Curry Nudeln mit Gemüse und Fischstäbchen
自彼暝 gún 翁交代這日 ê 透早伊無法度交我做陣食早起頓，我 ê 頭殼開始做干樂遨仔遨，遨我愛食 ê 早起頓。
大麵焿，彼是較早睏較有眠。
炒麵，遮 ê 大麵框金閣包銀，而且一逝路若火星，我無維京創辦人 ê 手骨莫枵狗數想豬肝骨。飯丸，手頭 ê 泰國米捏 buē 出𩚨帶黏 ê 口感，另外無菜脯無覆菜無油炸粿 ê 飯丸 m̄ 是我心心念念 ê 飯丸。
天邊海兜 ê 數念斟酌想一輾，嫁雞綴雞飛，嫁狗綴狗走，嫁到德國綴德國人喙斗。跟綴德國人喙斗，這愛等後世人 ê 機緣。
翁無 tī 厝 ê 早起頓我到底愛款啥來食？我 ê 天公伯仔，一件有毛食到棕簑，無毛食到秤錘，二跤食到樓梯，四跤食到桌櫃，有肉食到肉臊，無肉食到糞埽 ê 食就是矣，呔討 kā 我舞甲 kiōng-bueh 規氣欶香火就好，這敢是相呴以溼，相濡以沫 ê 後果？本底就無啥重食，交愈無重食 ê 德國人誠懇相呴以溼，相濡以沫，我 mā 認真實踐 Lebensmittel ê 精神，世間萬物是生活 ê 工具。
Mittel 有意思意思、資源、工具等等 ê 意思，德國人 ê 食食慣勢生做啥物形，我無才調百分之百拍胸坎講，德國人就是按呢食，總是 gún 兜 ê 德國先生 hōo 我按呢解讀 Lebensmittel 送入喙 ê 物件只是維持生存 ê 資源交工具，一屑仔意思攏無。不而過這是較早，這久 ê 伊 buē 閣按呢認為，畢竟伊有一个好牽手，引𤆬伊好好仔食一頓飯 m̄ 是 uī-tio̍h 做好囡就愛食飯配鬱卒兼阿母硬 bueh 楔過來 ê 火氣。
翁無踮厝 ê 早起頓，我到底 bueh 食啥，我 ê 天公伯矣，一件逐日攏愛做 ê 輪迴 ê 四常呔討成做 To be or not to be ê 選擇題 m̄ 是 Wo man Liebe aussät, da wächst Freude empor ê 無論你 tī 佗落掖愛 ê 種子，幸福快樂就 ē tī 遐發穎成長。我 ê 天公伯矣，呔討我 kā 愛 ê 種子掖 tī gún 翁魂舒 hōo 伊幸福快樂，這久 ê 我卻無法度感受這份幸福交快樂，呔討 ē 按呢生？煞煞去，時到時擔當，無米 tsiah 煮番薯湯，這久 ê 我只要跟綴一粒石頭（Einstein）ê 智慧，時間是篩仔，伊 ē uī 我篩出答案。
「M̄ 通 buē 記持你 ê 便當，Nicht vergessen, dein Piān-tong」田螺循舊逝，白枋掛手扞，猶未決定 ê 早起頓交 hōo 明仔載去處理。
Der Weg stellt jedem nur eine Frage : Wer bist du? Das Frühstück für heute stellt nur die Frage, was möchte ich essen, Mann! Das Leben ist so schwierig. 人向聖地牙哥朝聖，一直問伊是 tsiâ，我自彼日知影 gún 翁愛 tī 透早六點進前出門，我就一直 tuì 這日 ê 早起頓踅金龜磨到今，猶是踅 buē 一个答案。雙目做鷹仔目斟酌巡菜櫥，有紅菜頭、玫瑰草花、紅甜番薑仔、Kam-má-tooh...架仔有糙米、意大利麵、秮仔、珠仔豆交去泰國太太遐交觀 ê 韓國白麵，昨昏 buē 記持退冰 ê 雞襟胸猶原規欉好好䖙踮冷凍櫃，卵白質是肌肉 ê 來源，雞襟胸 buē 記持先退冰，按呢有啥物好替換？魚罐頭？一罐 150g 一个人無才調食 hōo 完，雞卵？Tsa̋ng tsiah 食𤺪，uī-tio̍h 無魚食魚指 mā 好 ê 魚指．．．啊，我想著矣，緊來請教 Google 敢有這味素。
敬愛 ê Google 萬事通請你賜我智慧，敢有一份料理是魚片敆咖哩麵？
我親愛 ê 求道者，請看遮 ê 圖片。
萬事有耐性一字一字繩 ê 我，一搪著食譜我 kan-ta 愛看相片...順 Google ê 指示相片一張一張繩，頭殼泅來泅去 ê 魚就是 m̄ 食餌。紅龜生蟲，龜怪矣，英文是目今世界上大 ê 資料庫，竟然揣無一張交我記持相疊 ê 相片。按呢 kā 英文交換手 hōo 德語，畢竟德語 tī 歐洲比英語較好使用。Fischstäbchen mit Curry und Nudeln，Bingo! 就是伊 Mohnyin Nga Phe Thoke 伊交我記持 ê 咖哩麵敆魚片無宛 2 體，是講這是啥物語言？伊讀起來無泰國音 mā 無越南音。好玄刣死一隻貓，彼網址看起來有安全...啊，原來如貓，伊是緬甸料理，做法交泰國料理無啥無相𫝛，齊愛透椰子奶。椰子奶 tuì 我無路，厝內 mā 無椰子奶抑是 Khu-lì-mù 通替換，按呢省起來。賰--ê 材料手頭有 ê 菜蔬會使得替換，若鯛魚片 ê 魚肉我褲袋仔袋磅子食 buē 起，大丈夫我無魚食魚指。料理手法小小仔繩一下，手機仔隨關機，斡頭好好飼家己。
是洋蔥落甲有夠額，所致 hōo 這白汫無素 ê 英國咖哩加足有氣味，抑是魚指敆麵比塗肉林閣較較好味素？到底是佗一个？舌鈍食 buē 出來，總是我清楚知影家己下 ê 願。敬愛 ê 天公伯，你敢會使得 kā 我鬥相共 hōo gún 翁較捷出張，按呢 kiōng-bueh hōo 我放 buē 記持 ê 食物𪜶 m̄-tsiah 有才調轉來相借問，像這味今我已經無法度分別，我是 tī 日本抑是泰國食過伊，總是這久交伊相拄搪，我又閣學著一个新智識，原來緬甸料理 mā 有這款食法。
2021.03.21
