誰能盡棄世上一切去做快樂情人？
「你堂堂男人，空有唔錯嘅學識、吊兒郎當、做個兼職教師、全無大志；你照顧到我個女咩？你憑乜嘢娶佢呀？更何況，你唔係韓國人，我唔會俾我個女嫁外人！」
喺我同金先生嘅「談判」破裂之後，我同 Chloe 嘅生活，仍舊係一切如常。冇錯，眼下我哋嘅結婚大計的確係受阻；但同時地，呢啲事情唔會影響到我同Chloe嘅關係。雖然金先生嘅說話，傷盡 Chloe 心；當晚，佢喺屋企足足喊咗一晚。但我哋仍然相愛，我哋仍然喺埋一齊。
金先生當晚對我嘅「訓話」，其實只需要聽一半。嗰啲甚麼吊兒郎當嘅嘢，根本無需理會。正所謂「莫欺少年窮」，我拎住個美國名牌大學嘅碩士學位，喺韓國嘅學界又好、商界都好，根本唔愁搵唔到好工，士途亦唔會差。
呢一點，曾經係過來人嘅金先生，應該清楚不過。
真正死結嗰部份，就係種族問題。用句金庸小說中常見嘅說話嚟講，就係我係漢人、Chloe 係朝鮮人（扶餘人）。
「胡漢恩仇，須傾英雄淚」。
喺武俠小說嘅世界裏面，蕭峰透過一系列嘅武鬥，去解決呢個問題（其實解決唔到不過按下不表）。喺現實生活中，當然冇啲咁快意恩仇嘅事情，我亦都唔可以約佢去雁門關或者紫禁之巔決戰；我同呢位金先生，仍然要繼續泥漿摔角。
風平浪靜咁又過咗兩星期。喺嗰晚之後，Chloe 心情低落咗好幾日；佢爸爸對佢嘅無情說話，令佢好傷心。同時地，可能佢真係得到佢媽媽嘅硬頸遺傳，佢爸爸對佢嘅無情，令佢更堅決要同我一齊。
諗深一層，就算我哋暫時結唔成婚，一紙婚書，對我同佢嘅愛，真係有影響咩？更何況，要硬起心腸上嚟，我哋自己去註冊，就好似佢爸爸媽媽當年咁，都冇人可以奈得我何。
只不過，真係咁樣做的話，就會令 Chloe 同佢屋企嘅關係，進一步惡化；呢一個唔係我樂見嘅結果；我唔可以唔念及佢嘅親情。
十月中某工作日，如常返工。
中午時份，當我同 Chloe 正想返宿舍食晏休息嗰陣，Esther 嗌住我：「Alan，有時間嘛？傾兩句。」
我叫 Chloe 自己返宿舍先，佢話唔好，佢想等埋我。
我入到校長室，Esther 神色凝重；然後，佢講咗個好震撼嘅消息：
「Alan，我啱啱收到移民局嘅通知，你個 working visa 續期出咗問題，佢哋唔肯批；你只可以繼續居留同工作到今年嘅十二月卅一日。」
呢個震撼嘅消息非同少可；我鎮壓住內心嘅徬徨同恐懼，問 Esther：「知唔知係咩原因？」
「佢哋冇好具體咁講，但我嘅 source 話我知，應該係因為當日申請 visa 嗰陣，你唔係喺原居地申請。佢唔肯證實，但我覺得係有人舉報你。」
舉報我？我喺韓國冇任何結怨；真係會咁做嘅人……可能只得一個。
當我個腦諗到「嗰個人」嘅時候，第一個反應，唔係憤怒或者傷心；我第一時間諗到嘅係：我應該點同喺教員室等緊我嘅 Chloe 交代呢件事？
「我諗你最好去移民局走一趟；」Esther 嘅聲音驚醒咗沉思中嘅我。「如果你想的話，我可以陪你去。」
「可唔可以等我諗一諗再覆你？」我問佢。
「冇問題，你有決定再搵我啦。」佢答。
當我轉身開門個陣，我見到門外嘅 Chloe。惶恐嘅表情，加埋眼淚；我諗佢已經聽到晒我同 Esther 嘅對話。
同日下午三點，鐘閣移民局。
