然而透徹領悟永遠是太遲
「我想喺你走之前，嫁俾你；我要著住我嗰套韓服，同你行婚禮！」
1999 年 12 月 18 日，係我同 Chloe「結婚」嘅日子。1999 年 12 月 24 日，係我哋拍拖兩週年紀念。
1999 年 12 月 25 日，就係我離開韓國嘅日子。
如何面對 曾一起走過的日子
現在剩下我獨行
如何讓心聲一一講你知
「人生猶如一齣戲，呢齣戲究竟係喜劇、悲劇、Cult 片、名著定爛片都係未知之數，唯一相同嘅係，無論你呢齣係好戲定爛片，每個人自己嗰齣戲，都會有一場至數場好難演嘅分手戲。」
喺過去接近二十年嘅日子裏面，我三不五時都會諗，如果我同 Chloe 當年過到佢爸爸嗰關、名正言順咁結咗婚；究竟，我同佢之後嘅命運，會有啲乜嘢唔同？
但係，歷史係冇「如果」嘅。
我同 Chloe，仍然要萬不情願咁，演埋呢齣荒謬嘅分手戲。
星期日，婚禮後第一個早晨。
「老公，起身喇。」我睜開眼，見到 Chloe 拎住個餐盤喺我側邊。「起身食早餐喇！」
「老婆早晨！」我錫咗佢一啖，然後接手拎住個餐盤，上面有一份韓式「早飯」，有湯有餸有飯。「做乜咁好，有床上速遞早餐食嘅？」
「今日係我真正成為人妻嘅第一日，呢個早餐係獎勵你嘅；」Chloe 古古惑惑咁笑。「你琴晚咁努力洞房，我驚你腳軟行唔到出廳食早餐吖嘛！哈哈！」
「腳軟？我仲大把貨喎！」我擺低個早餐，作勢捉住佢。「不如嚟個『晨運』呢……」
「唔好玩住喇，咸濕老公！」Chloe 嬌笑推開我。「快啲食完早餐沖涼換衫喇，媽媽今朝嚟探我哋呀！」
「外母咁快就上門？回門都要三朝啦！」我仲繼續玩嘢。「佢咁早上嚟，都未有孫抱住嗰喎。」
「快啲食嘢換衫啦，百厭仔！」Chloe 開始有個老婆款。
食完早餐、沖完涼、換緊衫，Chloe 都換緊 — 梗係啦，你俾個天佢做膽，佢都唔夠膽著恤衫唔著褲去迎接佢娘親。
佢換緊條牛仔褲，我見到佢原地跳咗兩跳，拉高咗條褲，然後就搏命深呼吸；努力咗一大輪之後，佢深深嘆咗口氣，然後擰轉身，用一個好無奈嘅眼神嘟住嘴望住我。
我見到佢個小肚腩頂住咗個褲頭，扣唔埋；我 kit 一聲笑咗出嚟，然後佢自己都笑。
「啲人話結咗婚就會肥，原來係真㗎……嘻嘻！」佢傻傻一笑，望住我。「恭喜你，你娶咗個肥老婆！」
自從決定聽天由命之後，我哋都一直好放縱自己。我停止咗每日嘅晨跑，星期六我哋亦冇再去打籃球（我真心驚 Chloe 會搵籃球掟美恩）。換來嘅係每日起碼兩三餐冇節制嘅美食，以威士忌或者燒酒送飯；情慾就變成我哋主要嘅「運動」。
Chloe 經歷咗同爸爸關係破裂之後抑鬱嘅消瘦，然後呢幾星期放縱嘅生活，如今換嚟嘅就係小肚腩同埋圓咗少少嘅臉蛋。咁短時間之內暴瘦暴肥，其實我都有啲擔心；不過，既然佢個人睇落冇乜嘢，身體狀況亦冇乜異常，都唔擔心得咁多。
「老婆要肥嘟嘟先可愛㗎，」我埋去攬住佢，輕撫佢嘅小肚腩。「有返啲啲肉，先配合你可愛嘅形象嘛。」
「呢個世界上，只有你覺得，最醜樣嘅銀美都係靚、都係可愛；」Chloe 攬住我。「多謝老公。」
過咗冇幾耐，我嘅「外母」嚟到喇。
「어머님.」我仍然好客氣咁叫佢「媽媽」；叫慣咗，而家改口叫 auntie 仲礙耳。
「풍서방.」韓國人有個好怪嘅習慣，叫女婿加個姓落去。朴課長、金部長、李常務、崔社長、馮女婿；好似職稱咁。但係 Chloe 媽媽呢句「馮女婿」，大出我同 Chloe 意料。
「媽媽！多謝你！」Chloe 伏咗落媽媽嘅搏頭。
「我所能做嘅，就只有咁多；」Chloe 媽媽向我講。「對唔住。」
「媽媽你太客氣喇。」我還禮。
