初雪（玖）
若你用我的感情愛一天 願意讓時間靜下等你十年
Ask not what the industry can do for you, ask what you can do for the industry.
我講緊嘅係傳媒行業。
記者嘅專業形象低落（if any），並唔係一朝一夕嘅事。自從某週刊出現之後，「記者」呢兩個字，好多時就同「狗仔隊」呢三個字掛勾。你大可以抗辯，話狗仔隊係book B嘅娛樂嘢，唔關你事；但街外人點睇就另外一回事。
當日我開始做記者嗰陣，識我嘅朋友，好多都問我：「你去做狗仔隊呀？」 — 留意返：佢哋係用「你去做鴨呀」嘅語氣嚟問我。
喺呢行裏面，只要你唔係太呃飯食嘅記者，其實都會有種心態，就係「我要保護呢個行業嘅尊嚴」。好多時，呢種所謂嘅「保護」，其實只不過係同睇你唔起嘅人發生罵戰；屌完之後，一切照舊。
真係想「做返啲嘢」、「省靚個招牌」？可能你就會面對我而家呢個處境，思考緊自己今次因公殉職嘅機率有幾高。不過話分兩頭，我由此至終，其實都冇諗過為傳媒呢個行業做啲乜 — 我真係冇咁偉大、亦冇咁膠。
我只係希望，第時有人問起我「做記者嗰陣寫過啲乜？」，我可以有兩隻似人樣嘅故仔，可以見得吓人。
Day 10，晨七咁早。
琴晚諗咗一大輪之後，我決定都係要知會老總一聲。雖然，呢類咁嘅自己搵料自己寫project，我有全權可以話寫乜就寫乜；不過，呢次嘅採訪實在太多唔肯定嘅嘢、乜都可能發生，亦有未可預期嘅危險。喺呢個情況下，我諗，點都要聽吓佢老人家嘅意見。
更何況，萬一我有咩衫長褲短的話，保釋金賄款帛金，都要佢老人家說了算。
「唔……」老總沉思咗一陣。「Alan呀，寫呢啲嘢，會死人㗎！」
「寫呢啲嘢，會死人㗎」其實係老總嘅口頭禪。正常日子，一日我應該起碼聽幾次。但喺佢喺呢個情況下咁講，我就有啲不明所以，答唔到落去，dead air咗一陣。
「你寫得唔好的話，都唔使我多講；」老總把聲，聽得到「頭痕」兩個字。「你寫得好的話，你會同時間得罪中國、北韓同澳門三地嘅有關官員。你以後做嘢，會好艱難。」
中國同北韓我明，又關澳門乜事？
老總應該feel到我嘅無知，於是自己答落去：「北韓係封閉型經濟，塘水滾塘魚，賺晒都唔多，亦冇乜外匯收入。金氏父子要靠一啲『特殊項目』，去賺取外匯，以支持佢哋奢華嘅生活。黑市販賣朝鮮、高麗時代嘅國寶係其一，收錢隻眼開隻眼閉咁、俾啲喺南韓有有錢親屬嘅北韓人『脫北』係其二，搵楊斌開發新義州係其三。不過『楊特首』唔好彩，食兩家茶禮、辣著咗自己『阿公』，所以要俾人好好治理整頓一吓。」
「北韓Cap水嘅嘢，其實來來去去都係呢幾套。咁多年嚟，呢類『外匯經濟』都係由金大少個妹夫張成澤負責；」老總繼續講故仔。「張妹夫係北韓嘅經濟專家，金氏父子經佢一手設計、喺境外已經有一個完善嘅收錢洗錢網絡，由『貨物』離開北韓、到銀紙漂白晒洗乾淨入落瑞士銀行，都已經有完整嘅套路，連CIA都冇佢符。其中最主要嘅關鍵，就係澳門。」
