我這馬去市場買菜的時陣，儘量講台語，毋過拄著少年人，猶原講華語。
３月時去注疫苗，本來無愛注，因為我老母過身，欲去殯儀館，想到殯儀館人濟，好啊！去注射。第一劑時，領到五百箍的Seven商品卡，分兩百箍予陪我去的第二查某囝。
４月注第二劑，領到一千箍，呼！遐爾濟，一个囡仔分三百箍，其他的我自己用。欲佇Seven買啥物物仔？只有咖啡爾爾。今仔日，提一个保溫杯去買，我共店員講：「熱美式。」
伊問：「大杯嗎？」
「是。」
「要等３分鐘，因為在洗機器。請妳稍等一下。」
「好。」
我聽著伊佮另外一个店員講台語，講真輾轉，嗯！按呢會使佮伊講台語。
我佇店內踅踅咧！提一罐無糖的豆奶欲閣買，「再買這瓶。」猶原是華語，唉！欲講台語真無簡單啊！尤其佇這款的店內，閣拄著少年人。愛閣練習。
台文查這裏
