榕幫專輯《根》台語饒舌歌詞欣賞

榕幫 (2023)：「台語歌配台語字幕，必須的吧！歡迎來感受一下！」

　　對台南開始 ê  Hip-hop 團體—榕幫，團員有詹士賢、Leerix（李瑞）、閣有WarrenK（華辰），真gâu共西洋和臺灣 ê 老音樂元素，敆入去in ê 創作當中，成做獨一無二 ê 風格。最近拄出一張新專輯《根》，大部分是用台語來創作，描寫二十外歲失根世代 ê 少年人，面對社會 ê 不安、情感 ê 結、國家政治認同 ê 混亂，若是「根」無完整，心內就有「恨」。

▍專輯歌曲介紹 ▍                        

◆ 第一章節：出社會 ê 不安

《我的心聲》是對羅冠中〈我的心聲（阿桐唱〉取樣，講出心內底 ê 不安。

《360》是 leh 講自細漢序大人攏共咱講：行行出狀元， tī 大人 ê 心內底煞攏是白賊話，這條歌對劉福助 ê 〈點仔膠〉取樣，共歌詞改做「點仔膠 黏著跤 我的路 佗位揣」，深深感受著對未來出路 ê 不安。

〈美好的一天〉是對鳳飛飛 ê 〈未曾留下地址〉取樣，這條 leh 講逐家攏予勞資雙方 ê 遊戲規則縛牢 leh ，逐家雖然攏是 leh 追求『美好的一天』，結果煞是攏 leh 互相傷害。《十八仔》這條是劉福助 ê〈侷不通博〉取樣，共原本是 leh 苦勸人改筊 ê 歌，改寫做「人生原本就是一場筊局，上重要 ê 是開局投胎」。

◆ 第二章節：個人生活（情感 ê 結）

　　《牽手》這條是受著劉福助 ê〈牛郎織女〉啟發--ê ，學伊共北管傳統曲調「緊中慢」添詞改寫做〈牛郎織女〉，主要是 leh 寫講因為社會環境 ê 因素，所以一直毋敢佮心愛 ê 人約定一生，只好向望後世人；《鑰匙》是對羅冠中 ê 〈草地人〉取樣，描寫著拄出社會 ê 少年人心內 ê 矛盾，到底是厝內人蹛 ê 厝是阮兜，抑是家己所打造 ê 厝才是？

《爬佮行》是台語「爸仔囝」 ê 諧音，歌詞看起來敢若是 leh 表達對老爸 ê 養育之恩，事實上，是 leh 暗示世代之間 ê 分隔，這條歌聽起來袂輸是一條1977年出版 ê 台語歌曲。

◆ 第三章節：國家政治認同 ê 混亂

　　《台灣R.O.C》這條是對劉福助 ê〈劉福助落下咳〉佮〈請你免生氣〉取樣--ê ，口白直講「ＯＯＯ嘛是想袂曉」，講出一切 ê 混亂，原底 leh 喝講這一切一切攏是台灣毋是一个正常 ê 國家所致--ê ，路尾，煞來予人殺害。《怨》取樣自劉福助 ê〈春花望露〉，閣使用牽亡歌 ê 元素，描寫過路關到陰間，毋過心內充滿怨恨，無法度接受家己做著 ê 代誌，結局煞是按呢！《恨》是描寫倒踏行路關，逃出陰間，tī 路裡直直思考，敢是阮過去大聲喝出阮 ê 立場，煞攏毋捌理解過對方，敢會是in其實攏佮咱仝款？《別說再見》接受眼前 ê 模樣，共過去 ê 家己埋落去，用新 ê 方法開始後一段人生，這條歌有「電三弦、帝鐘、龍角、敲仔」演奏著〈路關〉、閣有一台管風琴演奏 ê 福音音樂，可比是這片土地 ê 經歷、多元文化。

　　最後《化恨為根》是阮對台灣 ê 答案，毌是欲共「恨」燒燒 leh 化掉來原諒，是欲接受心內有恨，接受遮攏是確確實實發生過--ê ，接受咱討厭 ê 人事物，其實嘛是達成一種獨一無二 ê 完整，接受，就會是咱共同 ê「根」。取樣自鳳飛飛 ê〈我不能沒信心〉：「就算路途艱難，我們不能沒有信心」。