「我嘅小美公主，」Chloe 媽媽望住佢。「媽媽想飲橙汁，你有冇呀？」
「冇，不過我會幫媽媽去買！」Chloe 起身換鞋，然後過咗對面 Kim’s Club。
「決定咗離開嘅日期未？」Chloe 媽媽問我。
「決定咗，今個月 25 日。」我答。
「聖誕日？」佢有少少 surprise。「點解揀嗰日？你個簽證唔係月尾先到期？」
「一來機位好緊張，25 日打後差唔多全部滿座；」我解釋。「二來千禧年嚟緊，銀美擔心千年蟲會影響航班；佢話都係安全啲好。」
「我嘅小丫頭永遠都係咁周詳；」Chloe 媽媽會心微笑。「馮女婿，我已經同呢度嘅業主傾好。我同佢講，你被派駐海外工作，呢間屋會轉全租，我已經一次過俾晒兩年嘅租金；你走咗之後，唔使擔心銀美嘅住屋問題。」
「至於銀美嘅情緒病問題……」佢繼續。「我已經幫佢安排咗心理醫生，熟朋友介紹，下個月頭我會陪埋佢去見醫生；到時我會再聯絡你，講返個情況你聽。」
「多謝媽媽！」我向佢微微鞠躬。「希望你會幫我好好照顧銀美。」
「請你放心，我一定會好好照顧佢；」Chloe 媽媽欠身還禮。「好抱歉你哋最終搞成咁，好抱歉我先生嘅固執帶俾你咁多麻煩。」
「媽媽你太客氣喇！」我再還禮。
其實，我好喜歡我呢個「外母」。除咗因為佢同 Chloe 外表非常相似之外，仲有佢嘅溫文儒雅、知書識禮；係一個非常慈愛嘅長輩。如果唔係佢個 PK 老公，我哋嘅關係可能會更好。
「馮女婿，」Chloe 媽媽稍稍收起笑容。「你同銀美，有冇好好商量過，你哋嘅未來？」
「商量當然有，」我認真咁答。「我哋都唔會就咁放棄。問題係，我唔想銀美同佢爸爸嘅關係，徹底破裂到無可挽救嘅地步，要佢嚟香港定居似乎唔可行。同時地，我亦都有一段時間唔可以再喺韓國工作；面對呢個死結，就算我哋點商量，都只不過係一廂情願；結果係點，仍然屬於天意……」
「其實，我好明白你哋嘅處境；」Chloe 媽媽都好認真咁講。「聽銀美講，嫲嫲都有同你哋提過我同銀美爸爸當年嘅事。我好欣賞你哋嘅堅持，但作為你哋嘅長輩，我有義務要提醒你：就算堅持，都要俾自己一個限度、一條退路；否則，盲目咁堅持落去，最後可能會摧毀你同銀美嘅下半生。」
「媽媽嘅意思係……」佢正正講中我心中最擔心嘅事情：如果幾年過去，我哋嘅客觀環境仍然冇改善，咁我哋仲應唔應該繼續堅持？
「呢個住宅，我已經交咗兩年全租；」Chloe 媽媽環顧四周。「兩年過後，如果你哋嘅情況冇任何改善，係咪應該重新考慮一吓，你哋嘅堅持？」
我冇答佢，腦海不斷思索佢講嘅嘢。
「你大可以放心，」佢好似睇穿我諗緊乜咁；原來我老婆做得到嘅嘢，我外母都做得到。「呢個唔係我俾你哋嘅限期；如果到時你哋仍然決定堅持落去，而銀美仍然有需要的話，我仍然會繼續幫佢交租。我只不過係想你考慮一吓我嘅建議，俾大家一個保障。」
「媽媽，多謝你。」我向佢欠身鞠躬。「我會好認真考慮。」
「十六年後，在此重會。夫妻情深，勿失信約。」
畢竟，呢啲都只不過係小說之言。喺現實生活中，無論如何，我都唔可以摧毀 Chloe 嘅半生幸福。
究竟我應該點做？
Chloe 嘅住屋問題算係解決咗，然後就到工作同生計嘅問題。
12 月 21 日，星期二，我喺韓國最後嘅工作日。
「Alan 你可以放心，」喺校長室入面，Esther 同我交代緊我啲「身後事」。「你現在教緊嘅班，我會全數俾晒 Chloe 教。其實過去嘅大半年，佢嘅表現都好好；我相信佢嘅能力，佢會處理得嚟。」
我粗略咁心算過，我喺呢度嘅班，每個月大約百一二萬圜嘅收入，再加埋 Chloe 嘅私人補習同埋教琴，佢一個月應該都有百六七萬圜，應該生活無憂喇。