「張成澤嘅洗錢網絡係好迂迴嘅，澳門嘅XX銀行係其中好重要嘅一部份。喺呢個層次嘅洗黑錢活動，澳門政府高層冇理由唔知。何厚驊係個冇乜主見嘅人，呢啲大事佢唔敢自己揸主意，所以北京對呢啲事一定知情、隻眼開隻眼閉。你呢個報導，如果寫得到肉的話，唔多唔少都會將呢啲資訊浮咗出水面……」
澳門XX銀行……一年前，我先同呢間XX銀行嘅主席做過隻1 on 1，傾有關澳門「回歸」兩年以嚟、喺經濟上嘅轉變……
老總一講到澳門呢筆，倒令我解開咗一個我諗咗好一輪嘅「疑團」：
話說幾個月前某個晚上，我同諾妍（佢喺邊個？詳見）鬧交。心火盛嘅我鬧完交後，就衝咗過澳門賭錢 — 我唔鍾意賭，但我鍾意搵啲我平日唔會做嘅嘢去發洩發洩你苦悶。
當晚，我喺文華東方某貴賓廳嘅百家樂檯上面，以五千銀一注喺度「發洩」緊。可能係「情場失意、賭場得意」嘅關係，張檯連開咗六口「閒」，我已經贏咗三萬銀。
當我繼續買閒、諗住買到佢爆為止嗰陣，我聽到我隔離嘅男人講咗句「 씨발 」，即係大約等於廣東話嘅「屌你老味」或者「屌那星」。我有留意到，個男人應該買咗幾舖「莊」，每舖幾萬銀。
我望一望佢，應該係卅出頭嘅韓國人，於是我就用韓文同佢講：「賭錢唔好賭硬頸，跟住條路買會好啲。如果你買爆個閒的話，今晚就唔好再賭喇。」
「但係我鍾意做莊喎！」佢答我。「……又好，聽你講買吓閒。」然後，佢買咗十萬蚊閒。由於佢出手最高，於是佢有得「甩牌」。
荷官派牌，莊家開出七點；我隔籬個韓國人更加面如死灰。佢揭開第一隻牌，係隻八。
「有邊！有邊！有邊！」其他落咗閒嘅賭客搏命嗌。韓國人好似啲𡃁仔甩會考成績單咁、係咁屈隻牌嘅四邊。
「贏呀！」佢大力張隻牌撻出嚟，係隻Q；又係開閒。
「好嘢喎！咁都俾你講中！」佢笑口噬噬同我講。「你係邊度人呀？」
「公州。」呢個已經係我嘅標準答案。
我哋繼續賭咗一陣，期間有句冇句咁傾偈。賭多五六鋪之後，佢同我道別，然後起身走先。我就再賭多幾鋪先離場；計計埋埋，我大約贏咗四萬幾銀。
當我離開貴賓廳嗰陣，酒店嘅公關喺門口截住我。
「先生，麻煩你留步；」酒店公關好客氣、滿面笑容咁同我講。「『金先生』交帶落，你係佢嘅朋友，叫我哋好好招呼你。我哋已經幫你開咗間套房，你今次嘅所有消費，都會入落金先生嘅帳戶度；祝你旅途愉快！我帶你上房休息吖！請你跟我嚟。」
就係咁，我無啦啦有一晚豪華套房嘆、仲食咗兩餐狠嘅。我唔知呢位「金先生」係邊位，亦都冇可能查得出，因為我連佢叫乜名都唔知，淨係知佢個樣係點。後來，接手呢次專題之後，我無意間喺資料搜集嘅過程中，見到呢位金先生嘅照片 — 原來佢就係金正日嘅大仔金正男。
而家，我總算明白，點解呢位「金三世」會喺澳門出現。
（按：XX銀行幫北韓洗黑錢嘅事件，喺2005年尾因為美國財政部嘅點名指責而浮上水面。至於金正男喺澳門嘅活動，就要到2007年先有傳媒報導。但根據筆者嘅親身經歷同事後嘅追查，金正男早於2002年或以前，已經活躍於澳門。金正男同張成澤都係朝鮮勞動黨中嘅「親中系」中堅份子，同北京嘅太子黨亦交情匪淺；因此亦種下兩人日後橫死嘅「禍根」。）
