本集緊接《小麥子創富號漂流記 04》：18分08秒的倒數(上) 故事
___________________________________________________________________
四【高潮：奇點重疊】
兩個宇宙嘅時間，喺呢一刻被壓縮成一條線。畫面以最快、最急促嘅節奏瘋狂切換：A線 (創富號)：倒數計時【00:10】
隕石同能量流組成嘅死亡星雲喺窗外急速放大。琪琪絕望地拍打住冰冷嘅控制台，淚水奪眶而出，佢用盡全身力氣，向住艦長席上嘅背影大嗌：「爸爸——！」 艦長席上，麥田健二嘅背影紋絲不動，佢嘅雙手依然死命緊握住早已失靈嘅手動舵盤，試圖做最後嘅掙扎。
B線 (地球)：倒數計時【00:09】
一個荒唐嘅念頭閃過阿華腦海：如果，呢道門可以去到任何地方……係咪可以去到Game Boy 38號遊戲只聽到叮叮聲嘅世界？去到一個冇爭吵、冇過錯嘅地方？
A線 (創富號)：倒數計時【00:08】
所有努力宣告失敗。琪琪脫力般癱喺控制台前，望住窗外無法挽回嘅末日景象。喺死亡降臨前嘅絕對寂靜中，阿華嗰句「我鍾意你啊！」突然喺佢腦海中迴響，無比清晰。佢再次望向艦長席上嘅爸爸，喺搖晃嘅燈光下，佢睇到爸爸回過頭，眼神跨越咗短短嘅距離，充滿住父親對女兒最深沉嘅愛意、不捨同歉意。
B線 (地球)：倒數計時【00:07】
企喺「188隨意門」前，阿華深吸一口氣，顫抖嘅手，慢慢伸向門柄。
A線 (創富號)：倒數計時【00:06】
喺劇烈嘅震動同混亂中，星際難民阿華被人潮推撞，佢回頭望向艦橋上嘅琪琪，眼神跨越混亂，充滿咗嚟唔切講出口嘅擔憂同愛意。 「原來，我從來都冇機會回應佢」……琪琪嘅眼淚終於決堤。佢唔係為咗死亡而喊，而係為咗呢份嚟唔切回應嘅遺憾。
B線 (地球)：倒數計時【00:05】
Kitty終於追入故事館，當佢見到細佬正要踏入嗰道詭異嘅門時，佢驚恐地大嗌：「阿華，唔好啊——！」
A線 (創富號)：倒數計時【00:04】
唔！就算係最後一刻！琪琪猛然抬頭，望向阿華嘅方向，想大聲回應佢。但佢嘅目光再次同父親投嚟嘅堅定眼神交匯，千言萬語，都喺呢一剎那化為彼此嘅理解。
B線 (地球)：倒數計時【00:03】
阿華嘅指尖，觸碰到「隨意門」冰冷嘅金屬門柄。
A線 (創富號)：倒數計時【00:02】
喺被白光吞噬嘅前一剎，琪琪嘅腦海中只剩下一個念頭，一個對阿華無聲嘅回應：「我都係……」
B線 (地球)：倒數計時【00:01】
阿華把門推開，踏出咗改變一切嘅嗰一步。一道耀眼金橙色光茫散射出來！
A線 (創富號)：倒數計時【00:00】
接收到爸爸眼神中嘅一切，琪琪用盡最後一口氣，望住佢嘅身影，輕聲但清晰地講：「……爸爸，我愛你啊……」
五【結局：迴響與誕生】
奇點爆發
喺地球，「魔幻奇蹟遊樂場」嘅一角，當阿華踏入隨意門嘅瞬間，整個「奇蹟故事館」被一股難以形容嘅光芒籠罩，然後瞬間恢復平靜，彷彿一切都冇發生過。鏡頭一轉，喺阿華嘅屋企，媽媽喺廚房煮緊飯，Kitty喺房同男友講電話，而阿華就坐喺客廳，專注咁打緊佢部38號GAMEBOY遊戲。一切，都好似回到了佢哋嘅日常。
擱淺的方舟
同一剎那，喺遙遠嘅木星星雲第38區。
創富號被一股遠超預期嘅強大引力高速扯向木星星雲帶。失去動力嘅船體猶如一架失控嘅滑翔機，以一個極其危險嘅角度切入密集嘅碎石區域。
