家己提矸仔去貯的洗衫精，機器拆走矣！
我幾若年前來礁溪蹛，看著郵局頭前，有一个機器，是家己提矸仔來貯的洗衫精，誠好，毋免挕捒遐爾濟的塑膠矸仔、塑膠袋仔。
我買物仔攏家己紮塑膠橐仔、盒仔，儘量用厝內面愈來愈濟的袋仔。去超級市場，先看無包裝的架仔頂有我欲買的菜無？若有，就用家己紮的橐仔袋。去買自助餐，一定用家己紮的盒仔；若是便當，看情形，人若用電腦點餐，佇後面灶跤攢的，就用in的做法，紙便當盒仔袋；若是佇我的面頭前，我就共我的盒仔提予伊，請伊用我的盒仔袋。
看著這个賣洗衫精的機器，我誠歡喜，毋過，我足無愛用遮仔「機」，閣再彼當時仔，精神真歹，驚講機器頂面的說明看毋著，想講等精神較好的時才來買。
幾若個月前，洗衫精用完，想欲去買，毋過想著，伊的芳味我會甲意無？進前我攏用無芳味的雪文水，這幾若年超市內底已經揣無無芳味的雪文水啊！我揀芳味較輕的。
想到芳味這點，我又閣煞，毋敢買，去超市買一包洗衫精。幾若工了後，我想到，我想傷濟，彼个機器是家己落銀角仔的，頭一擺會使買20箍、40箍先用看覓，無甲意嘛無要緊。
按呢想，就決定下改就來買。我的衫大部份紮轉去台北洗，洗衫精用誠慢。幾若禮拜前，經過伊的面頭前，看著頂面貼一塊紙，寫X月X換內底的洗衫精，原來in會定期換，我嘛佇想，是內底的洗衫精賣完才閣補貨？按呢是賣偌久呢？看著彼个貼紙，我就放心矣！
前幾若工，我看洗衫精咧欲用完，紮矸仔、銀角仔欲去買，結果，彼个機器已經無佇遐，哪會按呢？
我想欲支持這个家己紮矸仔去袋的方法，支持無著，心肝內有一寡仔失落感，我希望主辦的人知影有人佇支持，毋過，我無動作，伊就無知影，可能真少人買，只好拆掉。
想著進前，有一个總舖師的迷眾頁上懸，伊佇講，若是有新開的咖啡館、餐館，你感覺誠佮意的，就去交關幾擺，去支持，無的確，幾若個月了後，伊就無去矣！有影，這馬的代誌無永遠的，定定變動，佮意的物件，就趕緊去交關，去捀場，予頭家知影有人佮意伊的物件佮服務。
（2024.5.8.）
你可能也想看
