趣味的屏東本位台語教材
佇面冊有讀著一段文字，咧講台語應該毋是用推廣的方式、是用復振的方式才著，想想咧嘛有影！毋是欲共推銷新的物件，是共以早就有的物件、語言佮文化，重搝來逐家面頭前，誠符合字詞「復振」的意義。一直到這馬台語愈來愈時行，沓沓仔看著台語這个語言背後，彼種自然會唌人的文化，應該就是對在地本土文化價值的認同有較提升。
屏東本位教材六冊
屏東台語電子教材(互動電子書)112.07
屏東本位台語教材(PDF)111.12
教師手冊112.07
今年屏東縣政府教育處佮里港國小做伙出六本國小的電子冊，教材內面的語詞、語句足有屏東的特色，佮台北無仝、佮台南無仝。毋是咧講古早、古早毋捌接觸過的物件，是生活當中看會著、食會著、聽會著的，真符合課綱所講的，對囡仔來講閣較生活化的教材，台語這个語言所特有的文化就透濫佇課本當中。枵饞的我，那看第一冊就那開始研究紅肉李、芭樂、西瓜、蓮霧是出產佇屏東佗位？看著原來『牛蒡』和『小黃瓜』寫做「梧母」佮「瓜仔哖」。閣較特別的是這套電子冊比紙本的好耍，會使共圖點開看甲明明明，音檔點開直接聽課文是按怎唸。一面聽囡仔唸課文的聲、一面看屏東特色的圖，有一種講袂出喙的感動，屏東囡仔真幸福呢！
這予我想起幾年前，台南畫家胡乃七畫真濟光批，光批頂面的圖攏是台南各區的特產佮物種。若會當共每一个特產用短短的文字小可說明一下，用按呢的光批來紹介台南應該嘛會足好耍的。
第二冊開始有講著厝的隔間、方位、會佇厝做的代誌；嘛有親情、二九暝、過年會食著的菜，教材內底關係著日常生活的主題攏齊有。上唌人的是：彼屏東的好食物，屏東在地的食物佮煮法，真特別！有的物件是我這个臺南人毋捌食過的。這兩本冊講的就是生活，和日常會接觸著的人、事、物，真適合一、二年仔的學生來認捌家鄉。
第三冊開始有電子冊本身的廣告，幾秒就出來一擺，予我感覺小可仔齷齪。毋過，我為著欲聽音檔，就喙齒根咬咧，將一直出現的廣告揤掉，繼續聽落去。佮前兩本以家庭為主的冊比起來，這兩本較偏向社區、節日佮文化。夜市文化、燒金紙、尖炮城、搶孤，佇別的版本的教材干焦當做語詞講過、教過去爾爾，佇屏東的台語課本顛倒是成做課文內文探討的主體。若是有別種版本的國小台語冊會使提出來對照看覓，無的確會有無仝款的教學想法！閣來就是第四冊課文講著瑯嶠，開始講屏東舊地名，尤其有一个所在真趣味，號做蚊蟀(唸做蠓捽???)原來伊佮蠓捽無關係，是對原住民語『Manutsuru』翻譯過來的。了後講著溪仔、海沙埔、坐火車，對家庭拓展到社區、邊仔的自然環境。
第五冊內容誠趣味，可可仔也編入課文內底，物產、𨑨迌物仔、在地的景致、產業，佇課文內底攏看會著。我若是學生，一定對遮的內容會感覺趣味。第六冊用音樂起鼓，紹介「半島民謠季」佮〈月光掖佇東門城〉、〈若是到恆春〉這兩條描寫恆春的歌，閣煞落是講野球運動、講海洋的生態、拓展到世界無仝款的文化，路尾用一篇畢業的主題散鼓。
這套教材對個人、家庭、社區到世界，一步一步擴展的編寫方式，真完整。每一本冊攏有六課，一本教一个學期，閣有宿題通好練習。那看冊那感覺著台語文化的媠，使人感動的物件應該就是彼在地的「文化」，予較濟學台語的人會當體會著屏東在地文化的趣味。除了日常的常識以外，統整社會課舊地名、地形的智識，結合屏東的音樂藝術、在地的節日，真正是一套有夠屏東的台語課本。屏東人會當深入了解故鄉，別縣市的人嘛會當閣較了解屏東。
這馬電子冊開放予逐家攏會當看著，唸課文朗讀的囡仔聲音色媠、發音閣標準，互動式電子冊真好耍，對學生的認知能力有真大的幫贊，教材內底課文、語詞、語句的揀選攏真讚。毋管是學生、家長、社會人士欲學台語、欲了解台語文化，攏是真好的參考資料。若是老師欲教冊，嘛會使參考教師手冊，就會當知影按怎教這套教材會閣較趣味。