我同 Chloe 由正門行返出嚟；失落、徬徨、無助。
「馮先生，由於你申請工作簽證嘅時候，唔係循正式途徑申請；我哋內部經過調查之後，決定唔再為你嘅簽證續期。你需要喺簽證到期日之前，即係本年嘅十二月卅一日或以前，停止工作及離開南韓。你呢次簽證嘅問題，將會記錄在案，作為日後對你發出任何形式嘅入境簽證嘅參考備註。」
移民局人員嘅說話，指出咗兩個要點：一，我只可以逗留到今年年尾；二，我以後就算想再嚟南韓工作，都會受呢次事件嘅影響；簡單嚟講，佢哋日後仲會唔會發 working visa 俾我，都係未知之數。
好毒嘅一個殺著，如果真係「某人」做的話。
Chloe 由跟我出嚟開始，一句聲都冇出過，全程只係緊緊拖住我隻手。我同佢相識兩年幾以來，除咗瞓覺嘅時間，最靜呢兩三個鐘。
當我嘗試講一啲安慰佢嘅說話嗰陣，佢突然好似醒一醒咁，同我講：
「可唔可以陪我返狎鷗亭？」
一小時後，Chloe 屋企。
Chloe 將整件事講咗俾佢媽媽聽，佢同佢媽媽坐喺梳化嘅一邊、伏喺媽媽膊頭喊緊。
「唔好意思呀，Alan；」李太太（Chloe 媽媽）滿臉愁容。「我真係估唔到，我先生會咁做……」
睇嚟，連佢都相信，呢鑊嘢係佢老公嘅傑作。
大約兩個鐘後，金先生放工返到嚟。
佢見到我哋，面上毫無驚訝表情，似乎有備而來；更加似係一早已經知道今日發生嘅事情。
我而家開始相信，件事係佢老人家嘅手筆。
「爸爸，點解你要咁做？」Chloe 梨花帶雨咁問佢。
金先生冇答佢，好整以暇咁坐定喺佢嘅主位，然後施施然咁同我講：
「我早話你聽，件事唔會就咁完結。」
我冇答佢，只係冷笑咗一吓。
喺呢個時候，Chloe 拖住我行到佢面前，然後跪低。再一次，喺冇選擇餘地之下，我陪佢一齊跪低。
點解韓國人咁鍾意跪人嘅？
之前喺嫲嫲面前下跪，佢老人家受得起有餘。今次我跪你，你個死老嘢受唔起，因住折福，因住收尾嗰幾年！
「爸爸，我咁大個女，都未求過你；」Chloe 滿面眼淚咁講。「今次，我懇求你，成全我哋兩個，准許我哋結婚！除咗 Alan，我唔會嫁俾任何人！」然後佢拜倒佢爸爸嘅腳下。
「我嘅答案仍然係：唔得！」金先生冷冷嘅回答，令到 Chloe 放聲痛哭。
「當呢個男人離開咗韓國，我同你去相親，到時你有第二個男朋友，就唔會再喊，亦都唔會再記得呢個冇用嘅男人㗎喇。」金先生慌佢個女唔死，再補多句。
Chloe 嘅哭聲漸細；過咗冇幾耐，佢拖住我企咗起身，然後行向大門口。行咗兩步，佢突然停步、轉身、望住佢爸爸、好怨恨咁講：
「你會冇女送終、孤獨終老！」
當時嘅氣氛，再加上 Chloe 怨恨嘅眼神同陰森嘅語調，令到金先生打咗個突。Chloe 嘅怨恨，甚至連我都感覺到一陣心寒。
我冇俾時間金先生回應呢個咒詛，拖住 Chloe 隻手就離開咗金宅。
喺揸車返屋企嘅時候，Chloe 問我：「Alan，點解你今日咁冷靜嘅？」
「因為我冇唔理性嘅奢侈，我要認真處理呢件事情。」我答佢。
「Colette 姐姐同我講過，冷靜嘅 Alan 同時亦係最恐怖嘅 Alan；你諗緊乜呀？」佢個樣有啲擔憂。
「冇呀，只不過諗緊點處理呢件事啫。」我再答。
「你記得你應承過我，唔會做一啲傷害我爸爸，同埋傷害你自己嘅事嘛？」佢望住我講。
「放心，我唔會亂嚟。」我答。