「Alan呀，」老總見我冇答佢，於是開聲同我講。「我信任你嘅判斷，你可以照你嘅意思去採訪報導。但我真係要提醒你：如果你真係要做呢個『脫北者』嘅故事，你要預備喺文章出街後一段時間，唔好喺中國大陸進行任何嘅採訪工作，甚至唔好去大陸旅行。最壞嘅情況，你連澳門都去唔到。」
「除此之外，喺採訪嘅過程中，你一定要好小心。唔好相信任何人，信你自己嘅判斷。有乜唔妥，唔好硬頸再追落去，即刻離開中國。」
睇嚟，我今次真係賭緊丁……
同日中午，延吉機場。
酒店交通工具各樣都準備就緒，係時候接朴太太同金老太機。
「東元，你究竟有幾部車啊？」我望住面前架Odyssey問佢。「過幾天你會不會駕一部大巴出來？」
「呵呵！這不算啥啊！」東元一臉自豪。「很多時候，韓國來的客人都是幾個幾個來的，從這裏開往長白山也得幾個小時，有台比較舒適的車，做生意也比較方便啊！」
傾咗一陣，朴太太同金老太喺人群中推住行李出嚟。
「馮先生，多謝你嚟接我哋；」朴太太向我鞠躬。「更加多謝你今次嘅幫助。」
「朴太太，你唔須要太客氣喇！」我向佢回禮，然後介紹我身邊嘅東元。「呢位係東元，佢會幫我哋安排交通之類嘅事情。東元係本地人，對朝鮮人喺中國嘅生活非常熟悉；可能可以幫你理解一吓。」
「拜託你喇，東元先生！」朴太太向東元鞠躬。「希望今次嘅事，唔會帶俾你太大麻煩。」
「唔使客氣，朴太太；」東元答佢。「我哋或者同老人家上車先，然後一邊行一邊傾？」
「好，好！」朴太太答佢；然後我哋行向東元架車。
「朴太太，」東元喺車上問朴太太。「你同北朝鮮嗰邊嘅人……約好時間、定好所有細節未？」
「仲未呀……」朴太太擰頭嘆氣。「不過，我約咗中國呢邊嘅接頭人，聽晚見面；到時，佢會有比較清楚嘅做法同時間表，可以俾到我。」
「東元先生，」朴太太好似突然醒起啲嘢咁。「你有冇認識過，喺北韓脫北、然後嚟咗中國生活嘅人？」
「唔……」東元諗咗一陣。「有就有嘅……你想搵佢？」
「係呀，」朴太太答佢。「其實都而家，我媽媽個心都仲未好踏實。雖然話，好多嘢都可以俾錢解決，但聽聞，由北韓出走去韓國，要走好遙遠而危險嘅路線，需時亦都好耐。我大舅父就係得我表弟呢一粒仔，萬一有咩閃失……我希望，有一個經歷過呢個過程嘅人，可以解釋一吓個做法俾我聽，等我睇吓，有乜嘢可以準備得好啲，等我表弟危險少啲。」
「我都明白嘅；」東元笑一笑。「等我一陣幫你問吓佢。」
「拜託晒你。」朴太太非常有禮。
原本，我哋想陪佢哋check-in之後，再一齊食晏；但係金老太話有啲攰，唔想食嘢。於是，佢兩個先返房休息，今晚晚飯時間再見。我同東元初雪求其食咗個大醬湯（ 된장찌개 ）之後，東元返咗機場睇鋪，我哋就返咗房休息。
「哥哥呀，」初雪問我。「朴太太個表弟……會唔會有危險㗎？」
「妹妹呀，」我學佢嘅語氣。「你都係由朝鮮過嚟嘅，不如你話我聽吖！」
「嘻嘻，哥哥笑人嘅；」初雪傻笑。「我係嚟工作嘅，又點同呢。不過，我有聽過有關叛逃者嘅故事；就喺我家鄉，都曾經有人叛逃……」
「咁佢成唔成功？」
