大家好！我係 Kevin，第一次喺方格子出文 (如無意外，另一邊 medium 都會同日出第一篇)，多多指教！下定決心，嚟緊會盡力每日出一篇，分享一下我對創業同人生嘅睇法，如果你喜歡的話，請大大力支持！好多年前 (超過10年)，都有寫過幾篇Blog，可惜當時無心經營，好快已經收工。如今老咗，人生經歷多咗，好想有一啲記錄留返俾自己，同時亦可以筆 (其實係 Keyboard) 會友；渴望能夠透過分享自身經驗，可以支持到同路人🚶➡️🚶♀️➡️🚶♂️➡️
點解會戚起條筋寫字？
🔸 1. 內心掙扎難交代 先寫一篇破障礙
呢個係我埋藏喺心底深深處嘅其中一個行動！過去十年，我做咗好多準備同資料搜集，累積咗好多寶貴經驗（尤其係失敗嗰啲）。如果再唔出手，持續積壓，我內心只會不停掙扎，難以同自己交代。
🔸 2. AI 工具🧰助創作 持續輸出有着落
AI 工具嘅出現大幅改變咗工作模式，仲大大增強咗我嘅研究同整合能力。呢個轉變對於持續輸出內容真係幫到好大手！之前因為驚呢樣驚嗰樣而遲遲未動筆，而家完全唔同。
🔸 3. 踏出第一步 方可成大道
其實我原本諗住出片，就算唔係片都想做 Podcast。所有嘢都準備好晒，連音都錄埋，但係因為「懶」完美主義，又要呢樣嗰樣，結果又玩咗兩個月 😓（放心，聲同片都會好快面世，而家寫住一堆文先）。文章就係 Podcast 同 Video 嘅源頭，只要持續寫到文，呢兩樣就容易搞！每次行一小步，先至係王道！
🔸 4. 結伴一齊做 同行無難度
最近有位醫生朋友開始出片，俾咗我好大嘅啟發 🔔 另外，我都認識咗一位充滿熱誠嘅退休教師，佢想用教育界嘅經驗創一番事業！我同佢分享咗做 Content Marketing 嘅策略，點知佢兩日之後就開咗 vocus 同 medium，仲要係中英文雙語寫作。佢 send 咗兩篇文俾我睇，重話想跟蹤我個 blog，見到咁有誠意，我梗係第一時間回應啦！
創意生產的循環
文字內容有咩價值？
以下係我問 ChatGPT 嘅答案：
雖然而家影片真係成為咗主流媒體形式（尤其係 TikTok、YouTube、IG Reels 橫行），但寫作喺 2025 年依然有佢無可取代嘅價值。以下係幾個重要原因：
🔹 1. 深度思考與表達
影片偏向快速傳遞感官訊息，但寫作可以深入探討複雜嘅想法、邏輯與觀點。當你要整理思緒、講清楚自己點諗，寫作係最佳工具。
🔹 2. 建立個人品牌的根基
優質文字內容有助建立你專業、思想深度與觀點嘅形象。無論係寫 blog、newsletter、LinkedIn 文章，長遠嚟講，呢啲都係屬於你嘅「數碼資產」，可以展示你嘅知識領域。
🔹 3. SEO & 可搜尋性
影片好難完全依賴 SEO（除非有詳細文案同字幕），但文字內容（文章、網頁、FAQ 等）可以俾人喺 Google 上輕鬆搵到，仲可以長期帶來流量。
🔹 4. 內在轉化力
文字可以觸動人心深層嘅情感，特別係你想講故事、表達價值觀、建立連結。影片強在吸引，但文字強在留住。
🔹 5. 配合影片成為更強組合拳
好多成功嘅內容創作者，其實係「影片 + 寫作」雙線出擊，例如影片吸引注意，文字延伸內容（例如 newsletter、Notion 教學、ebook），讓人留低同跟進。
AI 輔助寫作，係2025年要掌握嘅技能！
我完全認同以上嘅5點，而家想再補充少少：
睇文字嘅時候會特別專注，尤其係適合理解抽象概念，仲可以俾到空間大家思考🤔🧐
根據我過去幾個月同 ChatGPT 同 Grok 深入溝通嘅經驗，佢哋嘅學習能力真係唔錯。只要持續俾方向佢哋，就會產生好多高質素嘅回應！而家佢哋都好了解我手頭上做緊嘅幾個 projects，我問個簡單問題，佢哋就已經識得 refer 返去我做緊嘅嘢！真係大大幫到我完成手上嘅工作🥳
換句話講，只要我持續寫作、分享睇法，日子有功，AI 就可以睇晒我啲文章，根據我嘅思路去工作✍️ 之後我會再分享多啲呢方面嘅經驗。睇返過去一年各種 AI 工具嘅進步，兩三年之後嘅世界真係難以想像！你都快啲加入 AI 輔助學習同創作嘅世界啦！今日講住咁多先，下次見！
