開啟歷奇訓練

更新於 2024/07/08發佈於 2024/07/08閱讀時間約 6 分鐘

開啟歷奇訓練 -5/7-7/7 (天晴, 陽光猛烈,小暑)

上回提及小弟正在參與為期2個月的歷奇訓練
第一課簡介會後過幾天就是訓練營了
不具體說訓練營玩什麼了,要親身體驗才能感受
說一下訓練營我的方向,發現,以及改變

--歷奇訓練的根基--
本身參與歷奇訓練係想學習啲繩索系統, 但係去camp之前
主辦單位其實再三提醒,呢2個月的歷奇訓練 soft skills > hard skills
所以都OK, hard skills我可以再上堂去學
Soft skills 學習同訓練嘅機會係比較難得, 呢個歷奇訓練必須參與至少2個實習
從實習當中實踐Soft skill, 點樣帶人,系比較難得嘅機會

喺今次歷奇訓練
我已經好清楚繩索系統係bonus,最主要花時間學點樣帶人
唔好去到話點樣帶人,起碼都學識點樣比清晰嘅指令,令到團隊運作更加順暢

--第一個訓練營的期望--
我對第一個訓練營的期望 :觀測導師們如何在訓練營中,帶領參與者
帶領分幾個層面- Lead Game, 為小組提供清晰指令, 心理上的帶領,等等
從觀察當中偷師

我對自己的期望: 希望喺3日2夜, 發掘多少少唔同人嘅潛能,試下推佢哋一把
盡量改下壞習慣- 成日拎咗個主導權,過於主觀,認為自己一定啱
聆聽多少少其他人對自己嘅期望,想達到嘅目標

推- 如何分析佢潛在的能力? 如何推? 佢自己內心會唔會抗拒?氣氛到咗未?
一個小組咁多個人,推一個人,其他人會少咗機會,會唔會影響到其他人心情?
等等
試下推佢哋一把- 呢一句望落去好簡單; 其實要考慮好多

--第一個訓練營的觀察--
1)我發現自己改變咗好多,會考慮成個團體嘅運作
(最重要嘅系,呢樣嘢唔係因為上邊提及我對自己嘅期望特登咁做,系自然反應)
呢樣嘢我系從其他人嘅行為,發現到我自己變咗嘅
故事內容: 有個隊員, 佢自己本身都有帶領一啲歷奇活動- 即係有經驗
佢比較積極提出意見,建議大家唔同遊戲點樣玩同埋點樣做
但係一個問題係其實隊員包括我, 其實遊戲係冇乜經驗
或者唔同隊員嘅運動天賦都有唔同
而佢提出嘅意見, 相對上比較講運動天賦或者對遊戲嘅認知
咁我就聽得明佢講咩嘅,而我嘅運動能力應該都做到佢想要嘅效果
但係佢講完我就覺得,你同我得姐,但係對隊員會複雜同埋困難
我見隊員唔係好理解, 同嘗試咗佢個方法運動天賦上未能應付到
咁我就會提出一啲隊員有能力達成的方向
**彩蛋**
有時佢提出嘅方法佢自己都做唔到,haha,佢以為喺common sense,好簡單,叫其他人做,咁佢又比較主觀喎, 其他人做唔到佢有啲忟憎話: 呢個game好簡單咋喎,系咁樣嘅咋嘛. (但系其實佢又唔係做嗰個位)
咁我就同佢講(好禮貌地): 唔好意思,可唔可以示範一次你講個方法點做 🙏🏻, 我企住你個位先, 你做一次你大家睇🙏🏻🙏🏻
邊做邊講: 系咁樣嘅咋嘛
不失大家所望, 喺講到咋嘛個兩隻字嗰陣時, 就係呢個方法失敗嗰陣時
然后佢即刻唔出聲,用同一個方法唔出聲咁上上落落多幾次,試下佢自己所講嘅方法
但係最後都係失敗收場

!!!不過我唔係笑佢喎!!!其實我之前都係咁嘅人, 甚至而家呢個壞習慣仲未改得曬
但係身為過來人其實嚟緊嘅訓練我都好想觀察佢嘅改變
其實佢肯俾意見都係為咗個game好
只係佢考慮少咗唔同人有唔同能力

