喺 AI 時代，寫作唔再係單純靠「打字快」、「文筆靚」就得——而係變成一種「高層次輸出」能力。咁「高層次輸出」又點先可以做到？簡單講，高層次輸出 = 將你腦入面獨有嘅價值，用有影響力嘅方式表達出嚟，令人信服、產生共鳴、付諸行動。以下係三個層次簡單拆解：
- 重資訊 - 抄資料、轉貼、總結，好快被AI取代
- 冇長期價值 - 人人做得到，難以建立個人品牌
- 缺乏獨特性 - 只係資訊嘅搬運工，冇展現自己嘅思考
🥈 中層次輸出：分享經驗有價值
- 重經驗 - 分享自己「瀨嘢」經驗同做過嘅實驗
- 有血有肉 - 真實故事可以建立信任關係
- 發展潛力 - 比純粹總結更有說服力，但未成品牌
🥇 高層次輸出：創造真正影響力
- 將獨特視角、邏輯、理念，講到深入淺出
- 帶動人改變諗法、產生共鳴、付諸行動
- 呢種內容可以發展成品牌、產品、社群、影響力資產，創造長期價值
從資訊到影響力的旅程
講白啲，你要贏，唔係靠寫得多，而係寫得「深」、「準」、「真」。數據唔會講大話，受歡迎嘅內容一定有佢嘅特質！無論係真實觀眾、搜尋引擎，定係而家（以及未來）嘅 AI，都鍾意睇高質嘅內容。我綜合咗過去十幾廿年嘅互聯網經驗，整理咗以下幾個真正王道級嘅寫作方式：
🔥 1. 寫你腦入面獨有嘅觀點
🌟 AI 寫唔到你係邊個，亦都寫唔到你嘅獨特故事。
你對某件事嘅獨特睇法、親身經歷、內心轉變同埋成長過程，先係讀者最想睇嘅嘢。AI 可以幫你整理內容、提供框架，但寫出「你點睇」、「你點經歷過」、「你點樣克服困難」就係無可取代嘅價值。
🔑 重點：觀點 + 經驗 > 純粹資訊
例子：琴日篇首發文就係講我「點睇」AI 輔助寫作、「點經歷過」執筆嘅內心掙扎，以及「點樣克服」踏出第一步嘅困難
🔥 2. 從問題出發，寫實用解答
🤖 喺資訊泛濫嘅時代，有深度嘅問題導向內容先會真正吸引人睇。
用寫作解答實際問題，幫到讀者，例如：
- 「點解 IG 廣告效果越嚟越差？有咩具體改善方法？」
- 「我係 freelancer，想搵第一個客但冇人脈，應該點樣起步？」
- 「創業遇到連串挫折，點樣調整心態同埋持續前進？」
🔑 重點：實用 + 真實經驗 + 針對痛點 + 具體建議
例子：呢篇文就係咁，「AI 時代，點樣寫作先至係王道？」我自己都思考咗好耐。我平時都係靠內容行銷，因應近日生意波動（下跌😅），我分析咗近幾個月嘅內容數據，包括 Facebook post、blog post 同 newsletter。配合 AI 嘅反饋，先整理出而家呢幾點心得！大家如果對創業、寫作、AI 應用或者數碼營銷有任何問題，歡迎同我講，我一定會盡力解答！
🔥 3. 寫作 = 建立信任
喺 AI 輕易幫你整到一大堆 content 嘅年代，人與人之間嘅真誠連結同信任反而變得更加珍貴。你寫出嘅真誠分享、真實經歷、面對嘅困難、內心嘅掙扎同埋克服挑戰嘅過程，會成為讀者信任你嘅重要基礎。
🔑 重點：寫人性、寫真實感受、寫你嘅掙扎與成長歷程
例子：琴日篇首發文已經具備晒真誠分享、真實經歷、面對嘅困難、內心嘅掙扎同埋克服挑戰嘅過程，夠唔夠照呢？梗係未夠啦！要持續輸出，先可以建立足夠信任！嚟緊大家想聽啲咩故仔？歡迎提供意見😆
🔥 4. 善用 AI 輔助寫作，但保持你嘅主導權
ChatGPT 可以幫你做好多嘢：
- 整理文章大綱同架構
- 提供腳本初稿同參考方向
- 幫你提煉重點同關鍵訊息
- 做好 SEO 優化同關鍵字分析
但最尾要由你加入靈魂、注入熱情、填充真實嘅血肉。你主導創作方向，AI 從旁輔助，先至係最強大嘅創作組合。
經驗 + 心得：大約一年前，開始嘗試用 AI 輔助寫作，當時覺得幾得意。不過 AI 寫出嚟嘅嘢都係得啖笑——過於簡單同表面，資料性質嘅嘢又唔夠 updated，有時又唔係好明我問乜，有時又要扮識一味吹水，實在係難以直接 publish 出街！
咁我冇停落嚟，持續用 AI 幫手做 Research 同整理資料，豐富我嘅 database。隨住 AI 高速迭代，佢嘅理解同分析能力大大提升，而家唔單止識得主動搵料，仲會根據我哋之間嘅互動不斷學習。而家嘅 AI 就好似一位醒目又稱職嘅私人助理加解難高手！佢可以將啲抽象嘅課題整理成完整嘅框架，又識得同我互動，幫我理清方向🧭，甚至可以模仿埋我嘅寫作風格添！而家我覺得好似係呀楊博士搵陶傑幫手寫自傳咁😂
🔥 5. 內容就係資產，創造長遠價值
即使你而家主力拍片、出 IG Post，優質嘅寫作內容都可以成為你整個內容策略嘅堅實根基：
- 將文章轉化成 newsletter，持續培養忠實受眾
- 將經驗整理成筆記同教學，轉化成實質產品
- 將獨特見解寫成觀點文章，擴大個人品牌影響力
- 將知識系統化寫成說明書同指南，幫助更多人
🔑 重點：寫作 = 系統化你嘅經驗、價值觀同專業知識，創造長期影響力
觀點 + 建議：寫幾篇文唔難，持續穩定高質素輸出先至係堅！寫作就係長線投資，而家冇資本，唔緊要😐 只要每日累積少少，假以時日，你有足夠本錢，就可以做啲資本性投資，即係用錢搵錢！齋寫一個blog係唔夠嘅，要配合多平台、多形式同時發佈，再配合埋有唔同嘅產品，唔樣先可以將個人品牌影響力推到極致，做到令人信服、產生共鳴、付諸行動。
P.S. 啱啱搵AI 幫手整咗個「內容創作流程系統」，同埋「高層次輸出練功系統」，兩個都係 Notion template，睇吓係咪可以幫我持續創作 ＋ 發佈，等我試用完之後再同大家分享。
