Lō͘-se-a侵lio̍k烏克蘭，現chú-sî teh phah ê戰爭，m̄是只有看ê tio̍h ê飛彈、炸彈kap chhèng-chí niā-niā，siōng重要--ê就是chu-sìn（資訊）戰。因為科技進步，tāi-ke lóng 會用手機 á看消息，這tiō代表宣傳真重要。
Chit sî，nā有人製造假消息，hō͘ lán相信敵人有贏面，lán tiō算bē輸，mā免戰就投降--ah，敵人甚至m̄ bián用一兵一炮就ē-sái占領台灣。若是對敵ê雙方lóng是使用kāng款ê語言，án-ne，資訊戰就koh khah好phah--ah，因為是不是假消息tiō koh-khah phái分辨。所以，lán若有這種警覺，咱就ē知影beh án-chóaⁿ來抵抗敵人ê假消息，m̄是ē-sái ho͘人chhìn-chhái騙kā lōng-lōng-se̍h-- ê。
目前ê台灣是中國kâm tī喙裡，iá-bē吞chia̍h落去ê肥肉。 這幾年來，中國一直teh kā全世界宣傳kóng，台灣是in ê，tī in ê「一中架構」框架中，siáⁿ人lóng bōe-sái kap中國搶台灣。中國認為，台灣m̄是台灣--ê，台灣是中國--ê。過去ê台灣，tī蔣介石ê操作下，lán聽到--ê lóng是蔣介石leh kā lán放ê假消息，kóng siaⁿ-mi lán lóng是in中國人，久來，lán台灣人ka-kī就放棄beh作台灣人--ah，sīm-chì忘記leh lán ka-kī是台灣人。
台灣人七十gōa年來hō͘人教作是中國人，hit kóa Kā lán台灣人教作是中國人ê人，in 是koh khah bē認同ka-kī是台灣人，in 自早以來就認同ka-kī是中國人，所以in kap中國人khiā作夥，甘願死mā bô愛作台灣人，in kan-nā beh ti̍h台灣人ê選票niā-niā。自來in就是壓迫台灣人ê人，頭殼內kap習近平kâng-khoán，lóng是看民主kap自由kan-na豬屎leh。
In認為ka-kī是中國人，作中國人比民主kap自由koh kha重要，所以in nā聽到台灣人beh作台灣人，in tiō khí phùi-bīn，bē輸lán台灣人欺負in gōa thiàm--leh。 過去台灣人hō͘ in騙七十kúi年，kàu-taⁿ iah koh有真chē tī台灣ê中國人beh壓制lán台灣人作台灣人，lán台灣人若lóng bô防備，m̄免10年， lán就會hō͘人chia̍h死死、 吞了了， chhun bô 1 tè骨，koh khah免kóng siáⁿ-mih民主kap自由。
為tio̍h ài有台灣人ê認同這點，台灣政府對國家母語，就應該ài用國防ê標準來看待，m̄是 kan-nā用做人情ê心態來補助。因為使用母語變成是lán抵抗敵人假資訊ê武器， mā是認同台灣ê重要基礎。
戰爭ê時，真簡單lán就ē-sái辨識， 若ē-hiáu kóng ka-kī母語--ê就是ka-kī人，nā bē-hiáu kóng母語--ê，就不是ka-kī人，kam不是尚重要ê分別？台灣人kóng台灣話，kóng原住民話 ，講客話，才有法度分辨假消息，分別敵我，án-ne mā才有可能建立敵我ê意識。
現在台灣一部份ê人，tī台灣大漢，拒絕學台灣ê話，mā bô beh做台灣人。按呢中國人若beh放假消息，beh統戰台灣，就真簡單。這tiō表示中國騙lán台灣人ê成本是零，in ē-sái kā台灣人放假消息，反正台灣人也分辨bōe出是台灣政府放ê消息iah是中國政府放ê假消息。咱台灣人已經hō͘中國人屠殺數萬人過--ah，70 kúi年後，kám-kóng咱就koh hō͘現在hit邊ê中國人koh再屠殺1 pái？
想beh做中國人ê中國人，in根本tiō無需要學台灣ê話，因為in認同中國人，戰爭ê時，in kap中國tàu khang放假消息，是tú-hó niā-niā，但是lán若是真正beh抵抗敵人，咱就愛開始建立清楚ê敵我意識，lán tiō ài學母語。
弱國人民bô悲觀ê權利，tiō 親像現在ê烏克蘭kâng-khoán， ài學ka-kī ê母語，相戰ê時，lán才有才-tiau保護ka-kī ê國家，才bōe去hō͘敵人ê假消息phah倒。
