阮孫足巧，我無騙你

我行過一間旅館的頭前，大門邊仔的停車場停３台遊覽車，有一寡人徛佇車邊，可能咧等欲上車。有一个查某人講：「阮孫足巧耶！」無人應伊，伊閣講一擺：「阮孫足巧耶！我無騙你。」徛佇伊的面頭前的一个查埔人緊咧應伊：「是啊！是啊！」我聽著、看著，感覺誠好笑，我想欲問伊的是：「你是佮啥物人比的？講恁孫足巧耶！」

人講「生一个囝，嘐潲３年」我看生一个孫嘛仝款，共人展伊外𠢕（gâu）外𠢕（gâu），這會曉，彼嘛會曉。一方面查某人干焦囝佮孫通講爾爾，以前講囝，這馬講孫，攏無家己的代誌通講，出來𨑨迌，閣咧講伊的孫予人聽，人毋捌伊的孫，毋捌看過，伊講孫巧，閣愛頕頭表示同意，誠為難人。