《無罪推定》的觀後感，用臺語寫看覓

這部牽涉著法律專有名詞的戲劇作品，試驗完全使用臺語來表現，為著向這个精神致意，這篇感想我嘛用臺語來紀錄。

我看了上蓋直接的反應，其實是「無彩」。

就先按臺語這點來講，雖然確實是真拍拚共一切對話攏轉做臺語，猶毋過總是予人感覺有一種「翻譯感」，聽著淡薄仔礙虐，無夠自然。

這本身就是一項手法設計，關係著作品的形體。欲按怎對觀眾講啥物款的話，才會當共想法順利傳達出去，到用臺語念臺詞已經是足後尾的部分矣，真可惜，我認為這个故事自一開始，就已經揀著一條遠路。

我自看著廣告開始就產生好奇，彼是因為我對這个作品想欲講的議題有興趣。

自無罪推定的觀念出發，探討法律的體制、冤獄、死刑的有理無理，閣欲全程使用臺語，意念誠好。

毋過就親像我聽著無蓋順的唸法，故事嘛小可仔浮浮，太過著急欲搝伴，人顛倒會驚著、煞聽無。

內中其實有誠濟予我感覺矛盾的所在。

想欲共臺語當做日常，毋過無成日常的對話。希望逐家重理，閣敢若想欲使人同情。

傷過趕緊欲將立場表明，無斟酌考慮聽的人的情形，就會親像硬欲推銷，反倒轉會使人防備甚至反感。

在我看來，愛欲看這部戲劇做甲啥款的，可能自本就已經咧關心相關的議題，無需要聽這款「宣傳」；抑若無注重抑是無認同的人，嘛無啥可能會當靠按呢的內容去對話，𪜶敢會願意聽看覓都猶是一个問題。

袂輸彼劇中為囝走傱的母親，面對律師講規篇，就算伊想欲聽，嘛聽無路理來──因為無考慮著欲講予伊聽有。

所以無彩。有心，毋過效果有限。

內底較心適的，是政治的操作這部分，所謂的公平正義是毋是原在愛靠「撨」才舞會好勢？閣有一搭，利用另外一層代誌，頭先予觀眾叫是伸張正義，尾仔才發現原來是偏見造成的「冤枉代」，換一个角度加深「無罪推定」的重要性。可惜這兩點攏干焦沐一點點仔爾爾，講無濟。

無罪推定、冤獄，共重點囥佇這方面，當然可能是一種上基本的切入，我會開始改變想法、注意這方面的代誌，頭起先嘛是因為一擺聽推理小說家島田莊司先生演講時，拄好講到冤罪平反的議題。

猶毋過，其中價值，毋但是為著避免冤情而已──準若無冤，準若十惡不赦，是按怎原在需要討論遮的議題？我認為這才是真正值得思考的重點所在。

最後猶是講一句，咱雪鳳先生有夠𠢕，為著伊嘛值得看！XD