同日晚上十點，南山公園。
我同 Chloe 講，我想一個人靜吓。喺我再三應承、唔會做啲傷害佢爸爸嘅嘢之後，佢放咗我出嚟。
來而不往非禮也。
「你想我點做？」電話嘅另一端，係 Colette；我將個情況講咗俾佢聽。
「我想要佢爸爸嘅 Yankee White、佢從高中開始嘅學歷、同埋佢嘅所有連繫，包括政治同埋個人。」我當然唔係講緊真正嘅 Yankee White FBI 檔案，佢爸爸都唔似會有。呢個 Yankee White 係華府術語，即係好詳細嘅背景調查同埋個人情報。
以美國政府喺韓國嘅情報網絡，同埋 KCIA（NIS）對反共嘅敏感同偏執，Chloe 爸爸呢類做得名牌大學高職嘅人，一定有 background check。
呢啲嘢對於外人嚟講，梗係冇可能。但對於我同 Colette 嚟講，只不過係三日五日定一個星期嘅問題。
「無問題，佢係大學教授，呢啲料一定齊；」Colette 答我。「你俾三日時間我。」
「你會搵邊個搞？」我希望係我識嘅人。
「呢層你知得越少越好；」Colette 仍然一貫專業。「放心，熟人。」
「好，我等你消息。」喺呢個 moment，除咗 Chloe，Colette 係我唯一信任嘅人。
「Alan，」Colette 喺我準備收線嘅時候叫住我。「好好照顧 Chloe。呢次嘅事，對佢打擊好大。」
「我會，放心。」
「你自己都要保重，唔好俾怒火掩蓋你嘅理智；做任何嘢之前，先諗一吓 Chloe。」
「我知，多謝關心。」
同我玩使橫手？我係華盛頓國會山莊訓練出嚟㗎。
三日後晚上時份，大學路某 cafe。
如坐針氈咁過咗三日。呢三日，係我嚟南韓工作以來，最難過嘅三日；比當日 Colette 報假案有咗更難捱。
Chloe 每日幾次向我道歉、每次都以淚洗面，令到我非常難受。我好怕見到我最愛嘅人，滿面歉意咁對住我；更何況成件事，都唔係佢嘅錯。
呢個時候，有個中年韓國男人行埋嚟我張檯度，然後坐喺我面前。佢手持一包未開嘅 Pall Mall，然後用英文問我有冇煙。
我拎咗包煙、抽咗一支煙出嚟，然後將佢搣成兩截，將上半截遞俾佢，然後我點起下半截。
佢喺個手提袋度攞咗個公文袋出嚟，大約兩吋厚，放低喺檯面，然後走咗。
我冇即時離開現場；相反，我點起另外一支煙，然後打開公文袋嘅內容，開始略讀。
交文件俾我嘅人故作神秘係應份嘅，一來呢啲係佢嘅專業；二來佢唔知呢啲係唔係機密文件。
但我知道呢份係乜嘢。我既冇違反任何法律，呢份亦唔係乜嘢國家機密文件；有個咁好嘅地方透吓氣，點解唔好好睇埋先走？
我一路煲煙、一路一頁一頁咁略讀所有文件；睇到最後，我將文件疊好，放返入去公文袋。
我手上呢份兩吋厚文件，足夠令 Chloe 嘅爸爸身敗名裂，甚至身陷囹圄。
但係我冇因此而高興；因為，決擇權喺我手上。我要決定，究竟應該點做，而又唔會傷害到 Chloe 同佢媽媽。
原本只係煩一件事，而家變咗煩兩件事……
The ball is in my court now, but I am not sure if I want it.
無論是愛與被愛 也是寸步難行
風急雨勁 那可守得穩癡心
誰能盡棄世上一切 去做快樂情人
祗好接受 這叫沒緣份
（待續）