可惜我喺校外嘅成人會話 1 on 1 堂佢接收唔到，因為中年韓佬唔會信任一個廿幾歲嘅土生土長韓妹教佢哋英文；否則的話，Chloe 嘅收入會更好。
「非常感謝你嘅信任，」我向佢欠身。「亦都非常感謝你對 Chloe 嘅照顧；希望喺我走咗之後，你會繼續照顧佢。」
「我哋唔需要咁客氣喇；」Esther 神色有啲內疚。「其實，我有啲唔好意思就真，話晒當日用小手段幫你搞簽證嘅係我，而家連累到你……」
「傻啦，又唔係你一個決定咁做；」我答佢。「我都有責任嘅。」
「總之你放心啦，喺工作上，我會好好照顧 Chloe。」佢好認真咁講。
「多謝你！」我再向佢欠身。
「呢份係你嘅 reference letter；」Esther遞咗封信俾我。「希望你喺香港可以搵到一份好好嘅工作。」
「多謝你，원장님 （院長）。」我再次多謝我呢位好老闆。「希望遲啲可以返嚟探你同埋其他同事。」
最後一個工作日。今日之後，我就要離開呢個工作咗兩年幾嘅地方；其實，我真係好唔捨得。好不容易先喺一個陌生嘅地方，建立起少少嘢，叫做有少少事業；過埋今日，一切又推倒從來。
既然係最後一個工作日，道別自然係當日嘅主題。我喺呢個故事裏面，經常提及「分手戲」呢回事；或者今次，我就破例唔迫大家去睇呢場分手嘅群戲，改為講吓，我同呢班同事「分手」之後，佢哋嘅發展：
Esther 係我廿年職場生涯中，最好嘅老闆，沒有之一。遺憾嘅係，佢嘅學校唔可以喺高陽市嘅發展洪流中繼續落去。學校喺 2001 年第三季易手，Esther 做回老本行 — 初中英文教師；佢而家係議政府市一間初中嘅校長。
Sophie 喺學校易手之後，進入咗某韓國大集團工作，成為其駐菲律賓嘅 admin manager；佢喺馬尼拉工作咗五年。
Kirsty 可能係我哋幾個之中，同韓國冇直接關係（即係冇韓籍親友），但留喺韓國最耐嘅人。學校結束後，Kirsty 搬咗去佢最愛嘅濟州，喺濟州市嘅一間英語學校繼續教職；佢 2010 年退休，返多倫多定居。我同佢仍然保持聯絡，間中喺 Goodreads 分享讀書報告。
Ricky 同美恩結婚後，選擇跟隨老婆定居南韓。2001 年後，佢轉到鍾路某知名英語學院任教，一直到今時今日。行文之際，佢同美恩正陪伴佢哋嘅獨生女 Natalie 去 LA 準備首年嘅留學。
惠晶係我喺韓國最早結交嘅朋友之一。學校結束後，惠晶係其中一個，同 Ricky 一齊轉職鍾路嘅同事。佢喺鍾路工作至 2004 年，再轉職去濟州，同 Kirsty 做同事。惠晶喺 07 年結婚，有兩個小朋友。最近，佢同我講，呢個暑假忙緊帶個大仔去減肥班，因為佢體重嚴重超標；睇嚟媽媽鍾意食零食嘅習慣，傳咗俾個仔。
George 一直都係我比較少著墨嘅同事，因為佢比較沉默寡言。佢喺 2000 年中，同一個韓國女仔結婚，然後人間蒸發 — 唔知乜嘢原因，佢老婆斷絕佢所有同我哋嘅社交聯繫；自此之後，佢音訊全無，只係知佢開咗間貿易公司，轉行做 African trade，經常穿梭中港韓。
天下無不散之筵席，我兩年幾嘅「人之患」日子，來去匆匆。慶幸嘅係，我哋大部份人都仲保持到最起碼嘅 email 聯繫；如今各人仍然一切安好。
除咗我同 Chloe 之外。
夜裏一切靜了 我是哭了亂了
再沒分寸 默默隨遇
剩了多少作紀念 惟匆匆的每天
誰能說今生今世 再無未了願
在等候你仍然 思念更淩亂
前路已模糊我不可看穿
好夢總似難圓 總會失掉了一點
然而透徹領悟永遠是太遲
好夢總似難圓 璀璨的又卻苦短
原來等到最後結局亦只有遺憾了
（待續）
