佇齒科講台語

我佇台北原本看的齒科，彼个醫生已經半退休，一禮拜干焦看一工，閣定定出國無看診，我咧想欲共半年洗一擺喙齒的代誌換來礁溪。

看著轉運站頭前有一間齒科咧裝潢，掛出來的布條寫「數位牙科」，這是啥物齣頭？看攏無人，來去交關一下。

原來毋是無人客，是用預約的，閣誠滿，愛預約到２、３禮拜了後。頭一擺去，伊幫我共健保卡插入去機器內底報到，錢lop（毋知影第幾聲）入去，坐佇椅子頂懸等。看好了後，伊講我65歲以上，掛號費半價，揤機器，吐1百箍出來，退予我。原來攏用機器，in的屜仔內底嘛無囥錢。

今仔日是第３擺去。去的時，我咧想，我欲講台語無？拄著裝潢較新、較媠的所在，就有這个問題。其實大學的時，聽醫學院的同學咧講，in有台語的演講比賽，醫學院的學生佮佇病院食頭路的人攏愛學台語，會曉講台語。

我入去，伊問：「有預約嗎？」我講台語：「我約11點。」我的卡片插著位，無顛倒反，櫃台內底的查某囡仔來共我鬥揤，我講：「我敢若是50箍。」伊指螢幕頂懸的字：「上面出現一百元。」我提一百箍插入去。

我咧等的時，聽著櫃台內底共一个oo-bá-sáng用台語說明，我實在是想傷濟。

叫我的名，我入去。醫生講：「是吳ＸＸ」「是，我欲洗喙齒。」醫生用台語佮我講，罕罕幾个名詞用華語。呼！我閣成功佇一位講台語。後擺毋免想遐濟，攏用台語就是。