詞：張嘉祥 Tiunn Ka-siông 曲：張嘉祥 Tiunn Ka-siông、朱雨民 編曲：朱雨民
天 已經清光光
你 前跤踏出門
講今日當好時
招阮出門散散心
我想無
哪會毋綴你來去
你敢有
閣來的清光的日子
Thiⁿ, í-keng chheng-kng-kng
Lí, chêng-kha ta̍h-chhut mn̂g
Kóng kin-ji̍t tng hó-sî
Chio gún chhut-mn̂g sòaⁿ-sòaⁿ-sim
Góa siūⁿ-bô
Ná ē m̄ tòe lí lâi-khì
Lí kám ū
Koh-lâi--ê chheng-kng--ê ji̍t-chí
寒天水冷清清
厝內只有阮精神
三千箍 我已經還
米嘛有夠用
Kôaⁿ-thiⁿ chúi léng-chheng-chheng
Chhù-lāi chí-ū gún cheng-sîn
Saⁿ-chheng kho͘, góa í-keng hêng
Bí mā ū kàu-ēng
你轉來彼一工
阮䖙佇眠床頂
神明廳紅赤赤
厝後一陣一陣
Lí tńg-lâi hit chi̍t kang
Gún theⁿ tī bîn-chhn̂g téng
Sîn-bêng-thiaⁿ âng-chhiah-chhiah
Chhù āu chi̍t-chūn chi̍t-chūn
天是清光 日是好日
是哭阮是哭阮
你跍佇遐啊
毋願起身啊
一陣一陣
Thiⁿ sī chheng-kng, ji̍t sī hó-ji̍t
Sī khàu gún sī khàu gún
Lí khû tī hia--ah
M̄-goān khí-sin--ah
Chi̍t-chūn chi̍t-chūn
觀音菩薩救苦救難
踅啊踅 轉啊轉[1]
Koan-im-phô͘-sat kiù khó͘ kiù lān
Se̍h--ah se̍h, tńg--ah tńg
你轉來彼一工
倒佇四人扛的床
神明廳烏嘛嘛
厝內一陣一陣
Lí tńg-lâi hit chi̍t kang
Tó tī sì-lâng-kng--ê chhn̂g
Sîn-bêng-thiaⁿ o͘-mà-mà
Chhù-lāi chi̍t-chūn chi̍t-chūn
天是清光 日是好日
是哭阮是哭阮
阮跍佇遐啊
毋願起身啊
一陣一陣
觀音菩薩救苦救難
踅啊踅 轉啊轉
Thiⁿ sī chheng-kng, ji̍t sī hó-ji̍t
Sī khàu gún sī khàu gún
Gún khû tī hia--ah
M̄-goān khí-sin--ah
Chi̍t-chūn chi̍t-chūn
Koan-im-phô͘-sat kiù khó͘ kiù lān
Se̍h--ah se̍h, tńg--ah tńg
轉來厝內 揣囝兒序細
看𪜶睏佇眠床
Tńg-lâi chhù-lāi, chhōe kiáⁿ-jî sī-sè
Khòaⁿ in khùn tī bîn-chhn̂g
拜請拜請
拜請觀音菩薩
拜請文殊菩薩
拜請地藏菩薩
拜請拜請
Pài-chhiáⁿ pài-chhiáⁿ
Pài-chhiáⁿ Koan-im-phô͘-sat
Pài-chhiáⁿ Bûn-sû-phô͘-sat
Pài-chhiáⁿ Tē-chông-phô͘-sat
Pài-chhiáⁿ pài-chhiáⁿ
拜請嘉義盧炳欽
安心放下保萬民
厝內序細攏平靜
目屎袂落林秀媚
有時你會哭規暝
有時你會坐桌頂
等𪜶彼工攏落去
菩薩面前講予明
Pài-chhiáⁿ Ka-gī Lô͘ Péng-khim
An-sim pàng-hā pó bān-bîn
Chhù-lāi sī-sè lóng pêng-chēng
Ba̍k-sái bē lo̍h Lîm Siù-bī
Ū-sî lí ē khàu kui-mî
Ū-sî lí ē chē toh-téng
Tán in hit kang lóng lo̍h-khì
Phô͘-sat bīn-chêng kóng hō͘ bêng
拜請陳澄波
拜請蔡鐵城
拜請盧炳欽
拜請拜請 退駕
Pài-chhiáⁿ Tân Têng-pho
Pài-chhiáⁿ Chhòa Thih-sêng[2]
Pài-chhiáⁿ Lô͘ Péng-khim
Pài-chhiáⁿ pài-chhiáⁿ, thè-kà
2021年發行於裝咖人 Tsng-kha-lâng《夜官巡場 Iā-kuan Sûn-tiûnn》。
[註解]
- 原歌詞誤植為「踅矣踅 轉矣轉」。
- 原作品將「鐵城」唸Thih-sêng，但應為Thih-siâⁿ。
林秀媚是228受難者盧鈵欽之妻。
