🔥 三大創業傳奇：Jobs、Musk、Branson 如何「玩出商機」？
好多人講起創業，都覺得係件苦差，壓力又大又風險高。但偏偏有啲傳奇創業家，成功方式完全唔同，佢哋唔係勤勤懇懇刻苦耐勞「捱出商機」，而係「玩出商機」。三位經典人物：Steve Jobs、Elon Musk 同 Richard Branson，教曉我哋點樣將興趣、想像力與日常生活，玩到成為改變世界嘅生意。
🍏 Steve Jobs：將藝術與科技玩到極致
Steve Jobs 名句：「Stay Hungry. Stay Foolish.」好多人都聽過，我最喜愛嘅中譯係「求知若飢，虛心若愚」。呢句話就係 Jobs 鼓勵大家保持 開放、冒險、好似小朋友咁天真與渴望探索 嘅心態。大家未必知道原來呢句話係出自佢 2005 年喺史丹福大學嘅著名畢業典禮演講，當中佢反覆強調以下嘅概念：
- 好奇心 (Curiosity)： 佢提到自己退學後，因為好奇心而去上咗一堂書法課。當時睇落毫無實際用途，但十年後設計第一部 Macintosh 電腦時，呢啲知識就變得非常寶貴。佢嘅意思係，跟隨自己嘅好奇心同直覺去做事，即使當下睇唔到有咩用，將來可能會有意想不到嘅收穫 ("You can't connect the dots looking forward; you can only connect them looking backward.")。
- 熱情 (Passion) / 愛你所做 (Love what you do)： 佢非常強調搵到自己熱愛嘅事業嘅重要性。「成就一番偉業嘅唯一途徑就係熱愛自己嘅事業。如果你仲未搵到，繼續搵，唔好停。」("The only way to do great work is to love what you do. If you haven't found it yet, keep looking. Don't settle.") 呢種熱情係支持佢渡過難關、堅持落去嘅動力。
- 保持初學者的心態 (Beginner's Mind)： 佢亦提過佛教中「初學者心態」嘅概念，意思係保持開放、唔帶偏見、充滿好奇去探索事物，就好似小朋友第一次接觸世界一樣。
Steve Jobs 最犀利嘅地方，就係將人文藝術同冷冰冰嘅科技連結埋一齊，佢追求嘅唔係「更快更 Powerful 嘅電腦」，而係「更美麗嘅世界」。
• 玩出商機關鍵：跨界融合藝術與科技
• 實例：iPhone 改寫咗「電話＋音樂＋網絡」嘅界限，令科技產品唔止實用，更成為生活態度。
• Jobs 心法金句：「創意係將唔同嘅點連接起嚟。」(Connect the dots looking backward)
Jobs 教曉我哋：唔係市場要乜，你就做乜，而係用創意同想像，開創市場唔知道自己需要嘅嘢。
🚀 Elon Musk：把童年幻想變成產業革命
要講 Elon Musk 嘅金句同瘋狂事蹟，真係寫十篇八篇都寫唔晒！當中一句：“I think it is possible for ordinary people to choose to be extraordinary.” 完全表達到佢擁抱「冇嘢係冇可能」嘅信念，打破「超人先可以創業」嘅迷思，強調信念同執行力。 Musk 係一位連續創業家，估唔到佢細個性格內向，成日沉迷幻想太空同玩電腦。12 歲自學寫程式，整咗一隻太空射擊小遊戲《Blastar》，賣咗比雜誌公司，賺咗 US$500，玩出第一個商機！ 及後，同細佬 Kimbal 一齊搞城市商業指南平台，賣咗畀 Compaq 袋咗 US$22M；再搞 PayPal 又被 eBay 收購，賺咗 US$180M；不斷將唔同嘅夢想攞嚟「玩」，商機無限，越玩越大！
Elon Musk 就係「玩連續創業」嘅極端例子，佢嘅創業主題一個比一個更瘋狂——火星殖民、全自動駕駛汽車、腦機連接……佢唔係睇市場有無需求，而係睇「人類嘅未來應該點」。
• 玩出商機關鍵：用幻想與夢想做藍圖
• 實例：SpaceX 從民間企業挑戰 NASA，Tesla 從傳統汽車工業中掀起新能源革命。
• Musk 心法金句：「犯錯唔係失敗，而係創新必要嘅成本。」"Failure is an option here. If things are not failing, you are not innovating enough."
Musk 教曉我哋：大膽玩、大膽試、唔怕錯，玩到夠大、夠瘋狂，世界就跟住你轉。
🎢 Richard Branson：將人生當成一場冒險
Richard Branson 名句：“Screw it, let’s do it.” 呢句說話同廣東名句「掉哪媽！頂硬上！」有異曲同工之妙。 ( Kevin 譯本「話x知佢去盡佢！」)
Branson 係一位天生玩家、冒險家，細細個已經一人創業，一生充滿精彩故事。關於 Branson 玩出商機嘅事例多不勝數，真係要寫多一篇，今日就簡單講吓先。我對 Branson 最深刻嘅印象係10幾年前「扮空姐」！話說當年 Branson 同競爭對手 AirAsia CEO Tony Fernandes 打賭，大家輸賭當年各自公司讚助嘅 Formula One 車隊，睇吓邊隊成績勁啲，輸咗就要去對方航空公司打工。結果 Branson 輸咗，履行諾言，好認真咁扮空姐 serve 客，維俏維妙。呢單嘢成功吸引到全世界嘅眼球，表面係一個好好嘅宣傳 campaign，背後更加反映到一位肯放下身段嘅大老闆，全情(程)投入咁玩，唔單止能夠贏到客戶嘅信心，員工嘅掌聲，仲有對手嘅尊重。Branson 創業嘅起點全部嚟自生活體驗：買唱片唔方便、坐飛機好悶、想去太空玩又冇機會。結果全部自己搞。
• 玩出商機關鍵：將生活嘅不便「玩」成生意
• 實例：Virgin Atlantic 顛覆航空體驗，Virgin Galactic 將太空夢平民化。
• Branson 心法金句：「商機就好似巴士，錯過咗一架，下一架又會嚟。」“Business opportunities are like buses, there’s always another one coming.”
Branson 教曉我哋：玩心、冒險、敢試新嘢，將個人生活體驗玩成全球品牌。
✨ 「玩出商機」三大啟發：
- 跨界思考：從唔同領域連結創意。
- 敢於幻想：將未來想像化成行動。
- 玩出態度：用自己熱愛嘅事，創造市場想要嘅未來。
Jobs、Musk 同 Branson 三個人嘅成功，唔係靠運氣，而係靠創意、膽量同對「玩」嘅堅持。
咁你呢？你有咩興趣想玩成下一個商機？即刻開始，將生活玩成創業冒險，或許下一個創業傳奇，就係你！
即將推出 🔥「一人創業」Mind Map 製作體驗工作坊 🔥 按此查看詳情🔎
—
我係 Kevin，一人創業者，呢個係我嘅「玩出商機」系列。每日我會分享我嘅創業心得同埋挑戰，希望可以同大家一齊玩，一齊成長。