伴隨住一連串沉悶而劇烈嘅衝擊，船底同機翼喺無數碎石上刮出刺耳長鳴，火花沿住船身瘋狂濺射。喺呢種致命嘅「滑翔」狀態下拖行咗近千米後，創富號終於耗盡所有動能，重重擱淺喺星雲深處。
船身損毀嚴重，艦首同艦尾被撕開巨大嘅傷口，暴露出扭曲嘅內部結構，但主體骨架依然頑強地維繫著殘存嘅整體。主動力爐喺最後一次閃爍後徹底熄滅，整艘船喺連串嘅內部爆炸同金屬扭曲嘅悲鳴聲中，最終徹底沉寂。
喺撞擊嘅核心區域，琪琪錄音用嘅嗰個軍規級「黑盒」，喺巨大嘅衝擊波中，意外成為一個奇點嘅載體。佢瘋狂吸收住撞擊嘅所有物理能量、以及……琪琪喺最後一刻嘅恐懼、不捨、同埋佢完整嘅聲音、肉體、甚至靈魂。
一切都被數據化，壓縮，封印喺呢個細小嘅金屬盒之內。
【咫尺天涯的廢墟】
意識，係由一陣劇烈嘅耳鳴同嗆喉嘅濃煙中被強行拉返嚟嘅。
阿華猛烈地咳咗幾聲，每一次震動都牽扯住頭部裂開一樣嘅劇痛。佢撐起身體，發現自己半邊身被壓喺一塊變形嘅控制台碎片下面。
眼前嘅一切，令佢嘅心瞬間沉入冰海。
呢度……仲係艦橋嗎？
熟悉嘅巨大觀景窗已經消失，取而代之嘅係一個猙獰嘅破口，外面係死寂嘅星空。天花板大面積塌陷，將艦橋砸成一個堆滿扭曲鋼筋同斷裂纜線嘅迷宮。垂落嘅電纜不時爆出垂死嘅電火花，係呢片黑暗中唯一嘅光源。
佢記憶嘅最後一格，係琪琪喺控制台前蒼白而絕望嘅臉，同埋自己用盡全力吼出嘅嗰句告白。
「琪琪！」
喉嚨沙啞地擠出呢個名字，成為佢喺呢片廢墟中唯一嘅執念。佢用盡僅餘嘅力氣，想推開壓喺身上嘅殘骸，想爬向記憶中琪琪所在嘅方向。但係，身體嘅劇痛同失血帶來嘅暈眩，令佢眼前嘅景象開始扭曲、旋轉。
佢只係掙扎咗一下，就再也支撐唔住。最後一絲意識，停留喺琪琪個名嘅微弱迴音之中。隨住眼前一黑，阿華重重咁失去知覺，成個人癱倒喺冰冷嘅鋼鐵廢墟之上。
六【最後一幕】
喺扭曲嘅金屬控制台上，嗰個啞黑色嘅方塊，亦即係嗰個黑盒，靜靜地躺喺一堆燒焦嘅零件之間。突然，它播放出最後一次琪琪的錄音……
「……奇蹟故事館……我要飛走個個成日鬧阿女、完美主義者、要求多多、寫篇故故事都改幾十次嘅爸爸！有佢冇我！個名有佢嘅話，我就以後唔幫佢寫嘢！呢個本來就係我哋兩父女一齊合作㗎嘛，依家功勞佢攞曬……所以呢個部落格個名，一定唔可以有佢！所以個奇蹟故事館唔係佢嘅，係我嘅……」
「……爸爸，爸爸……」
「……爸爸，我愛你啊……」
錄音結束，黑盒發出「咯」嘅一聲輕響。盒身上代表運作嘅微弱綠燈，頑強地閃爍咗幾下，最終，徹底熄滅。
宇宙，重歸寂靜。
小黑盒等待左三年，一個15歲天才機械工程師…小麥子，偶然接通了它天線電路！
上下集完
__________________________________________________________________
《小麥子創富號》，一艘在浩瀚宇宙中漂流的船。
它的航程，是為了探索未知，也為了尋找需要被救贖的靈魂，在顛簸的風浪中，為他們提供一個可以安心停泊的棲息地。這是一趟有血有汗、有笑有淚的漂流記，我們將一同見證，一同經歷，最終一同彌補生命中的遺憾。
如果你也想成為我們的一份子，登上這艘船，請即刻按下 [追蹤]。
當下一份《船長日誌》發佈時，你就會收到啟航的通知，絕不錯過任何一個屬於我們的故事。___________________________________________________________________
本集為《小麥子創富號漂流記 04》：18分08秒的倒數(上 ) 的故事廷續下集！
