Bô gōa-kú, kám-kak ka-kī nā sí-lâng leh, si-thék ûn-ná bān-bān-á teh hoat chhàu, siōng kiaⁿ ū lâng chit-chūn óa--kòe-lâi. Iáu-siū o͘h, m̄ thang kòe--lâi, sim-chōng phī-pho̍k-chháiⁿ,ba̍k-chiu bô só͘-chāi thang khǹg, chiah ē hāi. kiâⁿ--kòe iû-kheh ba̍k-chìⁿ lóng siā chìⁿ -lâi. Góa bīn hiòng ē-kha teh pí ê kha-kiû sài, ké-sian khòaⁿ kā puh-chí-á chù-sim, chóng sī bōe-sái hông hoat-kak--tio̍h, pí kā lâng thau-the̍h mi̍h-kiāⁿ khah hāi.
Tng-teh tán kiù-peng , taⁿ hāi--a, hô͘-sîn nā phīⁿ tio̍h káu sái án-ni kúi-lō chiah chîⁿ kòe lâi iāⁿ-iāⁿ-poe, tī kha-chhng thâu hia teh tán chia̍h-si̍t, chhiú chia iah hia iah, bān- bān-á kha-pō͘sóa khì pùn-sò-tháng hia, lâng khah m̄ chai teh pòe sáⁿ.
Bé-á, gún ang kóng sī ka-pi hāi—ê. Chia ê te̍k-sek ka-pi sòe sòe poe á, chin kāu, chhiūⁿ espresso hia kāu, ē-kha té té tiⁿ-chiú kap sió-khóa hang chhàu-ta ê thn̂g o͘. Siōng téng-bīn koh tha̍h 1 iân iù-mī-mī koh nńg-sìm-sìmn nā hái-éng ek lâi hái piⁿ sóaⁿ thòaⁿ thián-khui ê pho, po-lê poe lāi ū bô kâng chân-chhù ê ka-pi sek kap pe̍h gû-ni thàu-lām , koh thiam pe̍h iù-pho, khòaⁿ --súi-súi bōe-su 1 pak thiu-siōng tô͘, chin siâⁿ--lâng, lim khí-lâi kháu-bī tú kap góa chit chiah nā tham tiⁿ ê hô͘-sîn kāng-khoán tùi-tâng tùi-tâng, tah-tah-tah, ta̍k chhùi lim lóng ū bô kâng ê bī, ū ê khó͘, ū ê khó͘ tiⁿ khó͘ tiⁿ, koh kiam ni kap kāu chiú ê chu-bī, phang kàu nâ-âu kháng, lim tio̍h tiō m̄ chai thêng, 1 chhùi 1 chhùi sòa—lo̍h lim. Tiō sī án-ni, chiú 1 khún á tiō ta, lâng phû phû, cheng-sîn giang, hèng-hèng sòa--lo̍h-khìpeh-soaⁿ, soah lâi kìm-bōe tiâu, phái-sè tù-tù. Jîn-seng siáⁿ-mih tāi-chì bōe tú-tio̍h, léng-chēng siōng tiōng-iàu, lin kóng tio̍h iah m̄ tio̍h!
