德國電視台 Der Tricks 抑是 Marktcheck 有一集討論 teh 討論德國若坐飛天車 ê 物價，比如講這禮拜雞襟胸 1 公斤 7.99€，下禮拜 1 公斤 12.99€，然後廠商講遮 ê 價數是一月日 ê 固定價數 hōo gún 翁開始傳世佛經，世世(踅踅)唸「你款物愛斟酌繩前後禮拜。」
巴禮講道，家己攏著，我無興跟綴伊起情緒蛟龍來一个「信這，死了無了拜」就 kā 廚房款 ê 物逐條仔逐條算 hōo 伊參考；串仔罐頭烏露戰爭進前是 0.99€，特價 0.79€，烏露戰爭按 1.29€ 漲懸價到 1.69€，現此時停跤 tī 1.49€，特價 0.99€ ~ 1.19€，串仔罐頭莫 kā 烏露戰爭帶來 ê 運輸算在內，現此時 ê 串仔愈來愈少，起價是合理，總是起甲 1.69€，這交臺灣飼牛業相𫝛按𪜶遐出來是 30 箍台票，行到超市超過 100 箍，這中間 ê 70 外箍，運輸、通路敢有遮爾仔框金，以運輸 15%，通路 15% 來算，猶是無到 70 外箍 ê 消費者價值，總是這个消費者價值就 tshan-tshiūnn 恁認為 ê 俗價，我認為 ê 無價值仝款隨人認定，總是食物這件代，我無遐爾仔無頭腦，畢竟錢四跤我 tsiah 兩跤。我 mā 無總舖師幻想，掠做廚房有厚甲若蠓 ê 家私就𠢕出菜。
串仔算了換雞襟胸，雞襟胸算了無興閣算 hōo 伊捌，「我是活 tī 現實世界 ê 人 m̄ 是活 tī 乞食攑蠓捽，假仙假觸，盤仔假赤鯮。」本底掠做家己正港是過橋較 tsuē 牽手行路，食鹽較 tsuē 牽食米 ê 伊，鼻仔摸摸挲挲莫閣指正牽手捌算 m̄ 捌除，糶米糴番薯。
高職進前，臺灣猶無時行家樂福、全聯遮 ê 連鎖賣場，高職畢業臺灣時行若家樂福大賣場 ê「萬客隆」uī-tio̍h 有才調繼續升學讀二專先去做穡趁所費 ê 我 tsiah 有機會踅菜市場交𥴊仔店以外有貼價數單 ê 賣場。 正港出社會遠東愛買、家樂福、大買家齊出場，我猶是佮意踅菜市仔，起因賣場交菜市仔 ê 價數無宛 2 體，唯一 ê 精差是環境無遐爾仔四序，m̄-koh 人情味飽滇甲捷捷有無料 ê 九層塔、蔥仔、芫荽佮總舖師食譜。因為這个採購慣勢 hōo 我認風颱前、風颱後價，著時 、無著時價交過鹹水這三款價數。
我這款慣勢來到市仔物比超市物閣較框金 ê 德國誠實 hōo 我捌算 m̄ 捌除，糶米糴番薯，不過我 m̄ 是田螺巡舊逝，較行 mā 彼逝 ê 性地，我佮伊人送我魚，不如教我掠魚，所致跟綴德國人 ê 慣勢學習斟酌繩公斤價，總是我猶是行 buē 出一見著過鹹水 ê 物，像藍莓、洋刺波隨捌算 m̄ 捌除，糶米糴番薯，總是這款山豬 m̄ 捌食過米糠 ê 現世代真久 m̄ 捌出現，起因我 kā 遮爾仔硬篤 ê 工課交 hōo gún 翁去處理，抑是出手進前請教伊「這斗 ê 價數敢敆恁德國脾土？」
不過這款請教 mā 有例外，像一回兩人做陣 tī Aldi 款菜，我見著西班牙來 ê 木瓜，體格交價數交咱臺灣無宛 2 體隨款一粒囥入捒車，伊隨傳世佛經，世世(踅踅)唸，我造塔造到透尾 kā 木瓜照常款轉來厝，不過轉來厝進前刁意故踅去 bué 氣氛 ê REWE hōo 伊參考比西班牙木瓜閣較細粒子 ê 巴西木瓜偌爾仔框金閣包銀 mā hōo 伊看𫝛款是非洲來 ê 木瓜是 Canary 島 ê 幾倍價數，證據攢明明峇微仔笑 tuì 伊講「這價數交臺灣無宛 2 體，我無 m̄ 管三七二十一，烏白亂 bué」。
自中國無閣投講三文魚得肺炎，挪威三文魚 hōo 我錢僫到，等伊緊老 ê m̄ 捌閣敗價。猶未行踏挪威進前我誠愛做茶鈷呻德國 ê 挪威三文魚是漲懸價，探訪挪威我褒嗦德國挪威三文魚是俗物 buē 食破家。探訪三文魚 ê 故鄉一月日，我 kan-ta 食過一斗冷凍三文魚。這尾冷凍無分切做塊 ê 三文魚，伊 ê 價數比德國鮮沢交切做 125g 一人份 ê 三文魚閣較框金 ê 驚死人。