我亦都喺呢件事度發現自己,我考慮多咗其他人同埋團隊嘅能力
再畀意見,件事點樣做,同埋講得簡單啲
同埋我發現講嘢婉轉咗好多 : 會唔會咁樣咁樣做好啲? 我有個方法想大家參考同埋討論一下?唔好意思呀🙏🏻我有個方法大家會唔會想試下?
當發現團隊氣氛有點差, 我就會搞氣氛主觀小小 : 挑!輕鬆啦~ 我哋試下咁做好冇?
就算得同唔得,我都講 : 優秀! 爭小小/勁

2)學識咗聆聽及觀察別人想要嘅嘢,適當時候推佢哋一把
當每一個人講 <我喺呢個訓練營嘅期望> ,我mark低所有人嘅期望
係呢3日2夜都有嘗試滿足佢哋嘅期望
我覺得我都做得幾好,可能可以再做得好啲
而我自己觀察自己有限嘅能力, 我覺得我做得幾好, 暫時未諗到點樣做得再好啲
可能要問一問導師嘅觀察先得

其次就係,我覺得有幾大嘅突破- 我花多咗好多時間觀察其他人
然之后喺適當嘅時候同埋時機推佢一把
-咦XXX, 你點睇?XXX,你有似有啲睇法喎? 我特別想聽下XXX嘅睇法同埋意見
-接下來我想推薦XXX試下做下一個可game leader, 我覺得你系好有潛質嘅!
我會問多咗好多人嘅睇法, 刻意壓住自己
隊友係感覺到我刻意壓住自己, 會有啲辛苦的
但係呢個係我畀自己嘅task, 我覺得自己有突破
同埋我都覺得做出嚟嘅效果幾好, 只係未習以為常
當然我會嘗試平衡兩樣嘢,唔會令自己太辛苦

3)呢個認真想稱讚自己- 我唔知點樣分類呢件事-> 太特別
呢個訓練營好正常咁分開咗男女房, 隔離組有個男隊員 (我同佢完全唔熟)
喺訓練營3日2夜嘅過程中,一個好錫佢嘅同居親戚過咗身
訓練營冇時間用電話, 佢miss咗屋企人嘅call, 夜晚6點幾係咁call佢. 佢夜晚10點幾先知
我一入房見佢眼濕濕, 先知佢親戚過咗身
咁佢就坐低咗喺度,我就再問多佢少少
坐喺佢隔離嗰2個男仔 (隔離組的) 離開咗間房 (!!!其實我完全唔明白, 咁大件事點解唔可以多啲人留喺度陪佢去support, 我到宜家都有少少嬲!!!)
反而留喺度陪佢嘅喺我哋組嘅3個男仔

我就問佢: 請問你有冇宗教信仰 ; 佢答:都有少少嘅
我問:基督教? ; 佢輕輕點一點頭
我就問: 雖然我無乜宗教信仰, 但係你介唔介意我同你一齊為天上嘅親戚祈禱, 我希望你對呢個親戚有啲乜嘢想講,有啲乜嘢感恩,有啲乜嘢情緒; 都係呢個禱告宣洩出嚟,呢度講呢度散, 可以嘛?

我組其餘2個男仔有其他宗教信仰,唔方便同佢一起禱告 (但佢哋2個都全程陪喺我哋隔離)
咁就我同佢一起祈禱
然之后佢花咗好多時間講佢想講嘅野
途中我都好積極回應: 嗯~ ; 有冇啲咩祝福? 你會唔會想多謝佢?
去到中途佢喊出嚟
咁我就問佢: 我可唔可以同你嘅親戚講幾句? ; 佢點頭
我話: 親愛的主耶穌基督, 多謝你為我哋帶來孝順嘅XXX
*唔好意思之後嘅禱告內容太私隱唔可以公開*
我講講下都喊咗出黎, 因為個親戚好錫佢,佢又真系好有孝心
我覺得佢喺呢個訓練營miss咗佢親戚最后1秒好可惜
我呢件事系好自然咁做出嚟,唔係為咗啲咩自己目標
對於冇宗教信仰嘅自己,可以主動做出呢樣嘢
我想畀個like自己- 其實應該係話, 小弟本身比較認同佛嘅理念
我諗我如果真系信咗佛
應該都會用基督教嘅方式同佢一齊祈禱

信任何宗教我堅信嘅唯一目標- 渡人向善