂一代ê一切傳承予後一代，就算繪本內底無講著親情抑是愛，讀者猶原會使深深感受著人和人之間情感ê傳遞(thoân-tē)，自然界也一直leh運作這款歷程，展現出人和自然界長流水ê生命力，這款相siâng ê所在予人kah環境產生連結。Tī《我們去釣魚》中koh有真濟細節，值得咱沓沓仔閱讀、慢慢仔思考。

繪本作家兼譯者ê海狗房東和繪者楊文正合作ê《花地藏》，描寫一粒石頭ê心聲。

伊原本有滿腹ê自信，就算簸落山頭hŏng人踏、予刻石師敲，伊lóng忍受疼痛，相信家己一定會hŏng刻做世界第一ê佛像。毋過石頭最後變做一尊小小ê地藏，胸坎甚至koh破一个空，伊漸漸失志，敢若永遠袂有希望。日子一工一工過去，風將沙和種子紮來，地藏胸坎前ê空竟然開出一蕊花，雖然毋是世界第一ê佛像，也無受著萬人敬拜，但是伊成做一位老阿媽心靈ê倚靠，甚至變做其他小地藏崇拜ê對象。

抱著理想和滿腹ê熱情，雖然現實ê打擊予咱受傷，毋過咱學會曉勇敢、變了堅強，總是最後咱發現，tī這个開闊廣大ê世界，家己干焦是一个微小ê存在，咱失去方向，規个人愣愣(gāng-gāng)。毋過《花地藏》予讀者一个重新揣著家己自我價值ê機會，tī咱感覺幽暗ê時期，成做照光咱內心ê光線，予咱繼續向前ê力量。Tī封底彼句：「沒關係，再硬的石頭也會痛。」變做咱心靈ê引𤆬，予咱無需要koh假做堅強，通好好看待心中ê各種情緒，老實面對家己。

/

閱讀繪本是一个對話ê過程，咱會使對個體ê小故事內底，看見人和世界ê奇妙連結；對廣闊ê世界中，發現tī世界中走傱ê個體ê身影，甚至，咱會使tī繪本內揣著家己。

繪本會使像詩充滿韻味、像小說奇妙曲折(khiok-chiat)、像散文倚近生活，繪本mā會使是一台神奇ê攝影機(liap-iáⁿ-ki)，毋但紀錄人身軀邊所發生ê一切，也起造出咱心中超越現實ê想像。Tī繪本ê世界內，咱會使用真心ê眼光、盡情感受所有細節、讀出家己ê解說。

繪本內有足濟「料想袂到」，對情節ê推展、文字ê運用、圖像ê排列到蝴蝶頁ê設計，lóng有真濟奇巧等待讀者去搜揣，遮ê「料想袂到」將繪本一層一層堆疊，leh讀ê時，你會雄雄發現，繪本內ê故事竟然kah家己ê生命經驗遐爾相siâng，原來繪本傳達ê意涵比你想--ê koh較深刻。

[1]海狗房東，〈這些繪本說的祕密語言，你看見了嗎？──海狗房東讀5本「大人繪本」〉，博客來OKAPI閱讀生活誌 一起看圖文，2018.03.13，取自https://okapi.books.com.tw/article/10703。