「唔知呀，某日突然間唔見咗！反正冇任何消息，聽人講先知道佢叛逃；」初雪縮一縮膊。「但係，之後佢嘅屋企人就唔見晒，聽聞係半夜俾保安員帶走，之後就再冇見過佢哋。然後全村人都要集合，接受三個鐘嘅『教育講座』，了解叛逃係背叛人民、危害國家安全嘅行為，同埋後果。」
「咁你知唔知佢哋全家去咗邊？」我問佢。
「『地獄』囉！」佢眼定定咁望住我。
「地獄？」我不明所以。
「係呀，地獄；」佢仍然眼碌碌咁望住我。「有勞動鍛煉隊、管理所、集結所、教化所、監獄；總之統稱『地獄』。平時普通人連行近啲都禁止，聽聞，裏面好恐怖㗎……」講到最尾，佢面露惶恐。
「咁你有冇見過，喺地獄出返嚟嘅人呀？」我再問佢。
「有，不過已經神智唔清醒；」佢答我。「其實都聽過有人返咗出嚟後，仍然可以正常生活；不過，我就未見過喇。」
「初雪呀，」我見佢講開啲「恐怖」嘢，於是打蛇隨棍上。「我想同你講，朴太太嘅事，不如你真係唔好去；好唔好？」
「點解呀？」佢面帶詫異咁望住我。
「我實在唔放心俾你去冒險；」我解釋。「你要明白，中朝邊境其實好混亂、兵賊不分。萬一有咩事，先唔好講係賊，就算你俾兵拉咗，無論係中國兵又好、朝鮮兵都好，你都唔會有好下場。你啱啱先講完『地獄』嘅恐怖，我好擔心，萬一你有咩事，可能都會有相同嘅下場……」
我算唔算嚇緊佢？一半半啦。不過，如果我哋喺邊境嘅「活動」俾人揭發的話，咁無論係解放軍定北韓軍拉到我哋，我會點都仲係未知之數，但佢就一定入硬集中營無誤。到時，你叫我點對得住佢？
可能係我嘅語氣太重，初雪有啲錯愕；佢陷入咗沉思。過咗冇耐之後，我見到一滴眼淚喺佢面上流過。
「對唔住呀，」我同佢道歉。「我唔應該咁樣嚇你；但係，我真係唔希望你參與今次嘅事情。」
「哥哥，」佢好堅決咁望住我。「我唔怕！我一定要去！」
「點解？」我問佢。
「哥哥……」佢繼續望住我，但係眼神帶住一抹溫柔。「 좋아해요 ！（我喜歡你）」佢用一句地道嘅南韓韓文答我。
「由細到大，除咗我屋企人之外，冇任何人好似你咁，對我咁好；」佢好認真咁望住我。「喺一個敵對階層同動搖階層嘅社會長大，我明白每個人都要自保係好重要。呢段時間同你相處，你除咗好錫我之外，仲好尊重我。咁大個人，我第一次感覺到，被愛同被尊重嘅感覺。哥哥，我好喜歡你，所以我要保護你，唔會俾你自己一個去冒險；如果有咩事的話，我願意同你一齊去面對。」
講完之後，佢好用力咁攬住我。
呢一刻，我清楚感覺到，我同初雪之間，有一種感覺 — 係愛嘅感覺。
無月無日無夜 仍願停下來聽你傾訴 能為你好 能讓你好 都一一去做 無論情是誰造 仍願垂下頭給你禱告 沉澱了的 沉默訊息 讓夜幕聽到 從未忘記 你需要甚麼 我早已做過 然後忘記 獻出過甚麼 得到的將有幾多 若你用我的感情愛一天 願意讓時間靜下等你十年 期望讓你聽見 等你實踐 這一生總有這天 若你用我的心情過一天 定會明瞭我度日怎會如年 期望讓你看見 風雨漫天 分一點給你掛牽 假如命運沒終點
（待續）
本故事人物及情節如有雷同，實屬巧合。分享至
成為作者繼續創作的動力吧！
© 2024 vocus All rights reserved.