挪威 ê 娘仔瓜、Kam-má-tooh 等等熱人家己出產 ê 菜蔬框金閣包銀我理解，畢竟遮 ê 菜蔬需要洋爐 kā 𪜶鬥相共，不過自本就生活 tī 寒帶 ê 三文魚敢愛洋爐？寫著這點我 tuì 挪威 ê 物價定律真正捎無摠。平平是按挪威來 ê 冷凍花枝佮串仔塊，瑞典 ê 價數 mā 比挪威當地俗數，呔討按呢生？
「敢 bueh 繼續上北挪威探訪」翁知影我 ê 問題那享受這出菜那刁意故問。
「挪威自然環境清幽迷人，總是我屬世俗人兼褲袋仔袋磅子，我真認份知機我 tuì 伊 ê 愛捙拚 buē 過脾土。」
我 tuì 挪威短短一月日 ê 印象是，𪜶 ê 露營地四序甲 hōo 我感覺褲袋仔總算免閣袋磅子 ê 大碗閣滿墘滿意甲，其他 ê 事項，看一擺心酸一擺，我呔遮爾仔散赤。
今年 ê 咖啡因為氣候、減少種作 hōo 伊漲懸價，挪威三文魚 mā 捌公告今年愛漲懸價 mā 確實有調整價數，不過伊漲懸價 ê 因由無公告，歐洲人 mā 敢若較無啥 teh 食三文魚，畢竟地中海 ê 魚臊無比北海少，所致挪威三文魚按一公斤 23€ 又閣踅翻頭轉來到一公斤 14.99 ~ 18.99€ ê 隨在廠商喝價。
目今 ê 德國三不五時 ē 進地中海地區 ê 冷凍鰮仔魚抑是東海地區 ê 小白銀魚(Sprotten)一公斤無到 5€ 食幾仔頓飽交有飽滇 ê Omega-3 hōo 我 tuì 伊較無遐爾仔金金相抾寶。
這斗下班交翁約好做陣踮 Lidi 相等款菜，伊猶未到位我已經趖入 Lidi 揣寶。
「這一公斤 12€ 無俗價--neh」見著我 ê 捒車有八塊切做一人份 ê 三文魚，伊開始傳世佛經，世世(踅踅)唸，我 kā 捒車交 hōo 伊斡頭去揣一尾無切塊一公斤 17.99€ ê 特價三文魚 hōo 伊參考兼選擇。
「當然 mā 捒車這份三文魚」伊隨 kā 17.99€ ê 三文魚捾踮手頭斡頭行去冷藏櫃囥好勢，行轉來講媠某𠢕扞家。
「我是 m̄ 驚 bué 俗物，起因我從來 m̄ 捌認為俗物是紅龜包鹹菜，無好貨」我文文仔笑應。
「我是 m̄ 是」伊司奶仔講。
Gún 翁 tī 向時是 m̄ 食日期包裝 kiōng-bueh 透底 ê 物，因為伊講「食遐無健康」，tī 臺灣齊是𥴊仔店 ê 年代，我 tuì 食物 ê 印象是按外表、氣味來決定眼前 ê 食物是紅龜包芥菜抑是鹹菜 ê 無好貨，畢竟我 ê 世界無加工品，準做有 mā 是大姊按市區轉來紮寡西洋食物，像 Há-muh 這類，所致伊講 ê 食健康交無好貨在我眼內是巴禮講道，家己攏著 ê m̄ 免人人 tsuē 話，三色人講五色話 ê 伊一人講準算成做𪜶爸母 ê 大石頭硩毛蟹。總是我 m̄ 是毛蟹通 hōo 伊照𪜶兜傳統來行，所致伊 ê 較橫蔡牽食食磺火燈 tuì 我無應效，總是大腹肚攏褲 mā 無可能放外外，畢竟我按算交伊好好 kā 這世人 ê 相欠債算 hōo 清。
一日翁仔姐做陣出門行尞搪著伊支持 ê Fairteilr 公平相分 Food Banked hōo 我揣著食著藥，青草一藥來解決伊愛踮肚臍空內點目藥水 ê 問題。
「你感覺無寫到期日 ê 麭敢有問題？」我 kā 公平相分 ê 烏麥仔麭挲做麵包丸子做早起頓 hōo 伊食，伊恬靜無出聲，自彼日過期物踮 gún 兜 m̄ 是問題，除了價數，這點到今我猶 teh 人參殺人無罪，大黃救人無功，對症下藥 hōo 伊理解熟枝食青枝，緊枝食慢枝，若熟拄熟食智識。𪜶爸母 ê 青枝、慢枝、緊枝 kan-ta 有才調食伊，無才調食我。
三文魚敆北非小米，美味しい。
